刘颖旋拒为森美人工呼吸 偕余德丞伙400位医护创世界纪录
发布时间：00:15 2026-10-27 HKT
艺人刘颖旋、森美、余德丞日前出席香港急症科医学院30周年活动，伙拍近400位医护人员齐齐砌出「AED」急救图案，打破健力士世界纪录。众人亦于台上「示范」急救，余德丞表现得鸡手鸭脚，而森美「期待」刘颖旋人工呼吸，被Tiffany一口拒绝，场面搞笑！刘颖旋、森美二人老友鬼鬼，镜头背后密密倾「波经」研究篮球，但Tiffany未敢挑战对方：「我真系专注喺打波，但系我都好兴奋，因为未试过同森美大哥一齐打篮球。好耐之前我哋一齐拍节目，当时佢都会同我讲篮球，但系未试过一齐落场，所以好期待。」
刘颖旋赞陈滢叻女
呢日活动关于急救，刘颖旋表示自己拍剧时曾学习急救动作，所以略懂相关知识，亦非常庆幸可以参与活动打破世界纪录。提到近日剧集《璀璨之城》陈滢性感演出，引起网民极大回响，Tiffany亦替好友「打气」：「我觉得佢好叻！因为佢为咗呢一场戏练咗好耐，作为演员就系要呢一种专业。（咁你都ready拍呢啲戏？）呢啲戏真系好需要心理准备，同埋我觉得都系因应剧情需要。」而刘颖旋近日亦荣升老板，为自家品牌做生招牌，亦透露圈中不少好友仗义相助，不时穿上品牌服饰宣传。
森美认老
而森美表示今次担任活动司仪，未有机会参与打破世界纪录活动，台上更不时分享急救「经验」自爆年龄：「我哋呢个年纪差不多，因为最惨系我哋呢个年纪仲系精壮，唔系垂垂老矣！我哋仲精壮日日打波，即系有时你唔知道自己身体状态，有啲隐患你真系唔知道。我听得太多呢啲 case，我哋而家打波唔系队友球技好，而系因为佢识急救而拣佢，所以我觉得运动要量力而为。（拣刘颖旋打篮球因为外貌？）Tiffany 拣佢唔系因为好球技，佢真系仲要靓，咁呢个好重要嘅，女仔靓固然之系悦目，女仔打篮球𠮶个感觉优雅、转身都靓啲，所以同 Tiffany 可以打篮球就更加开心。」
余德丞学急救忘细节
年尾颁奖礼在即，暂未见「商台女员工」预先爆赛果，森美笑言未有理会预测：「叱咤903 透明度好高，只系计播放率，所以你计得啱就得，所以『女员工』又要出动，又要畀心机数，因为平时唔系我数，我净系负责播歌。」而余德丞亦未有理会颁奖礼赛果，笑指自己「冇飞」。Dickson表示曾学过急救知识，但已渐忘记细节，他表示曾与市民合力急救，如有需要定会义不容辞帮忙。
