祖马龙心水│「快狠准」冷勿尽忘

更新时间：18:50 2024-11-16 HKT
发布时间：18:50 2024-11-16 HKT

刚过去的周三赛日，天文台杀马迷一个措手不及，晚上在毫无先兆之下，突然宣布数小时候后悬挂八号风球。马会又犀利㖞，转数够快，当天文台宣布呢个消息唔够半个钟，就已经决定腰斩赛事。祖马龙比较熟悉银行界，金管局有严格指引，银行需要有严谨而有效嘅业务韧性。马会作为一所管治严谨嘅机构，亦有一套相关灾难恢复指引。讲到咁深奥，不如讲个简单嘅比喻，即系屋企食紧饭，无啦啦有个大恩人亲戚话半个钟头后想上嚟家访坐吓，本身屋企食紧咸鱼，开咗砖腐乳，全家爬紧白饭，阿妈一听到消息就突然企起身冲去厨房摷返罐车轮鲍出嚟，即刻浸干瑶柱，将本身听晚食嘅生菜攞出嚟洗，加多味餸，招呼大恩人亲戚。呢个咁快嘅反应一定系来自于平时日子有功，喺海味舖特价嘅时候上定粮饷。

当然，今次安排亦有唔尽善尽美嘅地方，但喺安全嘅大前提下，疏散员工，及时运走马匹，安顿顾客免费请会员食餐饭，祖马龙对呢个各方面嘅平衡予以肯定并高度评价。

今日中银赛马日嘅天气，相信都系持续不稳定，刨马嘅时候需添加些少幻想。祖马龙跟咗「快狠准」好多铺，发觉上季匹马升上三班后未必适应到步速，今季练马师非常谨慎，操好都等到十一月先出。翻查数月晨操记录，此驹并无缺课，睇嚟健康正常，呢铺排六档预计守二叠有遮挡，今次赔率唔会热，博只马暑假大幅进步，投注策略轻注位置，阴晴不定嘅日子小赌怡情。

第十场：4安康万里、2骏奕快车、3同样美丽
第十一场：12快狠准、5开心宝宝、6竞骏先锋

↓立即下载星岛头条App↓