李辰安 - 上海滩Vs.胡志明市｜辰来之笔
发布时间：03:00 2022-05-10 HKT
时下最热门话题，就系离开上海。爸爸我们去哪？梗系去越南啦，仲使问嘅？点解呀？坐低饮杯茶、食个包先话你知。
银行伟话上海抗疫唔系好顺利，外国投资者投诉呢样又投诉𠮶样，好多人扬言要离开上海滩。张翁见惯国际风云，真系坐低食个包先同你讲，我就好奇问大师兄︰「洋人舍上海而去，会唔会选择嚟香港，你知啦，香港始终无封城，而且好似好近西方抗疫想法，系咪？」张翁饮完杯茶，同大家上一课︰「香港无乜Concept好玩啦，全世界都会走去越南。」
原来越南抗疫成功，当地制造业出口近月大升，已经劲过深圳，就嚟成个广东省都唔够佢挥，所以离开上海，下一站系越南。大师兄话︰「如果疫情减退，最想去首选胡志明市，因为此乃东方巴黎。」乜唔系上海先至系东方巴黎咩？「安仔，胡志明市先至正宗，因为以前系法国殖民地，食个包都唔同啦，上海只不过系一个西洋大杂荟，乜都有啲，又乜都唔系。」银行伟话，佢班洋人同行朋友，早十年八年前，最兴攞几日假去胡志明市叹几日，因使费便宜，酒店又靓，法国餐味道正宗。「辰哥，𠮶阵时好多洋人都开始唔Like上海，一来物价高，二来太过虚荣，去上海度假总有一些不愉快经验。」
张翁话︰「上海人系有天生之优越感，此起香港人有过之而无不及，佢哋上年纪𠮶班人好厉害，八十、九十岁落街买棵葱都执到正一正，全部都系许文强、丁力𠮶只西装加大褛、大颈巾Feel。」系呀，上海人去做核酸检测都有人着到嘉年华会咁七彩，令人大开眼界。
「相反你睇广州人排队做核酸检测，就系非常接地气，男士多数系短裤、背心加拖鞋，身家过亿同几十亿都系同街坊一样。」大师兄，广州都曾经华洋杂处，点解我哋同上海差咁远？讲下讲下，不如叫嘢食先啦，今日不如试个生炒骨，醒下胃最实际。然后呢？「可以食个豉椒牛肉两面黄煎米粉，咁就冇咁热气。」我就提议不如凉瓜牛肉更正气，好啦好啦，不如叫几笼点心先。
张翁系广州经商世家，佢由细到大见惯世叔伯之平实作风。「我细个睇伯爷同行家战前、战时去南洋经商之照片，佢哋着得好古怪。」点古怪？「我见有位阿叔，肥肥地戴个粗黑框眼镜，佢负责去到越南订大米粮食，标准服装系着条短裤、打条呔，隆重少少就加件西装。」咦，想像下都几新潮，系嘞，当年广东商人好多都系去越南，因为当地乃鱼米之乡，战时香港要食米冇咗越南就好弊。
「广东人唔会好似上海人咁洋化，但我都唔系𠮶个年代之人，所以唔知点解，着西装加短裤主要系方便舒服，你估去颁奖礼咩。」
当年越南好多华人商贾，同内地有几多生意关系，所以好多人发大达，有钱到你唔信，点知道第二次世界大战之后，越南变天，好多有钱华侨于上世纪六十年代，抛弃所有家财，真系净得一身短裤和拖鞋，身怀十几廿両金就走难嚟香港，由万几呎别墅，屈就住旺角、深水埗之板间房，仲要系一家几口逼埋一齐。
「风水轮流转嘞，依家越南点止系鱼米之乡，已经成为第二大世界工厂，发到巴巴声，好多人话，随时可以取代中国而为之。」银行伟你真你九唔搭八，越南又点可以食得落中国咁大嘅工厂？「伟哥系银行投资界，最紧要系有Concept，有Concept就可炒得起，升到离天百丈远，大家割完韭菜，就话之你。」张翁话，越南人口有限，地方有限，资源亦相当有限，加上几十年来发展曲折，事关唔似日本、韩国有美国扶持，又无中国咁大资源同能量，所以最多都系做世界第二大工厂，如是者，亦不过系帮外资外企打工而已，想要有高科技就要等贵人帮手，但边个会做佢贵人？
「系嘞，依家入去越南帮手搞房地产就有好多人，因为越南Concept当时得令，唔使讲第一件事就系马上见到商住工业等地价齐升。」张翁话︰「边个入去帮越南建设现代工业，𠮶个先至系老友记，其他都系入嚟揾银之街外朋友。」
讲开又讲，上海滩始终系有实力，依家系电动车产业中心，洋人话撤出上海，好呀，大家越南见啦！
