关智斌搞入行首个粉丝见面会 坚持逐一签名合照 与Fans「相爱相杀」:成日整我黑图

更新时间:22:15 2026-11-16 HKT
发布时间:22:15 2026-11-16 HKT

关智斌(Kenny)日前举行入行以来首个fans meeting,「正式」与一班支持多年的「朋友仔」见面。Kenny直言感觉梦幻,甚至有点不敢相信,「入行廿几年,一直都觉得自己好幸运,有班朋友仔默默喺背后支持,但从来未试过正式为自已成立一个属于我哋嘅官方粉丝团,更加未试过搞一个纯粹属于我哋嘅『成立日』聚会。」他形容站在台上看着现场众多面孔,感觉跟平时开演唱会截然不同,「演唱会系一个舞台表演,但今日好似邀请咗一班识咗好耐嘅老朋友嚟我屋企作客,距离好近、好真实。」他直言整件事很圆满,「亦都觉得自己终于帮大家建立咗一个正式嘅『屋企』。」

关智斌要fans面对面讲多谢

筹备见面会期间,Kenny最坚持一定要有「逐一合照及签名」环节,「虽然现场有几百人,工作人员都担心时间会唔会太赶、或者我会唔会好攰,但我觉得既然系第一次正式聚会,好多fans可能专登请假、甚至由外地飞过嚟支持,我唔想大家只系远距离望我一眼就走。」他希望可以跟每位fans面对面讲多谢、有眼神接触和亲手签名及合照留念,「等大家知道佢哋嘅支持我全部都收到晒。」

关智斌为fans挑选心水歌

他又透露,当日献唱的歌曲都是特别为fans挑选,「唔系平时𠮶啲首本名曲,挑选嘅歌都系分享紧我嘅心声。」提到最感动的画面,Kenny指见到很多熟口熟面的面孔,「有啲由我啱啱出道仲着紧校服开始追我,到今日已经成家立室,甚至带埋小朋友一齐嚟;亦有啲系近几年先认识我嘅新朋友,大家坐埋一齐完全冇隔膜。」他特别难忘签名时有fans对他说:「等咗廿几年,终于等到入会呢一日!」Kenny谓听到那一刻真的有点眼湿湿,「觉得原来大家真系陪住我一齐成长,呢份陪伴系用钱都买唔到。」

关智斌想搞粉丝旅行团

而与fans之间的互动,Kenny笑言相处模式一向是「相爱相杀」,「佢哋平时好钟意喺网上整我啲『黑图』或者Cap我啲奇怪表情包,成日笑我系『偶像包袱零负担』。」他续指,搞笑归搞笑,双方一直有个无形约定,「就系大家各自喺自己嘅生活同事业上面努力,我要继续保持最佳状态、做多啲好作品俾大家睇,而佢哋就要健康开心,每次见面都见到彼此变得更加好。」见面会完结后,Kenny预告只是一个开始,「既然个『屋企』已经起好,接下来当然要多啲聚头。」他透露与团队正商讨不同可能性,例如搞更贴身、纯音乐交流的小型音乐会,或一齐做义工、做运动,甚至简单的露营野餐聚会,「至于同fans去旅行就真系要好好计划吓,如果成事嘅话,我一定会负责做导游同摄影师,带大家去食好嘢同影靓相!」