粉岭伯伯街市跌倒管理员阻扶起：「要跟程序做，唔好郁佢！」目击者嬲爆：睇到伯伯极力想起身无人帮｜Juicy叮
发布时间：14:01 2025-05-22 HKT
粉岭一个商场街市有伯伯跌倒，伯伯在地上向前趴著，有目击者指，睇到伯伯极力想起身，但旁人欲上前扶起时，却被管理员阻止，「佢话唔好，佢话要跟程序做，唔好郁佢，同佢报警。」
粉岭伯伯街市跌倒管理员阻人扶起：「要跟程序做，唔好郁佢！」目击者嬲爆：睇到伯伯极力想起身无人帮↓↓↓↓
现场为粉岭皇后山邨皇后山商场街市，有目击港男在「皇后山乜都友」FB专页发帖表示，本周二下午，他路过现场「见到个阿伯跌倒」，他拍到现场画面看到，该名伯伯跌倒后并无晕倒，而是有意识地向前趴在地上，双膝跪地，双手撑在地上。他跌倒在一间急冻食品店前面，身旁是冻柜。
目击港男表示：「睇到个伯伯极力想起身。」当时一名戴眼镜男子与管理员一同上前，「唔识扶佢起身，其他人想扶佢起身，佢话唔好，佢话要跟程序做，唔好郁佢，同佢报警。」
目击者：咁我哋咪睇住伯伯？喺度睇表演咁？
港男不满管理员阻止别人扶起阿伯：「睇到阿伯嘅动作系咪极力想起身吖？起咗几次起唔到啊？」
他质疑任由伯伯趴在地上，其他人则站在一旁望住他，不是合理的处理方法：「咁我哋咪睇住佢？喺度睇表演咁？喺度鼓励佢？起身啦起身啦咁样啊？定系推返佢趴喺度呢？」
楼主最后决定不理管理员反对，上前扶起伯伯，并让伯伯坐好，以待警员到来送伯伯入院：「我从后熊抱将佢扶起，然后大声叫佢哋攞啲凳嚟，畀个阿伯坐喺度再报警处理，唔系由佢喺地下，望住佢。」
楼主最后上载相片见到伯伯被送上救护车。警方发言人回复《星岛头条》表示，本周二（20日）接获报案，指皇后山商场街市一名约70岁伯伯跌倒，伯伯其后被送往医院医治。
网民：伯伯向前趴 料颈椎或脊椎无受伤应先扶起坐低
帖文引发网民热议，有网民支持管理员做法，认为「唔可以掂到伤者」，不过，不少网民认为现场看到，伯伯「已想起身，但都唔扶」，并不合理：「2个男人都冇力扶起伯伯咩？」「佢讲程序又唔帮手真系相当自私。」
有网民又指出，伯伯趴著估计颈椎或脊椎无受伤，应该可以扶起他：「如果有啲急救常识嘅，正常你见到阿伯跌嘅姿势，系向前跌趴咗响地，首先可以排除咗佢颈椎或脊椎会有受伤先，跟住就可以叫人攞张凳嚟扶佢起身坐低，并唔系唔可以掂佢。」
该网民又指出，街市并非理想环境，伯伯又趴在档口前面，扶起他会较合理，若当时伯伯「跌倒系躺平姿势，咁就有机会颈椎或脊椎受伤，响呢个情形之下，就真系唔好郁佢。」
根据长者安居服务协会的资料，长者跌倒，旁人应保持冷静，千万不要急于扶起，应先评估长者初步伤势，如外伤、询问其疼痛位置及痛楚程度。除非现场有即时危险，否则在等候送医期间，不要移动伤者。
同场加映：深水埗伯伯突晕倒后脑著地 药房老板一包纸巾「咁做」救命 网民激赞：明智之举
