谢霆锋为杭州巡场狂烧钱：服咗自己 致敬《锋味》巨星好友 爆头5年被当黐线
发布时间：15:45 2025-08-11 HKT
谢霆锋《Evolution Nic Live进化演唱会》内地巡回首站日于杭州奥体中心体育场（绰号「大莲花」）举行，近五万个座位全场爆满。舞台似是香港原装搬到杭州，霆锋指「错晒」，「呢个舞台同香港嘅系两个舞台，今次为大莲花重新做咗一个进化舞台，我都服咗自己！」
最大挑战是天气因素
霆锋解释，香港站是室内show，所有机关包括悬浮波、拱门及地面轨道等当初完全没有考虑落雨打风问题，「所以好多装置都有改动，今次就等于系一个完全新嘅舞台，我都觉得自己有啲过份！」「大莲花」场馆是露天设计，如果遇上落雨，霆锋豁出去话自己湿身无所谓，但乐手、乐器唔淋得，「所以我哋做咗个新嘅顶篷，但成块黑色又好难睇，结果又加多几百盏灯！」香港站破纪录用了二千二百盏灯，这次杭州站再加码，他尴尬表示：「而家加到我都⋯⋯ 我唔想睇呢个budget啦。」霆锋透露过去半年狂搞工程，「由机械承重到轨道防风雨，全部重新计过！」问到这个巡回最大挑战，霆锋望望个天，「天气，大自然因素。」
锋迷应援认真揼本
除了舞台烧钱，锋迷应援都癫到尽。有粉丝包起杭州地铁「应援墙」及月台幕墙，墙身不仅印上霆锋型仔相，又将他的经典歌名及歌词印上，不过最癫的是有fans租用直升机于钱塘江上空播歌兼拉横额，成个杭州抬头都见到，认真揼本。
每次看《锋味》忍不住落泪
除了舞台同应援劲到爆，演唱会上还有劲感人环节，当晚播出霆锋13年来主理的《锋味》精彩片段，张曼玉、杨紫琼、甄子丹、周杰伦、陈奕迅、萧敬腾、吴彦祖、舒淇、蔡依林、Twins等巨星轮流「登场」。片段播完后，霆锋向荧幕鞠躬致敬，「我每次转身睇片都差啲忍唔住（喊）。过去12年，由2013年开始，有咁多厉害嘅朋友陪住我，造就咗呢条片。我谂再过100年都好难再聚齐咁多人，真系好多谢你哋！」霆锋又谓：「我用咗13年制作呢个作品，一睇到个画面就想喊！头5年个个话我黐咗线：『做乜走去煮饭？做乜拍啲咁嘅嘢？做乜去旅游？』而家就俾你睇吓我做啲乜嘢。」霆锋指每次讲起都会起鸡皮。网民亦洗版讨论：「霆锋请到咁多巨星，真系圈中人缘王！」
