林景程挨足16年夺「男配」惊爆血泪史 曾被小生怒掷剧本 再畀导演玩残丨独家
发布时间：07:00 2025-03-07 HKT
40岁的林景程(阿King)演过《香港爱情故事》、《下流上车族》等不少好戏，演技一致受好评，直至今年初才凭《反黑英雄》「开斋」，呆晒的上台夺取TVB颁奖礼「最佳男配角」奖。奖项得来不易，自揭16年来自己错过又被玩过！除了受过某些导演气，被玩好委屈外；在新人阶段犯过大错，搞到被小生黑面抢走兼怒掷剧本，时至今日画面仍历历在目说：「佢咁恶我唔怪，系我搞祸咗场戏。」 采访：方骞平 摄影：谭志光 场地：Tsim house company limited
林景程是一名专业的物理治疗师，2009年参加《超级巨声》入行，由于原先职业薪金比做演员高一大截，多年来要两份工作兼顾去养家，并且要承受老父反对声音。
夺奖遭老父拨冷水
获奖阿King跟爸爸开心Share，点知却被泼冷水：「爸爸问我『有冇奖金？有冇加人工㗎？咁要个奖嚟做乜？都冇用嘅！』我解释系一个值得纪念嘅里程碑。不过，我谂佢心底会戥我开心嘅，因为颁奖礼前夕曾心血来潮陪爸爸返去旧居饮茶，佢仲带我去同啲旧街坊影合照，口里说不，行动最实际，我见当时爸爸好开心，只不过佢冇表达出嚟，见佢开心咁我都好开心。」阿King没想过要扭转爸爸向钱看的想法：「我明白佢嘅年代冇嘢做会手停口停，要信服到佢，我可以赚到大钱，佢先至会唔担心我。如果有日佢肯要我多啲生活费，应该相信个仔经已生活无忧。」
被网民指他「终于挨出头」，阿King却表示，夺奖后冇乜改变，亦无意改变生活模式，唯一最大是心态上有转变，要对得住个奖，容错率会变低：「自己最清楚做衰咗喺边，睇返获奖作品《反黑英雄》，好多地方都要执一执，尤其未能把握到仅有嘅戏份交代每个段落层次，即使得奖仍然系抱住怀疑态度，有咁多『沙石』，系咪做得到『最佳男配』呢？因为个奖交得畀你，即系代表你可以全部做得到。」
犯错连累当红小生
提到辛酸史，阿King都有「大大镬」的难忘经历：「入行不久客串做医生，我以为𠮶场戏冇剧本要『飞纸仔』，一直在等『纸仔』，直至临拍前先知系我搞错，好衰唔衰拍𠮶场戏讲生离死别，由我向家属交代病者病情，呢场戏对后续剧情有好大影响，个个对手情绪到喺度爆喊，我就系咁NG影响到佢哋喊，当时导演忟到索性唔take我，叫我拎住剧本嚟读，但作为新人有咁大压力更加惊到口震震，乜都做唔到，最后我俾小生对手，一手抢走咗我手上嘅剧本，再将𠮶份剧本抛走咗，好恶咁话『照意思讲就算，畀我做咗戏先！』我唯有硬住头皮，避开啲医学名词将大概记得嘅意思讲一次，咁样反而成事！」回想当时难堪场面，吓到猛讲对唔住：「小生对手的确系有啲恶，因为佢好入戏，状态处于愤怒及悲伤情绪之间，系恶喺个角色入面，就算佢恶我都接受，因为喊住仲要take2-3次，有咁嘅反应好合理。」阿King重提仍耿耿于怀，再认衰仔：「系我搞祸咗场戏，无论系点，演员要处理好对白问题，点都系不能原谅。」
被导演玩无所适从
另外，演艺生涯中又试过被导演无理针对，感觉受委屈：「𠮶场戏讲我要望住门口，若有所思，再继续食饭，拍完第一次后，导演过来提点：『景程，望咁耐做乜？唔好搞咁多嘢！』我咪按佢指示做，点知后来畀监制怪责，指正『其实望系有意思嘅，可以望耐少少』正无言时，导演走埋嚟加句『系啰，景程自然啲做啦！』」另一场戏要他在报纸档踎低睇书，然后再起身走人，同一位导演依然狂叫NG：「我都无所适从，睇返playback见所有动作咪做咗啰，发生乜事呢？跟住同佢讲返，个导演仲发晒忟憎回应『你钟意点做就点做啦！』后来听讲，呢位已离职嘅导演专针对新演员，所以只能硬食，而且演员得罪导演冇运行。」
