42岁曾偷食男星受单亲妈启发 誓改善家人关系：嬲只系太得闲 曾传婚变同老婆分房瞓一年
发布时间：23:00 2025-08-25 HKT
吴浩康（Deep）曾因出轨及藏毒被观众唾弃，跟老婆郭思琳亦曾传出婚变并分房瞓一年，将本来前途无限歌唱事业亲手摧毁，演艺梦碎的吴浩康与郭思琳结婚后决心改过，转行做地盘搭架工人，为养家日晒雨淋亦全无怨言，结果在去年年底荣升棚架工程公司老板，成功洗底并被网民称为「真汉子」。
「真汉子」吴浩康事业逐渐有起色
「真汉子」吴浩康的歌唱事业逐渐有起色，除了曾举行音乐会外，早前以歌手身份到非洲乌干达五天进行探访，对于近年得到大家的欣赏与嘉许，吴浩康坦言受之有愧：「我只系个普通中年男人，一班地铁有好多𠮶种，嘉许我，我好多谢、好开心，但其实有太多人同我一样，甚至做得比我更好。」
相关阅读：吴浩康教会见证分享 以为「一世都冇尊重」永不翻身 老婆终欣赏自己：成个世界唔同咗
吴浩康受为单亲妈妈Rose故事启发
吴浩康早前与音乐人兼好兄弟陈思捷（Cedric）随宣明会到非洲乌干达五天探访交流，期间因为单亲妈妈Rose照顾寄养小朋友的故事，令吴浩康有所启发并重新思考与家人的关系：「一个女性带住十个小朋友，四个系亲生，其他系亲戚同寄养，当中更有三个存有残障嘅问题。我谂唔少都市人都经历过婚姻问题，已经好困扰、好伤，Rose结婚之后，因自己嘅国家有动荡，要走难、面对生死，谂住去新嘅地方开始新生活，又因为生咗有残疾嘅细路仔，老公好嫌弃佢，觉得佢有罪，于是离开佢。但系佢冇嫌弃其他人，自己都未喂得饱，仲要喂10个细路仔，𠮶个爱好大。」 吴浩康续说：「见到佢哋走难，啲大人带住十几个细路，有啲系侄仔、外甥，或者阿嫂跟住大哥一齐走，我都会反省，系咪真系要到咁危急，先可以放低自己嘅想法，同屋企人相处？有危难嘅时候，可能最会帮你嘅，就系平日同你闹交𠮶个兄弟姊妹，如果系咁，喺平安嘅时候，又何必太挑剔对方？有时嬲，系因为我哋太得闲，真系会咁，不如多啲包容。」
吴浩康不想标签拒评价自己
吴浩康有感而发地说：「佢哋做错啲咩？佢哋做啱晒都冇用，冇得拣几时、点样发生，就系发生咗。 我对自己想做嘅嘢，其实冇咩信心同把握，系一股傻劲去做，做到有成果为止，喺我个世界一直冇舒适圈呢回事，因为做咩都唔舒服，行𠮶阵都会怀疑自己。佢哋畀我好大力量，『希望』系同环境冇关， 『希望』系关自己个心事，唔系要有证据先有希望，系有希望先会发现曙光。」吴浩康被问当下会如何评价自己？他坦言不想标签自己：「任何好坏都只系局限自己，总之当刻对我有意义嘅事就去做，就算未必做到心里面想嘅，会唔会唔开心？唔会，因为我知道始终有日会做到。」 他又指近年得到大家的欣赏与嘉许，其实是受之有愧：「我只系个普通中年男人，一班地铁有好多𠮶种，嘉许我，我好多谢、好开心。但系实在有太多人同我一样，甚至做得比我更好。我个仔今年九月先三岁，好多人已经养到仔女长大成人，𠮶啲系咪更值得欣赏？大家用睇我嘅角度睇吓你老公，就会发现佢比呢个所谓真汉子做得多十倍，但系讲（表达欣赏）少一百倍。」
相关阅读：吴浩康做地盘工一年公布好消息！荣升搭架公司老板 与「棚架界林峰」拍住上
