李辰安 - 点解系李奇唔系修哥？｜辰来之笔
发布时间：03:00 2022-08-09 HKT
周不时上网见到有心人上载旧相，缅怀昔日香江情，我都喜欢收藏，例如上世纪六十年代之「李奇」与「程宝珠」拍拖照。
大师兄系粤语长片影迷，见到我与大家分享咁多怀旧照，好开心又好赞成，因为能够拾回一点集体回忆，令大家更加珍惜和爱护我哋嘅香港。「辰哥，使唔使去到咁高层次，香港人人爱，因为呢度系自由港。」今日又系一身无牵挂嚟到中环小酒馆，四友相聚，听见银行伟对我之Challenge，我觉得有同大家讲几句之必要。
「伟哥，你唔知我身边有几多朋友、同学、亲戚移居或移民，大家喺香港一齐成长，忽然发现佢哋好似再无对香港有半点留恋，所以有感而发啫。」我其实想讲，好彩老友移民/移居唔使做人情，唔系就会失预算。「世侄，上世纪六十年代，李奇（罗嘉良主演电视版《难兄难弟》角色名称，其模仿对象正是上世纪六十年代小生吕奇/图右/黑白图片）同宝珠拍拖年代，有人一家大细移民，真系会摆番几围，请大家食餐饯别饭，送礼人情不可少。」
今日饮乜好？都系啤酒，清除闷气，精神呀！「𠮶阵时去美国攞绿卡好威水，一是有女嫁去美国落地，申请父母、兄弟、姊妹过去享受全世界最自由民主又有钱之生活。二是有个好叻嘅仔，可以喺美国揾到高职，入籍之后，就轮到家人啦，你话几稀有之人生快乐事。」张翁就唔会羡慕人家去美国，事关香港有大把生意等佢做，边得闲去美国住，佢老人家话斋，去美国、加拿大做乜？夜晚想食碗云吞面都无，星期日又无咁方便，饮完茶去游船河，黄昏靠岸食海鲜。
「辰哥，你话香港历年都有影迷情人，点解李奇同宝珠，硬系占到榜首席位，几十年都咁长青。」银行伟一杯啤酒灌入肚，好似同人斗快咁，做乜咁心急，赶住走？今晚大家约定食饭呀。
「啤酒梗系大啖饮啦，你估依家烛光晚餐，呷香槟咁斯文咩。」系，你啱，想起烛光晚餐，呢一个可谓香港老派电影之经典场景，不过，我醒唔起李奇有无同程小姐慢慢呷香槟。「世侄，提提你，两位戏迷情人好多时系去雍雅山房饮咖啡。」系噃，修哥同芳芳都不时去𠮶度，大家有无记忆？「系嘞，李奇同程小姐点解咁深入民心？志明同乜娇、船头尺同十三妹，点解唔够挥？」张翁以世伯身分同大家解释︰「因为李奇声线独特，人又斯文淡定，一睇就知系好人，加上有程宝珠之神奇化学作用，所以打造了这一对戏迷情人之经典。」
我慢慢一口一口的品尝呢杯大啤酒，心里想，修哥唔斯文咩？修哥亦一派正人君子，点解佢同四哥先至系天生一对之经典，而唔系同芳芳挥低李奇、宝珠嘅？唔通「李奇腔」系杀手锏。大师兄话︰「李奇系港男元祖，你睇佢两边修长之鬓发，好多人想学都学唔嚟，几有魅力呢。」一位家辉，另一位嘉良都扮过李奇，讲老实，两位都可以攞到好高分，但只能扮到喜剧版，即系摆明系聊博一粲咁，唔会得到满分。
银行伟饮完两杯大啤酒，思路依然清晰，佢问一个好问题︰「如果有人好均真想扮李奇，你估效果变成点？」张翁拍手大赞伟哥有角度︰「你以为可以百分百复刻李奇，你就变成百分百笑话，边有人可以跟得上真人版李奇呢！」对，原来讲下讲下，大家先至发觉李奇之成功在于佢真人其实好夸张，夸张到再走半步就变成惹人发笑之人物，但好一个李奇，就是在悬崖边有一线之力，把呢种气质保留在浪漫和大情人之境界，其他人点可以有李奇之天生驾驭能力？所以扮李奇一定只有喜剧版，你想复刻标准李奇，等于同自己开玩笑，同埋跟观众开玩笑。
「咁，程宝珠又点解咁衬李奇？有乜化学作用。」呢一个问题，都系交畀德高望重之张翁作答。「等我饮完杯啤酒，先至同大家分享一下个人意见。」大家于是举杯，互祝生活快乐。「其实程宝珠系好香港女性代表，佢扮女侠固然一流，但系你唔好忘记，程小姐代表作是演工厂妹，呢一个代表香港女权上升象征，又系香港人骄傲之角色，看似无光环，其实系有一个好大之光环。有此能量之好戏之人，作风又不浮夸，一拍落去如梦如幻之李奇，咪有化学作用啰。」
好啦，大家肚饿，准备食饭啦。
