陈慧娴杭州骚获容祖儿任嘉宾二人互笠高帽：有一姐气质

更新时间：17:15 2025-07-15 HKT
发布时间：17:15 2025-07-15 HKT

陈慧娴《The Fabulous 40演唱会》巡回到杭州站，这站请来容祖儿担任嘉宾。二人合唱完《跳舞街》后，慧娴即爆料，「我第一次『见』祖儿系喺尖沙咀街头嘅唱片海报，一睇我就觉得（祖儿插嘴：好丑样啊！）唔系！呢个女仔一定红！第二次见佢就系喺一个颁奖典礼嘅庆功宴，佢拎奖！而且佢爆红啦！」祖儿好奇问到：「点解你睇到呢张海报会觉得我有机会呢？」慧娴坦言是气质，祖儿立即追问：「系点样㗎？」慧娴神回：「唔需要太靓，但系需要有一姐嘅气质，我一睇你就有呢个气质。」

赞Joey为声色艺俱全

不过祖儿「不太认同」并说：「对我嚟讲你就系好靓，你当时都系爆红。细个时候见到你，你嘅形象、衣着，都系当时广东乐坛嘅指标，你嘅音乐就系全方位嘅一个声色艺俱全嘅歌手。今日可以企喺你舞台上面做你嘅嘉宾，我非常荣幸，多谢你。」慧娴补飞说：「我系话你越大越靓！作为一个歌手，最重要系气质。靓女大把，但有气质嘅女仔唔多，你同我都有，哈哈！对我嚟讲，容祖儿永远都系英皇嘅一姐！」听到慧娴这样说，祖儿即刻吓到耍手拧头：「你嚟咗我唔系呀，吓死我啦！」笑爆全场。

加入小短剧增添新意

慧娴直言十分喜欢祖儿，二人早于2014年慧娴三十周年演唱会已合作过，祖儿指当年受到邀请时立即「𦧲饭应」，亦十分感谢一直以来慧娴对她照顾有加，每次的演出，慧娴都会发讯息给她鼓励，「佢会话：『你做得好好。』对于一个歌手嚟讲，能够收到一个尊敬前辈嘅认可，对我嚟讲系非常有意义。」此外，由今站杭州站开始，演唱会加入洪助升（Aiden）及梁壁荧演出小短剧，为巡演增添新意。之前两站分别有关智斌同阿娇任嘉宾撑场，网民大赞：「嘉宾阵容睇得出慧娴圈中人缘劲好！」

↓立即下载星岛头条App↓