【头条独家】为停工乐手筹钱歌手冇反应周启生狂呻：真系好契弟

更新时间：20:10 2020-05-05 HKT
发布时间：21:00 2020-05-03 HKT

手足情深周启生和一班职业乐手情如兄弟，手足有事，他就要挺。

政府延长「禁聚令」至本月7日，夹Band出身的音乐人周启生眼见夜场及演唱会等喺疫情下要关闭及停开，多年嚟跟他合作无间嘅职业乐师，全部都手停口停，身陷绝境，有情有义的周启生即发起「爱港@你+我」网上音乐会帮等钱开饭嘅职业乐师揾救命钱，但好多和乐师唇齿相依嘅歌手们对音乐会反应冷淡，有歌手更已读不回，周启生慨叹世态炎凉，更指歌手们：「愈发财愈唔立品，唉，真系好契弟。」采访：方骞平

被迫停工17年，周启生喺尖沙咀酒吧做一个可容纳600几观众嘅摇滚骚，他慨叹呢啲热闹日子唔知几时先会再有。

幸运感恩喺音乐界46年，周启生表示能够靠音乐养妻活儿觉得好幸运。

周启生是顾家辉入室爱徒，纵横乐坛46年，跟好多殿堂级歌星如已故张国荣、陈百强、邓丽君，还有徐小凤、许冠杰及林子祥等合作。他解释今次力撑音乐界，全因几十年嚟自己算系个幸运儿，可以靠音乐赚到钱养家：「我唔算发达，只系过住啲开心同简单生活，亦都唔敢同人比较边个巴闭，愈巴闭愈忘恩负义，我唔想做𠮶啲人，我觉得要回餽社会，推动音乐事业。」

倒贴力撑绝境乐手

所以周启生决定喺6月1日，即他59岁生日当天，举行「爱港@你+我」网上音乐会筹钱，目标筹得愈多愈好：「最怕欲加之罪，必须讲清楚，呢个唔系叫音乐会，系救命行动，所有救命钱会全数派晒出去，我一毫子都唔会赚，甚至会贴钱出嚟，因为所有使费由我独力承担，希望每位乐师能够派到5000蚊应急，等佢哋撑住先，挨到政府派𠮶一万蚊。」周启生愈讲愈嬲，「喺禁聚令下开唔到Show，政府帮唔到呢班音乐人，靠攞综援都唔容易。佢哋等钱生活、交租真系好惨，成个人灰晒，以我为例都系冇嘢捞，原先去年11月搞3场演唱会，最后改到3月，家阵仲遥遥无期。」

辉煌成绩已故陈百强当年参加东京音乐节，演唱的《偏偏喜欢你》由周启生编曲，周启生更做埋有几十人嘅日本大乐队指挥，讲起都自豪。

Candy阿Paul有义气

不过筹备过程中，周启生都好受气：「我日日好似收陀地咁狂打电话，联络生意朋友、fans、歌手、唱片公司老板、演唱会搞手、电视台高层等。但好难堪同讽刺，因为同乐师关系密切嘅歌手反应好冷淡，唉，无言，只得卢巧音同黄贯中(Paul)有回音，仲捐咗笔过万嘅可观金额！」周启生坦言睇唔过眼：「乐手永远同歌手伴奏，咁多年立下唔少汗马功劳，但只得𠮶几千蚊微薄报酬，喺呢班朋友最需要帮助嘅时候，共事嘅人竟然唔愿出手！佢哋宁愿参加Lady GaGa筹款show，帮美国同世卫筹款，『斗零』都冇摆喺香港度！好彩仲有啲好心人，包括黄百鸣、契爷胡枫、环球唱片董事总经理黄剑涛（Duncan）、环星娱乐老板张国林、黄龙德会计师事务所出钱撑，而陈龙华做义务监制及拍摄。」

我爱香港唔会放弃

另外，周启生又不吐不快：「联络过程中有啲行内人只系畀手瓜emoji我，叫我加油，避开实际行动；亦有人问长问短：『单嘢仲有边个嘉宾？喺边度做？』喂，唔系搞国庆回归骚呀，系嗌救命行动，佢enjoy演出件事多过系救人。甚至有人会反问我：『咪系send错讯息？』亦有直接回答：『无兴趣』，而唔覆嘅更多的，真系好契弟！而我坚持，就算天塌下，竭尽了力气，We love Hong kong，你我从未放弃。」