姚正菁首谈初恋浪漫 激罕揭郭富城分手真相复出遭前辈「白鸽眼」丨独家
发布时间：07:00 2026-08-14 HKT
被标签为「郭富城初恋女友」的姚正菁复出娱乐圈，她接受《星岛头条》专访时激罕剖白与郭富城的初恋点滴，澄清分手非因对方走红，自己亦非出轨一方，更直指今日对贵为天王的郭富城已「零感觉」。同时自爆重返娱圈，出席饭局时曾遭前辈无礼白眼。 采访：方骞平 摄影：朱伟彦 场地：1881
57岁姚正菁时隔30多年，获新世界娱乐老板Sam哥赏识，因缘际会签约复出，加上好有正能量的经理人林宝玉协力，令她重燃冲劲。回忆25岁退出时，觉得是结婚生子的时候，因而突变「失踪人口」，但现阶段还未算「上岸」：「唔会全部为钱，为钱就会冇咗个heart，我又唔大使，经济OK㗎。」对于网民质问「57岁仲出嚟做咩？」姚正菁霸气回应：「咪出嚟做自己钟意做嘅嘢啰！50到60岁都系一个阶段，点解唔可以再出嚟？唔通退休等老咩？我心态好，仲有份纯真。」重出江湖她仍有抱负，期望唱歌、直播同短剧都会有发展。
姚正菁去年告别异地恋回复单身：「我仲有市场㗎，同年龄拍埋一齐唔输蚀。」追问拣偶条件要不要以初恋情人郭富城为蓝本？她强调冇特定标准：「太『鲜肉』对象唔得，最多下限细10年，主播前度同我都有年龄差别。」
姚正菁初恋只系爱情小说
对于被标签「郭富城初恋女友」，姚正菁因而被网民闹「抽水」：「佢哋话『我有一班铁粉，唔使消费城城』，我亲回『人哋提起我唔避忌回应啫。』」姚正菁又罕谈和城城的绝密初恋片段：「因为当年佢系舞者，我系选美，成日一齐玩，啱key咪拍拖。正因相识于微时，大家会简单一啲，所以一齐好纯真，加上两个人工又唔系好高，会悭住使，可能一碗云吞面两份食，我哋会选择唔坐车拍拖行返去。」问到初恋是否最难忘？她竟答：「呢啲只系爱情小说，我话你知，我嘅初恋系最容易忘记嘅，因为隔得太耐，中间经历过咁多样嘢，你仲点会去留恋细细个时拍拖嘅嘢呢？如果佢唔系呢一行嘅人，我可能都唔会记得喇。」
至于分手真相，是否城城在台湾当红上位后成为两人分开导火线？姚正菁含糊道：「冇话边个飞边个，记得佢台湾拍完广告后返港变咗大忙人，但当时拍拖系要揾个男朋友，系想有人陪我玩，睇戏、行街呀，而唔系要佢有几威嘛，对方忙到根本冇时间，咁咪自然会分开啰，正如而家流行，成年人最好嘅分开方法，唔使讲再见，大家唔联系就系叫默认分开，当年也如是。（有冇后悔失咗个天王男友？）唔会啰，我之后经历嘅嘢畀咗我咁多人生经验。」
姚正菁对郭富城冇爱冇恨
另一个多年误解，指她分手后受刺激而拍三级片，姚正菁首度开腔澄清：「根本唔关事，唔合逻辑！当年风气流行拍三级片，受刺激嘅话最多去嫁人。」她又否认想借此拉近同城城事业距离：「我冇𠮶种斗心，你红你嘅事，我做自己嘢。」提到城城曾暗示前女友出轨，她认真道：「我听过呢个讲法，但佢冇指名道姓，况且唔系我，我一脚搭几船应付唔到，好费神，我系专一嘅人。」讲到今日对城城感觉？她犹豫一下：「我唔会憎呢个人，冇爱冇恨，坦白讲而家睇返佢啲嘢完全冇感觉，上次朋友有飞睇佢澳门骚，睇咗一半跟朋友走咗，我好似一般观众咁好casual睇骚，唯一认同佢喺舞台上面依然发光。」
姚正菁被前辈「白鸽眼」
说到被TVB捧6年，可有遇过职场欺凌？姚正菁庆幸未试过，但爆同期训练班有位女学员中过招：「佢拍戏化完妆，被当红姐仔指骂『你系做侍应咋，个妆咁浓做咩？』喝令佢落妆，其实只系正常化妆。」反而今次复出后，她亲身经历一单奇事：「饭局内同台食饭，有个坐我隔两个座位嘅前辈艺人『白鸽眼』睇唔起我，嫌我唔系要巴结嘅金主。明明见碟餸转到过嚟，佢多次刻意反方向转走佢，心谂『举动咁得意嘅！』其实我当时好想出声，因为呢啲系基本餐桌礼仪，但忍咗。」姚正菁不觉这件事是复出小打击：「我只系奇怪『乜而家呢行咁难捞咩？』」她慨叹时下的人太现实，相比当年拍戏辛苦到晕要送院，同剧郭峰等演员会探病，好有人情味。
