自住？Yes！投资？No！｜曾智华
更新时间：12:16 2025-07-22 HKT
发布时间：12:16 2025-07-22 HKT
发布时间：12:16 2025-07-22 HKT
字体大小
香港人，有两个市，日日关注——股市与楼市，好奇，就算冇货在手者，也如是，日日𥄫到实，严重的，搞到茶饭不思。
正因此，经常有老友不停问小弟：「碌Sir，呢只乜乜，𠮶只物物，如今价位究竟入得未呀？（股票）」；又或「跌咗几成啦㖞，可以买番间投资未吓？（私楼、商厦或工厦）」
点解啲人会咁多钱，成日想买呢样𠮶样嘅呢？乜唔系话香港经济好差，不少人排队破产，包括二三四五线财团及发展商，个个如今都好唔掂咩？陌生人问，我一定唔俾意见，以免衰咗就姓赖：「碌Sir都唔准嘅，乱点！」但若真系老友，尤其是退休老友或其子侄，就会给予少少分析。
世侄女买楼问意见
上周，世侄女H又来我家坐，问：「碌叔，我睇中咗间楼，想买，你可否陪我睇睇？」
「投资定自住？投资就咪搞喇，阿叔绝对唔建议你入市。目前发展商打崩头割价掟货，狂潮只刚开始，影响之下，早前建筑期落订的『苦主』，必定考虑挞订。意即新楼个市仍会大幅向下调整，你此时入市接货，好大可能一买即绑，咪嘞，尤其新界盘，简直是血肉战场，流血不止呀！」
「唔系唔系，系住开间楼不停加租，而我刚刚储咗笔钱，爸爸又肯帮少少，计过勉强供得起中型单位。睇咗半年，终于遇到一间接近理想，所以想买。落订前希望你再帮帮眼，顺便替我议价，呢样嘢我未试过，完全唔知点先可以拗到个最有利银码。」
自住不同投资
侄女非常认真要求，好，一于去睇！唔……果然正㖞。市区中心，质素好，景观靓，相当优质。如此单位，若非过去几年大量中产突然移民，肯定冇人会放。一问，果然系早前移民英国一族。
「H女，恭喜你喇，呢类货色好少放出市场㗎，若你合眼缘就买啦，唔好差三几十万价就放弃。自住不同投资，要讲住得舒唔舒服开唔开心安唔安宁㗎。呢啲感觉千金难买呀。」
究竟最后佢有冇买，未知，小弟亦唔方便再俾意见，说到底，此乃H女的人生大事也。
资深传媒人 曾智华
最Hit
