小朋友话你知农历新年最想做的是…「过年唔好讲读书」、孝顺仔想「帮嫲嫲买肠粉」︳亲子热话

小孩心声︳农历新年快到，让孩子最开心的相信莫过于逗利是、吃各式各样的贺年美食。是次走访了秀明小学及亚斯理衞理小学，集合12位同学的心声。童言童语固然让人不禁会心微笑，当中有不少同学提及自己亲友，彰显了家人在他们心目中的重要地位。家长们也来了解一下孩子对农历新年的看法和愿望，共同享受这个充满喜庆与团圆氛围的节日。

同学仔问题：

1. 过年最期待做啲乜？
2. 点用利是钱？最想收到咩款式嘅利是封？
3. 最钟意食嘅贺年食品？

同学仔吴柏希：去日本旅行

去日本旅行！已经去过两次，有好多嘢玩，而且𠮶度嘅playhouse感觉干净啲，试过喺香港嘅playhouse见到地下湿晒，有滩黄色嘅液体，好呕心！氹氹转、跳弹床、摇摇板⋯⋯我都钟意玩，特别有个圆形嘅喺中间会砰砰砰，弹下弹下，仲可以喺上面跳，香港好少见。新年仲会同堂家姐拜年，我都好期待，因为佢哋会畀钱我，咁样就可以用啲钱去日本玩，已经储咗三年，最想收到Spider Man嘅利是封。（贺年食品呢？）发菜，我最钟意食菜同鱼。（知唔知发菜有咩寓意？）食完可以令我生多啲头发！（食发菜系寓意发财啊！）

同学仔蒋沅锜：过年唔好讲读书

梗系逗利是啦！咁样就可以储起啲钱入银行，通常会储起一半，爸爸妈妈、学校老师自细已经教我分清楚想要同需要。而我比较钟意印有祝福字句的利是封，如健健康康、平平安安，代表着长辈畀我哋嘅祝福。最挂住表哥表姐，一年可能只系见到几次，而且我哋年纪差唔多，一齐玩好开心。（长辈会问你成绩吗？）过年最好讲啲开心嘢，唔好再讲关于学习上嘅嘢啦！ 

同学仔邓琋殷：收到自己有份整嘅利是封

过年可以同公公、婆婆，仲有叔公、姑婆食团年饭，好热闹。佢哋用嘅利是封系妈妈亲手整嘅，我同爸爸都有份帮手㗎！可以从长辈手上收返自己整嘅利是封，特别有意义，但洒金粉𠮶阵好容易整到一地都系，要好小心。上年学校荐我参加绘本创作，我就拣咗棉花糖为题材，因为我好钟意食甜嘢，例如年糕、糖莲藕，都系我「至爱」嘅贺年食品。仲用利是钱将作品印制成实体书，放喺学校图书馆畀其他同学仔借阅，令我觉得好自豪！ 

同学仔林诗诗：用利是钱买文具

最期待拜年！因为有啲亲戚朋友住喺国内、澳门，唔系成日见，但新年𠮶阵就可以聚埋一齐，然后逗利是。妈妈无特别要求我将利是钱交畀佢，所以我会将利是放喺枕头底，过完年再一封封咁拆。我会将部分钱用嚟买笔记簿、文具，亦会同（邓）琋殷一样，用利是钱买返自己创作嘅绘本。另外当然唔少得食啦，百力滋、梳打饼，比较健康之余又可以同家人、朋友分享，一齐食特别滋味！（但呢啲唔系贺年食品㖞！）

同学仔张茜晴：同妈妈一齐「入货」

拜年，顺便逗埋利是，以及同亲朋戚友叙旧，如婆婆、嫲嫲。佢哋会问我一啲近况或者成绩。（会唔会反感？）毕竟佢哋系长辈，出于关心啫，我会用委婉嘅方式回答或尽快转移话题。到于利是钱，我会主动畀妈妈帮我保管，咁样买嘢前佢可以畀到适当嘅建议。同时会拎一部分出嚟做善事，帮助有需要嘅人，将长辈嘅祝福传递出去。另外，我都非常期待每年同妈妈一齐「入货」，准备全盒，特别钟意糖冬瓜、糖莲藕、糖莲子等带点甜味嘅小食。

同学仔钟安晋：帮嫲嫲买肠粉

探嫲嫲！始终佢年纪都大啦，不止新年，暑假都会返清远乡下探佢、照顾佢。佢行动唔系咁方便，平时只可以煮粥食，但我喺度就可以踩单车去买肠粉畀佢食。虽然要搭几个钟车，但我唔觉得辛苦，可以见到嫲嫲系一件好开心嘅事！

