叶子楣豪搞生日派对：做番自己最开心 获圈中好友胡枫、连炎辉热闹贺寿
发布时间：22:45 2025-06-11 HKT
叶子楣（Amy）日前举行「华丽相聚之夜」生日派对，宴请一众好友包括胡枫（修哥）、陈欣健、黄玉郎伉俪、乐易玲、马来西亚酒店拍档Evians、Daisy Yeung、麦当杰、舒雅颂、谭倩红、文隽、夏文汐、周美凤、邓英敏、黄锦燊、连炎辉、佘妈、古妈、冬婶、詹瑞文、文雪儿等到场贺寿。
叶子楣遇重重挑战 更珍惜人生
宴会开始前，屏幕先播放Amy由孩童时代至今的照片视频，及后陈欣健上台介绍Amy出场，并搞笑以「大」字形容Amy，解释其实是为人大方、大情大圣，生活与职业都大起大落，并提到Amy当年虽然成功，但突然为一个深爱的男人而大胆放弃一切，洗尽铅华，放弃咗佢嘅名、利和社交活动，随后经历上天的折磨，夺去她心爱的男人，但这些挫折仍未将她打低，令她更加珍惜人生。
台上多谢亲家姐
一身性感打扮的Amy现身台上，她表示：「有人问我今年点解搞个咁大型嘅生日会？其实真系冇咩特别原因，只系希望大家开心，一班好好嘅朋友系度食饭同相聚，我就已经好满足同好感恩，多谢你哋嘅光临……今晚实在太多嘉宾，我唔逐个去介绍，不过首先要多谢修哥，因为佢94岁都嚟参加我嘅Party，佢系我最尊敬嘅前辈！第二个要多谢嘅系Alan连炎辉先生，佢做好多善事，同埋佢成日包场请大家睇戏，支持香港电影，我知道明年2026年系马年，电影就会兴旺，所以大家唔使担心；都要多谢我马来西亚拍档Evians，我本身系拍戏嘅，但突然间识咗佢，令我有机会走去商界，投资酒店，我会多多向佢学习；都要多谢亲姐姐，得佢一个人够胆闹我，因为系两年几前，我出返嚟俾记者影到相，佢竟然话我做乜出嚟，你睇下你，最憎你出嚟，你收埋自己咪好啰，出番嚟就俾人指指点点，我同佢讲做我哋呢行已经习惯比人影，因为我觉得唔会全部人都钟意你，亦有人会唔钟意你，我已经习惯，我记得周星驰都比网民批评过，不过佢答咗呢6个字『佢未了解我啫』，其实啲人唔了解我唔知我性格，但我亦都唔会同佢哋解释，我觉得我就系我，做番我自己系最开心。」
Amy 用3个月筹备生日会
现场掌声雷动并大叫Amy，她续说：「我自己一直心存5个心，对人要真心、对自己有信心、做事要有决心、最重要系懂得将心比心，我相信对人好一定会有回报，就好似今晚见到咁多嘉宾着到咁靓嚟到参加我嘅生日会，我真系好感动，所以我觉得今晚点都系我最好嘅回报同最大嘅感恩，多谢你哋。」接着Amy便为大家送上一曲陈慧娴的《人生何处不相逢》。晚宴期间，修哥、陈欣健、黄玉郎伉俪、舒雅颂、夏文汐、杨仲恩、李思捷、苏姗及龚柯允等都有上台为寿星女献歌，Amy也隆重其事换了另一套衣服出来再度高歌一曲草蜢的《失恋》，及后她表示这个生日会令她最难忘的是来自所有朋友的祝福，「生日愿望系心想事成，要乜有乜，今年已经很好，但希望明年更加好，大家愈嚟愈好，我就会好开心。」Amy 透露用了3个月时间筹备今次生日会，因为要一早预约朋友，而她全晚最开心的一件事，便是马来西亚拍档Evians特别把早前由马来西亚拿督基金会颁发的《80年代最具影响力女演员》奖项人肉速递到香港给她。
