虫虫入耳劲痛睇急症港女崩溃：似有嘢钻入个脑听到呢样怪声网民吓到打冷震｜Juicy叮

更新时间：11:19 2025-05-08 HKT
发布时间：11:19 2025-05-08 HKT

昆虫入耳实在是超惊吓的惨事。一名港女早前在社交平台Threads上载相片发帖，忆述半夜有虫入耳劲痛而搭的士去睇急症的惊险经历，崩溃地形容当时好似有嘢钻入个脑，并听到呢样怪声。网民闻之色变，有人吓到打冷震。详情见下图及下文：

虫虫入耳劲痛睇急症港女崩溃逐张睇↓↓↓↓

楼主指出，「中学𠮶阵有晚凌晨瞓瞓下觉一边耳仔劲痛，以为系耳屎。之后叫醒我老豆睇下耳仔入面，佢照嚟照去都睇唔到有嘢。但我真系痛到瞓唔到，我老豆以为我想诈病唔返学，之后我就坐喺厅喊。

我哥咁啱落楼去厕所见到我坐喺度喊，问我咩事。我就话耳仔好痛，卡卡声，之后就带我坐的士睇急症。喺的士𠮶阵我以为我系平时戴耳机太大声，耳膜穿咗仲发誓我以后听歌唔会再咁大声。

去到医院坐咗几分钟，个姑娘一照就话：阿妹你耳仔有只虫。𠮶刻内心已崩溃。坐多几分钟就到我见医生，医生一望就话：哗你个只蜈蚣嚟。内心崩溃到喊晒口。之后唧咗啲水入耳仔，只蜈蚣就飞咗出嚟了。个医生同我讲如果佢再爬入啲，穿咗耳膜嘅话就可以人生拜拜了。

依个经历我毕生难忘，因为真系超级痛，本身蜈蚣啲脚就好硬，仲要多脚，个感觉好似有嘢钻入个脑咁，卡卡沙沙嘅声」。长文讲述经历后，楼主附上「飞咗出嚟的蜈蚣」相片。

网民：谂下都打冷震

回应的网民奇怪「原来蜈蚣识飞？」，楼主澄清：「唔系识飞呀，系唧咗啲水入耳之后，只蜈蚣弹咗出嚟，好似飞出嚟咁」。有网民抱怀疑态度指出，「你图片𠮶个系千足虫唔系蜈蚣嚟㗎！虽然佢哋都有好多脚，但起码千足虫无毒」，另有网民估计楼主「应该系住村屋多」，建议「安装蚊网买定杀虫水」。

楼主及后补充：「好好彩我哥凌晨3点去咗屙尿，如果唔系我都唔知点算」，回应的网民都和应并大赞「你阿哥救咗你，抵请食饭啦」、「你都好在有你哥哥帮到你」、「好彩你阿哥有带你睇医生」、「好彩你哋当机立断去急症」、「多得你阿哥！当时简直系英雄！」。

另有人问及楼主父亲事后的反应——「想问你老豆知道后有咩反应？好彩有你哥咋，最后有冇话你阿爸？」、「你阿爸差啲害咗你，佢知你冇讲大话有咩反应？」。楼主载上对答载图回应：「无话佢呀，我爸都有道歉，最后无事」、「佢后尾有道歉，但我无怪佢，因为佢都唔会估到真系虫咁夸张」。另有人好奇楼主「最后有冇返学？」，楼主也上载截图回应，指「无，返去继续瞓」。

对于图片怀疑附有血迹，网民都大感震惊，指「有血」、「哗！仲有血㗎」、「有血，好惨，我一定会好崩溃」。有人惊呼「吓死人咩」、「好得人惊」、「睇到好惊」、「谂下都打冷震」、「好彩无事」、「好彩你最后冇事，但真系谂到都起毛管戙」。

相关阅读：天水围漫天飞虫如天降豆豉猫咪扑窗边好紧张网民：咁夸张？