同学仔黄梓珊：食最爱的瓜子

钟意同屋企人玩集体游戏，特别系同家姐一齐玩五子棋，因为成日都系我赢，我有时都想让佢㗎，但我行到边佢跟到边⋯⋯（无奈的表情）。而且多数过年先玩，平时放学返屋企都要赶住做功课、温书，无时间玩。过年会到婆婆屋企拜年，可以见到好耐好耐冇见嘅亲朋戚友，如表姐、表妹、哥哥⋯⋯一齐玩。今年学校整咗小卖部，可以用利是钱买，最抵系紫菜，五蚊有两包，鱼蛋烧卖𠮶啲我惊太饱，无胃口食午饭。（学校午餐好食吗？）好食，最钟意食D餐，有通心粉、乌冬、烧卖、粟米，同埋米线。新年可以食瓜子、黑瓜子、红瓜子⋯⋯只要系瓜子我都钟意食，仲有蜜糖炸鸡、薯条，但我天生就唔钟意食汉堡包，我都唔知点解。

同学仔郑竣晖：一家人一齐玩

过年可以收利是，又热闹，最开心系可以同家人、朋友一齐玩桌游，大富翁、飞行棋⋯⋯卡通人物如Pokémon，同传统款式嘅利是封我都钟意，福字代表长辈对我哋嘅祝福、全家人平平安安。利是钱全部都会畀妈妈储起，如果依家用咗，之后有钟意嘅嘢都买唔到。（咁你过年会食咩？）瓜子、年糕、萝卜糕⋯⋯最钟意黑瓜子，因为佢甜甜地又咸咸地，好特别！ 

同学仔麦浩龙：返国内放鞭炮、烟花

与表弟表妹见面，因为佢哋喺国内生活，只有放长假先有机会见面。新年返到去可以同佢哋一齐放鞭炮、烟花，依啲平时喺香港都唔做得。细个𠮶阵比较「为食」，拜年见到唔同食物会上网查有关资料，知道汤圆代表团圆。而贺年食品入面，我最钟意食年糕，烟烟韧韧，又甜甜地，非常特别。

同学仔李信睎：食四大长老整嘅嘢

去亲戚朋友屋企拜年，同埋逗利是！最想见爷爷、嫲嫲、公公、婆婆，因为佢哋成日都会整啲好好味嘅嘢畀我食，例如萝卜糕、年糕等。仲有油角、瓜子、糖莲藕、咸水角⋯⋯我最钟意油角，因为好脆、好香口，但唔可以食太多。利是嘅话，我期待收一啲可以循环再用环保利是封，可以用嚟做劳作或者学校放完年假都会举办利是封回收活动，避免造成浪费。

同学仔陈乐娜：用利是钱买香港无嘅零食

逗利是，可以买零食跟家人、表姐、表弟及邻居分享，婆婆屋企附近有好多香港无嘅怀旧零食，入面有啲果汁，可以倒转啜出嚟⋯⋯（啜啜冰？）唔系！（到最后记者都唔知系咩）表姐好好人，每次返去都会准备好多小食、雪糕畀我。过年仲有好多嘢食，例如糖不甩、瓜子、年糕、马蹄糕、萝卜糕⋯⋯咁多样最钟意年糕，每逢新年，嫲嫲都会亲手整好多底年糕，分畀不同嘅亲友。

同学仔戴敏乐：一家人团圆

拜年可以收好多利是、好多钱，有100张，有啲系100蚊，有啲系50蚊。我会将利是钱畀妈咪，因为佢生我好辛苦，帮我交学费、书簿费，仲要每日好早起身帮我整早餐同饭盒，花好多时间、心机喺我身上。另外我都好期待同爷爷、嫲嫲、公公、婆婆、舅父一齐食新（团）年饭，因为平时唔系成日见。过年𠮶阵最钟意食汤圆，代表一家人团团圆圆。 

文：林诗敏
图：PhotoAC、林诗敏 

相关文章︳小朋友最想要的圣诞礼物是…想跟哈利波特一起冒险？去澳洲过夏日圣诞︳亲子热话

相关文章︳母亲节︳「妈妈值几少分？」小孩心声：妈妈像多啦A梦、有时很恶扣一分！

相关文章︳「爸爸变孙悟空用72变同我玩」 孩子最想爸爸变做边个「卡通人物」或「超级英雄」？︳小孩心声