陈蕾自嘲爱认叻输唔起 新歌剖白脆弱 拒揾前度诉苦丨名人杂志

陈蕾最近推出新歌《求救的勇气》，灵感来自于自身经验，讲述向别人求救是一件需要勇气的事，而新歌找来前度Mike Orange合作，是二人分手两年后再度携手，陈蕾透露二人「再见亦是朋友」，她更用了三个负面的词语来形容自己「认叻、输唔起、发烂渣」。文：娱乐组 图：朱伟彦 

陈蕾透露新歌的契机来自一位移民了的好友，原来对方早前一直受情绪困扰，但却要精挑细选一个合适的时机才跟她说：「佢觉得人生冇晒意义，唔知点解要活着，听到个吓我好惊讶，因为觉得我同佢相隔咁远，又唔系同一个生活圈子，以为佢同我讲佢嘅情绪应该会易啲开口，后期发觉佢因为觉得我工作好忙，怕打扰到我，令我发现原来咁熟嘅朋友，都要选择一个求救嘅时机，甚至系求救嘅勇气，令到我有呢个启发想写首咁样嘅歌。」

一直被封「乐坛社工」，究竟陈蕾是否一位好的安慰者？她直言希望可以好好陪伴身边的朋友，虽然自己属「报喜不报忧」型，但如果必要的时候，亦拥有求救的勇气：「我发现我有呢个勇气，要多谢身边嘅朋友，佢哋令我觉得我有足够安全感，信任度，令我够胆同佢哋分享我嘅脆弱，难过失落，同时提醒自己，希望可以成为一个好嘅聆听者。」陈蕾自爆小时候事事都揾朋友诉苦，现在却偏向自己先处理后再找朋友分享。

同前度「再见亦是朋友」

陈蕾与前度Mike Orange 分手两年后首次合作新歌，她自言感觉有趣，「可能系沟通上，会唔会有啲嘢系唔够胆去表达呢？呢首歌系好好嘅尝试。而嚟紧希望陆续同更多唔同嘅人合作，但要视乎歌曲适唔适合，当然Mike系一个好好嘅选择，唔排除继续会有合作。」问到她与Mike Orange 是否「再见亦是朋友」，不开心时会否找对方倾诉？陈蕾大方透露：「可能初头都会多啲，我哋以前嘅沟通系好紧密，分开咗好一段时间，确实身份上就算自己有需要揾朋友倾诉，都唔应该第一个要谂起佢，当然我唔系觉得佢冇拆解我烦恼嘅能力，系要尊重返𠵱家嘅关系。」

耍手拧头拒做演员

谈到在新歌MV中，陈蕾喊得到位，问到会否考虑做演员？她即耍手拧头表示：「我发觉好攰，𠮶日嗌cut 真系松一口气，全日好压抑情绪，唔俾自己开心，平时我做嘢系周围撩人倾偈，但拍MV𠮶日就系唔讲得，break都冇人够胆嚟同我讲嘢，因为惊打扰到我情绪，同埋我系即使要向人诉苦，都会加入好多自嘲，唔钟意成个环境太悲伤，钟意欢笑多啲，所以呢个MV对于我嚟讲系，希望净系得一次。」

揾彭秀慧帮手催泪

新歌MV找来彭秀慧担任导演，原来陈蕾是对方的学生，2017年曾报读彭秀慧老师的演技班，当知道MV要挑战喊戏，陈蕾担心自己没有能力去喊，所以找来彭秀慧帮手：「事前专登约佢食饭交流，去到拍摄当日我听到彭秀慧老师分享咗佢自己一个故事，系好感动，我真系喊，佢都有喊，我即刻自责『陈蕾你好残忍』，因为你喊唔出，搞到彭秀慧要将自己嘅难过再讲一次。」她更谓喊不出来，不是没有难过的事，而是她懂得怎样梳理自己的情绪，当遇到失落时，陈蕾会什么都不做，躺平在家的沙发上疯狂打机去调整心态，等待两三天后再有动力就move on。

创造力最强一年

今年初，陈蕾夸下海口可以出20首歌，她坦言进度良好，总算是讲得出做得到，而向来热爱打机的她笑言最近出新game，都非常有节制：「连续打咗三日啫，跟住真系冇打，因为呢排好多嘢想写，我新创作仓库里面真系有20首歌，有啲写俾人，加上我今年目标系想出一只碟，今年可能系我产量最高、创造力最强嘅一年，个量多到系我已经谂埋下下一只碟想讲咩。」她笑言想借此让公司知道她不只是在打机的。

「牛奶」竟是童年阴影

陈蕾出道以来向来行「cool爆型格」路线，但私下其实率真幽默，如果要她用三个词语来形容自己，她笑言是「认叻、输唔起、发烂渣」，并谓：「打机方面最钟意未玩过嘅嘢认叻先，所以我啲朋友好钟意睇我输，俾啲挫败感我呢个咁认叻嘅人。」提到人生最怕的事，陈蕾续自爆鲜为人知的秘密，原来她最惊「牛奶」：「系童年阴影，我系惊牛奶，可能掂到只手都唔得，要疯狂洗手，闻到牛奶会想反胃。细个我好钟意饮牛奶，饮到四岁都戒唔到奶粉，日日都疯狂咁饮，可能饮得太多，饮到有次呕出嚟，个种牛奶味从此我就物极必反，惊咗所有关于牛奶嘅嘢，包括豆浆，杏仁糊都唔得，望落觉得好似牛奶，但明明佢唔系牛奶味，我都觉得好惊。」

旅行都有热血经历

回顾人生最热血的一件事，陈蕾表示除了来香港参加比赛，她表示最近与小尘埃及岑宁儿去大阪旅行，当时计程车在心斋桥塞车，便听到附近有人busking玩jazz，她们原本打算去打街机，结果车一到目的地，四人没说甚么就一起跑回去听那场演出，而平日不爱跑步的她，为了一场街头音乐而奔跑，这样的画面觉得非常热血。

与歌迷「互相扶持」

陈蕾以往的生活都非常悭俭，问到依家赚到钱消费模式有否改变？ 她笑言朋友说她依然悭俭，更自爆最爱悭隧道钱，为了避开某条隧道，宁愿兜路多15分钟行另一条路，而现在的她，最舍得花费在饮食和旅行住宿，特别是看演唱会，会买最贵的票价，希望得到最好的体验。至于与歌迷的关系，她直言是「互相扶持」：「佢哋多谢我嘅音乐陪伴佢地，但其实系我多谢佢哋听我嘅歌先啱。歌迷成日都会写信俾我，我都鼓励佢地唔好送礼物，因为屋企冇位放，加上若果我在人生低潮时，可以拎返呢啲手写信出嚟，俾返一啲鼓励我。」

Hair : Cliff @ Myos @moys_cliffchan
make up : Tammy Au @tammyau_makeup