王贤志隔空反击萧定一以讹传讹：廿年冇赌过避谈家丑最介怀竟是抖音粉丝感受

更新时间：14:00 2026-09-23 HKT
发布时间：14:00 2026-09-23 HKT

前东华三院主席、王氏港建家族太子爷王贤志（Vinci）遭胞妹王贤德力数欠下「天文数字」巨债后避走加拿大，留下一堆「苏州屎」，导致家人遭到大汉上门追债，生活大受影响。萧定一日前直播直指王贤志债台高筑全因「豪赌成瘾」，王贤王贤德其后向传媒亲口证实，不过她暂时不作其他补充。

王贤志再度直播回应萧定一指控

昨日（22日）王贤志再度在抖音直播回应萧定一的指控，他说：「呢件事我就觉得系几严重下，呢二十年，过去呢二十年，我差唔多绝迹赌场，我系冇去过，完全冇去过。」王贤志更直斥对方落井下石，对于妹妹的力数，王贤志未有多谈，只哽咽地说：「抖音其实唔系去讲自己啲唔开心嘢嘅平台，系一个娱乐大家嘅平台，影响咗你嘅情绪，所以喺度我都好唔好意思。」

相关阅读：王贤志开直播认错避谈赌到债台高筑自爆于加国送外卖维生靠一招攞更多贴士

王贤志称过去二十年几乎绝迹赌场

王贤志在抖音直播上表示不希望浪费大众传媒资源去讲家事：「成件事都牵涉好多唔同嘅持份者啦，唔同嘅party，我觉得呢个等我同佢哋面对面去倾、去讲，会更加适合。当然，我觉得有啲嘢可能都未必系全对，但我唔想逐一逐一去做个反驳。但寻晚又有另一个新闻出现咗，就系关于萧定一先生，唔知你有冇睇到。就佢出咗一条片，就话佢嘅朋友话畀佢听，就我今次欠债咁多呢，最主要原因系因为我烂赌，我系一个好钟意赌钱嘅人，佢都绘影绘声，讲到𠮶个人系佢同我都好熟嘅朋友啦。呢件事我就觉得系几严重下。如果赌钱，我嘅理解就真系可能，入去赌场啦，譬如澳门啊，或者上赌船啊，甚至乎入马场，真系可能系坐低一张台度赌钱，先至叫做赌钱。咁基本上我以前曾经系有好细个，我谂啱啱出道嘅时候，我有试过去澳门去娱乐，咁当时我都有输过钱，但系好多年前嘅事啦。呢二十年，过去呢二十年，我差唔多绝迹赌场，我系冇去过，完全冇去过。」

王贤志最介怀竟是抖音粉丝的感受

王贤志续说：「所以佢咁样讲，我觉得好奇怪，因为佢讲到系好真，𠮶个人系好可信。我就觉得莫名其妙，点解会咁样讲，而且仲话我身边嘅人都一样系咁样做，我觉得呢种以讹传讹就真系唔系太适合啦，因为佢都冇求证。」面对四方八面的负评，胞妹将家丑外传，王贤志最介怀的竟是抖音粉丝的感受：「其实好难喺呢个时间喺度开抖音，好难。因为抖音其实唔系去讲自己啲唔开心嘢嘅平台，系一个娱乐大家嘅平台。即系，希望你一朝起身睇到我系好开心，开始你新一日嘅工作，而唔系去听我讲啲嘢，影响咗你嘅情绪。咁所以喺度我都好唔好意思。」王贤志一度哽咽，需饮水平复心情：「多谢大家，今日其实都有好多朋友入咗嚟，差唔多四百人。我净系一路挂住讲自己嘅嘢，我系冇同大家打招呼，唔好意思，唔好意思。我谂我唔再讲多次喇，有啲人话：『究竟我讲啲咩呢？』我冇可能每分每秒不停咁再讲住同一件事，咁我觉得人系要向前行嘅。」

王贤志称破产的真正原因不简单

对于家人的数落，王贤志未有多谈，只哽咽地说：「其实屋企人仲有好多，唔系剩系我个妹，我觉得唔多唔少令佢哋有影响，令佢哋有好多烦恼同好多不便，令佢哋有好多情绪。我而家唔喺佢哋身边，冇办法照顾到佢哋，我觉得好难受，系非常之难受。所以我个人好乱唔知可以点，希望同大家分享，有你哋支持继续行落路去。」至于破产的真正原因，王贤志只说：「成件事唔系咁简单，当然有自己投资失败、理财不善，或者自以为是，去做好多严重嘅决定，去到后尾可能要欠债，再行到破产呢条路。其实系一个好漫长嘅路，亦发生好多事，牵涉嘅人亦唔少，唔系三言两语讲到。但已系过去嘅事，因为我真系一个破产人士，希望努力工作揾更多啲钱，起码还返俾部份债权人，还得几多得几多。」萧定一日前直播直指王贤志债台高筑全因「豪赌成瘾」，声称从双方共同好友口中得知，「我侧闻佢都几烂赌，另一半都同佢好似。」他更透露王贤志的巨债金额高达以亿元计。据知，王贤志已故的母亲在生时对他一直「帮得就帮」试图拯救，惟其父亲早已看清残酷现实，深知其债务是无底深潭，拒绝再为他填数。