【头条独家】做烹饪节目吸纳住家男Fans 江美仪揾伴侣识下厨会加分

更新时间：23:21 2020-08-25 HKT
发布时间：22:56 2020-08-25 HKT

两位主持会亲自去揾健康食材。

因为新冠肺炎好多市民都要留家煮饭仔，令到由江美仪及名厨三姐（萧秀香）主持嘅烹饪节目《女人必学100道菜》创出佳绩，最高收视达24.7点。最搞笑有朋友竟打两人主意，力邀她们上门做私房菜！美仪耍手拧头话客串性质可以，但用嚟赚钱就咪搞，不过稍后会一齐出书，希望呢个组合长做长有。采访：方骞平场地：三姐海鲜饭店

江美仪澄清秘制嘅海南鸡系熟㗎，只系灯光问题，镜头前先会呈粉红色。

三姐畀美仪80分，指她厨艺一流，一定可以揾到终生伴侣。

《女人必学100道菜》共25集会教观众煮100道菜，每集三姐教4道菜式，美仪负责一道撚手菜，因而节奏相当明快。不过，有网民却批评，每道菜式只得5分钟，遇上复杂食谱观众未必吸收得晒，甚至质疑食材未熟透就上枱，因为从镜头前所见嘅海南鸡，鸡肉呈粉红色。对此，江美仪表示必须要澄清，否则对台前幕后唔公平：「只鸡真系熟㗎！千祈唔好咁讲，对大家唔公平，现场有咁多人睇住，点会生都拎出嚟，可能灯光问题。」

江美仪喺《杀手》大结局中嘅演技获赞好。

美仪嘅清新番茄汤获三姐赞好。

提醒观众上网重温节目
美仪再强调煮嘅「爸爸冬菇鸡饭」系先走油锁住肉汁，等啲鸡半生熟再放入煲焗煮，如果熟晒先再落煲就会过火变老。不过美仪都坦言，「其实未必个个识煮餸，所以由我哋教大家点做。我哋做每一集都会食晒所有餸，甚至连隔离厂嘅演员都过嚟食，唔系流㗎！如果观众觉得节奏过快，可以上网重温。」至于三姐就话世事岂能尽如人意，两人尽力做好就算。美仪在《杀手》中亦好抢戏，她表示大结局未计myTV SUPER，收视有成32点：「套剧拍落两年，冇谂过堆埋一齐出街，我睇返结局篇都喊死！由妓女从良变主妇，𠵱家多咗好多Fans，更有唔少住家男同我交流煮食心得，将来有伴侣，识煮饭会加分，因为有时你整畀我食，我整畀你食都几Sweet！」