茶餐厅拒收披口廿蚊纸食客嬲嬲烂银纸究竟用唔用得？金管局咁讲......｜Juicy叮

更新时间：06:51 2024-05-17 HKT
发布时间：06:51 2024-05-17 HKT

烂银纸都系钱？有茶餐厅顾客大呻，被收银员拒收一张纸边遭撕开的20元纸币。网民聚焦廿蚊纸的损毁情况后意见两极，有人力撑楼主，有人站于收银员一边。就遇上钞票被涂污或损毁情况，金管局有官方的一锤定音说法，也教落市民应该如何处理......

茶餐厅拒收披口廿纸逐张睇 ↓↓↓↓

声称「在银行工作40年，甚么残钞都见过」的楼主，早前在facebook群组「黄大仙区友(黄大仙，新蒲岗，钻石山，慈云山......)」发文，不满旺角通菜街一间茶餐厅的收银员拒收其披口廿纸↓↓↓↓

撑楼主网民：用放大镜睇㗎

从楼主上载的肇事汇丰银行廿蚊纸相片见到，披口位置在右上角对落直排钞票号码旁。鉴于损毁情况不太严重，站楼主一方的网民认为「只系轻微撕烂咗......就唔收，都有啲过份，好多找续都系左手嚟右手去啦～」、「哗，佢用放大镜睇㗎！？」、「只角果少少，多旧鱼」。

茶餐厅拒收披口廿纸逐张睇＋网民意见两极回应↓↓↓↓

撑收银员网民：下一个客一样唔想要

撑收银员的网民则指「损坏咗嘅货币店家有权拒收」、「人哋唔收咪唔收，个重点系你收咗，就要谂下点使」、「你去返银行换，无理由搅个收银，下一个客一样唔想要」。有网民则分析，其实「楼主最主要分享嘅系收银员态度，唔收咪唔收，大家都客气啲，咁就唔使咁激气」。

茶餐厅拒收披口廿纸逐张睇＋网民撑收银员回应↓↓↓↓

网民讲句公道话↓↓↓↓

•呢张好小事，唔收又过份咗。但如果系啲好样衰嘅，入数时银行会唔收，又要员工自己去返汇丰换，所以最好大家收钱时睇清楚唔好烦。利申：自己都系做收钱工作，我见到啲样衰／花晒／无咗一忽嘅一定唔收；

•我觉得佢就紧手咗啲嘅，因为只系烂咗好少，你可以喺其他地方用，如果间间都唔收，咁你攞返去汇丰，佢一定会换畀你，或者攞去入返落自己户口，好易解决到；

茶餐厅拒收披口廿纸逐张睇＋网民讲公道话回应↓↓↓↓

•裂开咗，人哋唔收都好正常啫，我试过拎去银行换，不过对番工嘅人嚟讲好麻烦，都系侧侧膊用咗佢算；

•你收钱嘅时候你都唔会想收一张烂嘅银纸，咁呢个店家系咪一直要keep（留）住呢张银纸？其实我哋正常市民，如果发现银纸破损系可以去银行换返；

•两边都夸大咗：1）收银咁少损烂可照收入银行；2）楼主如果成身得廿蚊都去茶记，谂下用完廿蚊之后点算啦。我成日用入钱机，经常都有几张唔收的，排柜枱啰，时间等于金钱，明白啦；

•张钱烂咗店家当然可以拒收，如果人哋找张钱畀你系烂嘅，你都可以叫佢换过张。但如果张钱不幸地已经喺你手上，你就去银行换咗佢啦。

楼主自爆在银行工作40年

于是有人将心比己地问楼主：「我个人嚟讲，都唔会收。调转楼主你会收吗？」

楼主现身回应指：「我会，因为号码齐全，纸质无损。我在银行工作40年，甚么残钞都见过，我觉得收银嘅有自己角度，但其实任何人仍然可以用呢张钞票......」。

钞票损毁点算好金管局咁讲↓↓↓↓

在回应栏上，不少网民给楼主教路，指银纸破损可以到银行更换。就遇上钞票被涂污或损毁情况，金管局教落市民应该咁做↓↓↓↓

在金管局facbook，局方曾以「烂银纸都系钱？」为题发帖，指出「如果银纸崩咗角、污漕咗，有轻微破损系可以继续用，但最好拎返发钞银行，当银行验证咗系真钞、损毁面积冇超过四分一、防伪特征完整，一般都会换返钱畀市民嘅」。而在金管局网站的「常见问题——纸币和硬币」部分，官方就这问题作解释——「被涂污或破损的钞票能否被银行接受及兑回钞票原值？」，指：

「一般而言，纸币上如有涂污或损毁情况，可能会出现其他市民或商户不愿接纳的情况，所以钞票持有人应尽量保持钞票完好，以保障自身利益。

如遇到涂污或损毁情况，市民可向有关发钞银行要求兑换。发钞银行会根据既定的准则来验证真钞，例如涂污或损毁程度、防伪特征是否完整，决定可否兑回原值，由于每张钞票的涂污或损毁情况会有不同，银行会个别考虑」。

金管局并在网页的「纸币冷知识」栏目下，设生动的情景题解画：

阿四：小森，头先食饭每人夹88蚊，你仲未畀返我！

小森：你睇下啦，我银包得返一张「红衫鱼」，上面仲崩咗一个角，唔畀得你。

阿四：银纸烂咗都系钱，点解唔畀得我？

小森：你有所不知，损坏咗嘅纸币系有可能唔被接受做法定货币㗎。

阿四：如果唔觉意收到张霉霉烂烂嘅银纸，咁点算好？

小森：崩咗角、污漕咗嘅银纸仍然用得㗎，但如果你觉得唔顺眼，最好都系拎返发钞银行回收。一般嚟讲，银行会验证张银纸系咪真钞、损毁面积有冇超过1/4、防伪特征系咪完整，无以上问题就可以兑返钱。

同场加映（一）：

20元真钞防伪特征｜点击即睇↓↓↓↓

同场加映（二）：

警方伪钞专家教「肉眼」、「触觉」咁分真银纸：↓↓↓↓

同场加映（三）：

警方教「辨钞四式」即睇即知以防中招↓↓↓↓

行使伪钞可判监禁14年

警方表示，如收到伪钞，应立即交给警方或银行处理，切勿试图再次使用，否则有可能干犯香港法例第200章《刑事罪行条例》第99条的「行使伪制纸币」罪行。

根据香港法例第200章《刑事罪行条例》第99条的「行使伪制纸币及硬币」罪行：

(1)任何人 ——
(a)知道或相信任何属流通纸币或受保护硬币的伪制品的物品是上述伪制品，而将该物品作为真的流通纸币或真的受保护硬币行使或付给；或
(b)知道或相信任何属上述伪制品的物品是上述伪制品，而将该物品交付另一人，意图由该另一人或其他人将该物品作为真的流通纸币或真的受保护硬币行使或付给，
即属犯罪，一经循公诉程序定罪，可处监禁14年。
(2)任何人知道或相信任何属流通纸币或受保护硬币的伪制品的物品是上述伪制品，而在无合法权限或辩解下将该物品交付他人，则该名首述的人即属犯罪，一经循公诉程序定罪，可处监禁3年。