KellyChu - 城大「香港‧大城小区」数码艺术展获奖作品齐齐睇｜Executive日记

更新时间：00:00 2023-04-01 HKT
发布时间：00:00 2023-04-01 HKT

香港近月艺文气息洋溢，旅发局青年学院就同城市大学创意媒体学院合作，即日起举办「香港‧大城小区」数码艺术展，展出学生创作嘅数码艺术作品，展现西九龙、深水埗同中环嘅地道社区风貌，其中有作品仲喺法国获奖，文艺嘅你又点可以错过！
展览即日起至4月23日喺中环PMQ举行，展出53位大学生创作嘅32份数码艺术作品，分别以西九龙、深水埗同中环为题，用影像同音乐，创作出1至3分钟片段及3D短片，透过艺术、科技同光影制造空间感，等观众用崭新立体嘅方式，体验香港地道社区风貌。其中以深水埗为主题嘅影片作品《OoOo》，用彩色小球穿插出现嘅形式，意指深水埗贩售嘅珠仔，喺法国动画展获3D影片大奖，将香港独特艺文风貌，推广到国际舞台，小妹觉得真系过眼难忘，大家记得留意！

展览仲一连三周末特设免费手工艺工作坊，等大家制作特色纸灯笼、个性化布袋同明信片之余，仲可以体验传统工艺，加深对地道文化嘅认识！

旅发局总干事程鼎一就话，旅发局致力用体验同创作活动等唔同形式，鼓励年轻人发挥想像力，以全新方式呈现社区日常同独特文化，为旅游业注入新动力，向全球宣扬香港独有嘅艺文魅力。
Kelly Chu