「饮」定「吐」维他奶｜曾智华
发布时间：11:39 2025-03-25 HKT
每当我在本栏分析一只股票后，身边及网上，会有四种反应：第一种是几时入及入几多最着数或赚最多呀？（冇脑！从来唔自己学分析，永远等人喂食，赚咗哈哈笑，蚀咗一于姓赖，唔关自己事？）
第四种人活在负能量最可悲
第二种是睇吓你准唔准先，结果等吓升一日，等吓又再升一日，死啦升咗咁多，好决定上船，结果错过最佳时机。（例如我3个月前建议入维他奶，呢类老友就由9元睇，睇到11元才觉得执输行头惨过败家，然后涌入。结果股价升到近13元回头，最低再跌破9元，此时揼心揼肺狂问应否止蚀跳船。）
第三种是唔贪唔惊，坚守一成出入准则。（去年11月曾见9元然后升上12元多，之后两度跌回9元以下，然后又再升近9.8元，意即呢类投资者，短短4个月已赚咗3转1成利润。）
第四种是唔买唔卖，憎人富贵厌人贫。呢类Haters最喜欢在网上留言。股市升时粒声唔出，一跌即大踩特踩揶揄贴士「屎」，纯发泄而无分析能力。
以上四类人，最可悲当然属第四类，日日活在负能量的黑暗世界，不敢用真名论理。这类人，永世冇可能成为理财高手或成功投资者，因拒绝开窍。
维他奶中长线可高过12元
上周维他奶又唔声唔声展开升浪，点解？正是两大股东开始暗斗。原大股东罗家在9元以上密密回购，消息曝光后，投资者立即跟进。而另一边明刀明枪收购的新加坡黄氏家族，也从未停手透过证券集团吸货。
究竟今次角力会维持几长，以及对股价产生几大影响。我冇水晶球，只可告诉大家，小弟9元左右买入的货，一股都未沽过，系咪早前已经走咗鸡？细眉细眼睇，当然系！但我对维他奶估计，中长线绝对在12元以上！反正唔等钱使，当交游戏费又考吓自己的眼光。
上周四电话不停响，正是文中首3类老友不停问：「维他奶好似又开车㖞，碌Sir，应该再『饮』多几公升定趁机『吐』返肚内的出嚟呀？十五十六呀！」老友，你系我点答？
资深传媒人 曾智华
相关文章：
NJZ如期赴港感动全场 Cityline却拖垮观众体验？｜梁伟聪
领展大落后 减息有助股价转角 李声扬：低位已反弹20% 相信不再寻底
