MC张天赋 人生最好筹码「唔怕输」预告明年红馆开骚丨名人杂志

现年28岁的张天赋（MC）出道短短4年，火速爆红，至今产量极高更一直密密出碟，早前他推出全新个人大碟《Sweet & Sour》，8月19日更假旺角麦花臣场馆举行《A sweet & sour night》的新碟发布音乐会。MC日前接受《名人杂志》访问，除逐一解构新碟歌曲，更搞笑自爆曾以为激嬲同属华纳唱片的汤令山 ，并大派福利剧透明年红馆开骚，各位乐迷又要准备扑飞了！撰文：娱乐组 摄影：谭志光

「咕噜肉」比喻新碟概念

新专辑收录MC 10首作品，当中有多首大热歌曲包括《小心碰头》、《说谎者》、及《怀疑人生》等等，更收录了国语新歌《目击者》、《狼狈》及首次推出英文新歌《Ain't No Foo》及《I'm okay》。一向为食的MC以「咕噜肉」这道菜肴来比喻新碟的主题概念，他表示因为这张碟中西合璧，英伦风及中国风兼备，带点优雅同时又有点「哋」，雅俗共赏，加上这道菜式在高级酒店或者大排档都会食到，所以他觉得咕噜肉非常切合这个专辑的概念。

人生最好筹码是「冇筹码」

问到吃过最好食的咕噜肉？MC笑言自己对食物要求并不高，只觉得有多啲菠萝就可以，因为他喜欢吃菠萝。而MC在这张专辑亦有参与创作部分，他表示要在个人特色及大众口味取得平衡并非易事，「音乐无分高低，任何种类嘅歌都可以成为流行曲，但最难系当我唱一啲大众未必钟意嘅曲风，必须要中间攞个平衡，加返大家会喜欢嘅元素。」其中新歌《百万大道》讲述以青春去作筹码，MC认为人生最好嘅筹码就是没有筹码，「因为你冇嘢要怕输，同我音乐路上系几相似，我一路盲冲冲冇理后果，可能畀我嚟多次的话，未必系同样嘅结果。」

《记忆棉》的Daddy

至于歌曲《目击者》，MC透露这首歌原本作曲人打算留来给自己用，「听完demo之后，我极力要求公司同事，你求佢畀我啦，因为我真系好喜欢呢首歌，亦都好喜欢呢份词。」他续笑言：「我会形容呢首歌为《记忆棉》嘅daddy，因为当初呢首歌我哋攞唔到返嚟，于是公司同事畀咗呢首歌徐浩做reference，叫徐浩写一首类似嘅歌，所以先出现咗《记忆棉》。」

当年MC凭着《记忆棉》一曲火速爆红，他忆起录制过程，坦言这首歌是他入行以来最难唱的歌曲，「一来佢有两次升Key位，真音假音咩都用晒，呢个亦都系我同徐浩录音录得最多session嘅一首歌 ，好似佢唔走音已经系一个好困难嘅地方。」他更认为很多时录音studio的版本未必是最好，但必定是最稳阵的版本，若要有火花只能在live show才会出现。

初尝填词感困难

MC首次推出英文新歌《Ain't No Foo》及《I'm okay》，原来《I'm okay》是由MC亲自操刀作曲填词，他自爆是在录音室边录音边写，「其实作嘅过程非常之快，大概5分钟已经写完，但系填词因为我文采唔系非常好，有好多字句需要郁动我都唔系好识，于是喺录音室搞咗几个钟，大家倾吓用词应该要表达咩意思，跟住先录。」首次亲自包办曲词， MC形容为小试牛刀：「其实填词真系好难，觉得好有限制，我未能够做到将佢浓缩成为一个我想讲嘅故事，今次叫做小试牛刀，英文词我觉得已经相对容易，所以如果要填广东话或者国语嘅词，我需要一位老师带住我。」
  
他续指《I'm okay》是属band仔歌，最初稿更有粗口成分，后来他以电影一个小丑角色的角度去填词，他笑言总算表达到意思，但认为未够好。原来私下的MC都有小丑的阴暗面：「每个人都有阴暗面，阴暗面系用来平衡bright side，人冇可能剩系得bright side，所以必须要容许自己有呢啲情绪，释放负能量，而喺过程之中，你要承认或改变自己。」

自认会讲善意大话

提到《说谎者》主要讲及欺骗当下的感情，MC更大方承认自己会讲大话：「一定有，其实我觉得感情、爱情或日常生活中，大话系不可缺少，而我自己就好少讲恶意嘅谎言，恶意嘅谎言都只系用嚟呃自己。（接唔接受到别人善意嘅谎言？）我唔得㗎！我宁愿坦白咁讲，我会唔开心一场，都好过我知道畀人呃咗，呢个唔开心会维持好耐。」

误以为激嬲汤令山

歌曲《一百个未老先衰的方法》就请来乐坛新贵汤令山操刀作曲，虽然二人并非第一次合作，但亦有不少火花，MC更自爆曾经以为自己激嬲汤令山，「汤令山本身系一个好cool嘅人，甚至之前喺公司，我一度怀疑佢系嬲咗我，后来知道纯粹因为佢嘅沟通方式比较唔同。有次我真系专登走过去问佢，『你系咪嬲咗我？』佢话唔系啊，冇！」他更大赞汤令山非常有音乐才华及独特想法，并预告跟对方会有其他合作。

重启密集式工作表

最近，MC重启密集式的工作时间表，他表示：「嚟紧几个月都好忙，因为每个月都有唔同嘅show，但反而开心，𠮶强度我觉得尚算应付得到，同埋我觉得系一个渠道，提醒自己要身形管理一下，依家开始咗，我好有信心可以做到嘅。」并坦言早前8月19日举行的新碟发布音乐会是一个好好的经验，反应好好，难有机会将所有歌都Live唱一次给观众听，又坦言好耐未在香港开演唱会，今次是很好的见面机会。最后，MC来个大剧透，预告明年会在香港开演唱会：「下年我估，好大机会喺香港开show……我估会系喺开过嘅场馆！」估计MC所指的正是红馆。