陈凯咏自爆系「麻烦友」唔听前辈劝告 红馆开骚似意外怀孕既惊且喜 丨独家
发布时间：07:00 2025-08-14 HKT
独立歌手陈凯咏（Jace）推出全新跳唱歌曲《SWITCH》，MV中呈现现代年轻人，以多重身份穿梭生活状态，故尾段加插特技场面，JACE的头竟如蛇般诡异延伸，隐喻现实中的她，如「贪食蛇」会贪心地将好多嘢塞入一首歌内，她更自嘲是麻烦艺人：「简单嘅嘢刺激唔到我！老细见到都唔会签我呢种艺人啦。」采访：方骞平 场地：丽晶酒店
除MV特技外，今次歌曲音乐变化多端，形成声线由温柔变撕裂，就连5个造型全部都不同：「所以有啲攞苦嚟辛，但我冇办法简单就算，预咗血流成河打仗。」Jace坦言，独立制作代价高昂，加上她贪心做法，每首歌最少开支逾6位数，每日睁开眼，有工作就是有成本：「比如排舞要几多个钟？间房要几大？MV要拍几耐？海量单据真系滴汗！」
她自爆，这种执著屡遭业界前辈劝阻及泼冷水：「唱片监制冯翰铭（Alex Fung）直言『唱下情歌咪算啰！』甚至多位唱片公司高巨层好言相劝『做唱片好贵唔值得。』」面对现实考量，Jace一度陷入现实挣扎：「我只系个女人仔，并冇金主冇底。仲有有几多个6位数可冲呢？有时真系唔敢冲得太远。」思前相后，却坚持亲身试炼：「我唔系HEA做歌手，系有宏愿想试！暂时顶得住就试住先。」语毕，亦不禁苦笑：「下年你(记者)再问，可能到时我已叠埋心水唱返情歌，唔搞咁多嘢呢！」成为独立歌手近两年，收支平衡的Jace形容自己于钢索上前行，经营如履薄冰：「如果要蚀钱就做唔落去，因为冇人贴我嘛！但赚到唔系稳袋，可能下一舖使晒，仲要留嚟筹备专辑同演唱会⋯⋯」
最惊佗唔稳红馆BB
提及明年初意外获批的红馆个唱，她以「意外怀孕」妙喻：「当初抱住尝试心态入纸申请场馆，申请过多次，不停入完又弹，弹完又入，最后竟然得咗，以我年资算系快申请得到，落实后惊到尖叫，反问『哎呀！死啦我系咪ready呢？呢啲都系我问自己嘅问题。』突然『有咗』个红馆B！我够唔够钱养大佢？讲真，压力源自多方顾虑，包括观众消费意欲低迷，大家宁愿畀钱睇GD、lady gaga，点解要睇Jace呢？而且男歌手更受市场青睐、跳舞女歌手成本更高⋯⋯」除此之外状态都是问题：「咁短时间我嘅健康、情绪状态顶唔顶得住佗稳呢个B？」她更将今年《Chill Club》失误令她添上危机感：「每次做得唔好就要谂点调整，独立歌手冇失手空间！呢次小失误提示我『呢个世代变得咁快，我再得唔到大家欣赏嘅目光好快会冇。』」至于好友周殷廷的率直亦成为警钟：「佢直话直说，提示『你净系出自己钟意嘅歌，下次冇人听点算？』我好需要有人直接提醒，其实我都经已调节咗，只不过死唔信邪想试多舖先。」
父母成为最大后盾
面对种种难题，Jace庆幸父母成为最大后盾：「佢哋冇畀过任何压力我，包括事业及感情上，反而会畀空间让她做喜欢嘅事，最记得喺雪藏时最失意期间，爸爸如军师般跟我分析局势，畀我『疑人勿用』生意哲学；喺厨房入面嘅妈妈就鼓励我『其实做人好简单，最紧要开心，唔好谂咁多，你已经好叻㗎啦』我哋一家三口健康快乐成长，成为我工作最大推动力。」
