专栏｜艾摩廉麾下中场与别不同

专家点睇

更新时间：07:00 2024-11-03 HKT
发布时间：07:00 2024-11-03 HKT

鲁宾艾摩廉被曼联挖角成为新主帅，要讲到佢嘅执教风格，都系控球在脚，主力运用343阵式，今季士砵亭战续彪炳，联赛入咗30球只失2球可以话相当之恐怖。

今日主要讲下佢嘅进攻系点样运作，两个中场需要有活力嘅Box to Box中场，以前有文路尔乌加迪时，就会靠晒佢扫荡，然后分畀隔篱两个中场，或者畀两翼进行好多1 on 1，左右翼卫甚至中坚都会Overlap帮手辅助。

今季佢加强中场嘅渗入，丹麦国脚摩顿胡文特，同埋阵中跟咗几季嘅巴真卡，两人分工非常清晰，前者会逗后少少主力驳脚，后者则主力进攻，打阵地战经常菢喺禁区顶准备入楔，今季都已经有3个入球3个助攻。

两个中场最大特色就系会成为掩护体，因为艾摩廉强调左右中坚拉阔用波，左右中坚、中场、同左右翼成一条斜线，传送时就会利用两个中场作幌子，实际上直接传畀前面收窄嘅左右翼同前锋进攻，再利用极快嘅传送撕破对方防线，令到禁区顶经常有5个人互相配合。尤其是巴真卡覆盖范围非常广，不止进攻，防守可以经常帮助到球队反抢，刚刚𠮶场联赛直接有4个拦截，可以见到呢队波中场嘅活力系非常重要。

由此可见艾摩廉嘅中场唔系我哋熟悉嘅派牌或分波，而喺辅助进攻球员，互相配合下，令球队变成进攻万花筒。Willhappy

↓立即下载星岛头条App↓