李辰安 - 不要表错七日情｜辰来之笔
发布时间：03:00 2022-08-16 HKT
睇嚟香港好快逐步正常通关，闻说香港往伦敦的经济客位机票飙升两倍有多，而且一票难求，其实，我忽然好想去英国。
今日几得闲，成个人有假日情绪，原因憧憬好快自由出入，唔使隔离，到时真系要谂下几时返乡下。「安仔，你返乡下使乜坐飞机？搭高铁都唔使啦，过咗关打的都OK，你返边度乡下，唔通学人去日本旅行？」一班老友又在中环茶楼食虾饺、烧卖，享受夏秋之间嘅闲情。补充一句，日本唔系我乡下。
日本，好难高攀啦，你知唔知日本执政自民党开会，佢哋准备打造「Luxury观光」计划，即系要重点招呼有钱人去日本旅行，原因过去几年日本旅游观光被新冠疫情打乱，业界人士食谷种度日，眼见新冠疫情有慢慢减退迹象，于是密谋食大茶饭，打开门口迎接全球富裕阶层去日本。
张翁钟情干蒸牛肉烧卖，佢话呢家茶楼有一味陈皮蒸牛肉饼，问大家有无兴趣，我心谂，食完干蒸牛肉烧卖，又食牛肉饼，你话呢？「好唔好叫多味菜远炒牛肉，咁就成Set牛肉主题。」大家无意见，我想多口话要中式牛柳，不过怕畀人闹，于是收口，并即时做出一个笑口表情，表示赞同咁解。
「其实日本上世纪八十年代已经话要做富人俱乐部，呢一个系好大之产业。」我有印象系日本管理大师大前研一讲过，乜原来佢唔系第一个人有此意见？大师兄解释︰「当时日本仲系发紧Japan as number one之大梦，这是日本经济最高峰时期，有日本学者认为，日本已经好犀利，要争取再创高峰，已经唔系在于汽车制造、电子产品，事关已经无敌吖嘛。」银行伟忽然举手发言︰「当时我未入行，但听前辈讲之前十年八年嘅日本人真系好有钱，普通经理阶层都已经系高尔夫球准职业水平，佢哋食好、住好、着好，同埋成日去打波，真系唔知乜嘢系愁。」
所以日本学者就认为不如反璞归真，将日本打造成最有品味之生态文明国家，一来国民可以过日子，同时吸引其他富裕阶层移居日本。「日本呢一招就系吸金，有钱人去日本住必然会高消费，日日浸温泉同打高尔夫球，然后食日本至贵至正之料理。」日本上世纪八十年代未爆煲前，设想自己会率先跑出一个新境界，嗱，我忽然想起星爷喺电影《龙的传人》同梁家仁讲︰「我咁后生，就已经去到人生最高的境界，跟住落嚟，除了结束自己嘅生命之外，怕且都无路可行！」
大家食点心不忘讲月饼，问大家今年有乜心水，我就话︰「都系食至传统嘅莲蓉月饼，大大只先至似过节，唔好搞到不中不西，好似食High Tea咁。」张翁话︰「日本真系怕无乜路可行，所以好介意自己旅游资源被贱卖。」点解？不如大家试下呢碟啱啱上之陈皮蒸牛肉先喇，怀旧菜呀！
上网浏览关于日本旅游新策略之新闻，原来日本主政者认为好多人去日本旅行唔系好事，要赚旅游钱不如要少数有质素之好客。日本旅游代表同官厅人员讲︰「花五十万日圆的人也好，花一亿日圆的人也好，去到日本不管在哪儿都必须一样排队。要是需要排队，大富豪就不会来。」
我都唔使张翁解释都知，大家唔好表错七日情，你以为储埋几日大假加埋公众假期，大大声同人讲︰「我返乡下玩一个礼拜，有无嘢想我帮你买？」系好威水，你知唔知，日本当地人就系怕咗你哋，花得𠮶几万，再Cheap啲，人均使费一万几千，我当你系人民币咁话，使得几多？但你搞到周围景点排队，食嘢又人山人海，就唔该香港人，你不如真系返自己乡下。
张翁同大家计数，日本人要消费成亿日圆之有钱人贵客，银行伟搭嘴︰「大概人均费五百零万港纸。」吓，你要我去日本使几百万，咁去日本买小单位投资算唔算？
表错七日情好大件事，有朝一日，大家去到日本受到冷待点好呢？你知香港人好讲公平同自由，去到先知道被人歧视，返到香港恐怕有心灵创伤后遗症。「陈皮蒸牛肉如何？」我心谂，好似系食一碟大嘅山竹牛肉，我只可以话︰「几得意噃。」讲回乡下旅行，最近好多人去英国，对于一些朋友而言，英国先至系乡下，因为有BNO嘛，英国唔使戴口罩，几自由方便，如果通关，我想去英国探老友。日本，你去啦。
