谷祖琳感激黄秋生教演《爸爸》：乜都唔好做 入行27年首提名女配角多谢每位同行人丨独家
发布时间：07:00 2025-03-06 HKT
谷祖琳凭电影《爸爸》首度获提名金像奖「最佳女配角」，除了感激电影制作团队外，入行27年来遇过的人，也成就了今天的她。而当中最感激父母对她的全程支持，特别是谷爸爸铁粉式盲撑，既感动又搞笑；其次是首个合作导演陈果，在他震撼教育下成长；仲有默默在身后支持的老公刘颖恒（Andrew），还有如定海神针般存在的「私人补习老师」黄秋生，原来她在《爸爸》「无添加」的演出，亦多得黄秋生教路。采访：杜杜 摄影：林宾尼 服装:Isabel Marant
消化了入围消息后，小谷最感激这27年来遇过的人，「𠮶日坐低静静哋谂返，呢个提名一定唔系自己功劳，甚至乎唔系净系呢套戏𠻹！我嘅人生点样成就咗我呢个人，继而咁啱有呢个戏、呢次机会，先至可以拿捏到，谂返系我一路以嚟遇到嘅人，觉得好温暖、安慰，一路身边都有人同行，真系要多谢佢哋令我行到𠵱家，唔系讲得奖感言，都已经要多谢好多人。」
头号铁粉谷爸爸
小谷首要多谢当然是父母，特别是她的头号铁粉谷爸爸，「《爸爸》佢睇咗2次，以佢70几岁嘅人，比较文艺嘅戏佢都睇2次，佢仲话第2次好睇好多㖞，我唔系净系睇我啲嘢，会睇埋阿翁（导演翁子光）啲访问，总之睇晒我周边啲嘢。」原来当日第1个通知她入围金像奖，竟不是电影公司而是爸爸，「我执紧屋，爸爸打畀我，问我『点呀？入唔入到围呀？』我话唔知㖞！佢话『几时知呀？』应该呢几日啩，佢话『咁我话畀你知啦，你入到㖞』，我话系你想之嘛，佢话『公布咗啦！』」提起谷爸爸，她最深刻一幕是入行前，首位经理人Amy约爸爸见面的搞笑情景，「我爸爸系冷面笑匠底，但佢唔知自己滑稽，我最记得Amy话『觉得你个女好好想签佢』，我爸爸反应系『吓！佢得？！』跟住我又望住佢话『我得？！』跟住我哋两个一齐话『得咩？！』，Amy仲话『一定得』哈哈！」
陈果狂闹下成长
小谷当年澳洲大学毕业返港，一心想做幕后，但被经理人Amy带入行做幕前，她形容是戆居居的情况下拍首部电影《去年烟花特别多》，「拍阿果（陈果）嘅戏，传统系要做埋幕后，𠮶时系造型、化妆乜都冇，要自己做埋，𠮶时畀阿果同其他人闹到反艇，同我幻想嘅情况唔同，直情系电影梦幻灭，𠮶时真系好迷茫，个人变到好瘦，好似进入黑洞咁好崩溃。」她最深刻有场戏到大潭水塘拍摄，但制作队忘记了带她一齐走，「佢哋走咗，冇人知我仲喺度，落雨成身湿晒，底裤都湿埋，又冇钱喺身，我上咗小巴喺度爆喊，个司机见我咁可怜仲唔收钱。」这些经历，令她往后日子成长得更快，「𠮶时学咗系吸收唔到，但𠵱家回顾返，呢个经验系好珍贵，系个好好学习，都要多谢阿果，佢系好火爆，见到佢啲作品都系好有火，但佢真系对件事。」
老公背后默默撑
小谷坦承入行多年，依然对自己没信心，全靠两个人鼓励，首先是2010年结婚的丈夫Andrew，「佢真系好支持我，知我冇信心，成日会鼓励我，我有工作佢就尽量照顾屋企啲嘢，啲女佢凑，尽量唔烦我。」而另一个就是老师黄秋生，「我哋好close，对我嚟讲佢系我嘅定海神针，呢1、2年同佢倾完偈，我个人就会好定，好似去黄大仙求一求签咁。」两人缘份始于《去年烟花特别多》，「佢见我戆居居叫我跟佢上咗几日堂，𠮶时我系零完全吸收唔到，亦都完全唔知佢讲咩，佢讲啲嘢系简单到你唔信，但唔系咁易做到。」就好似拍《爸爸》前，她一样有请教秋生，「佢一路睇剧本，一路叫我乜都唔好做，我话点乜都唔好做呀？！佢话『总之乜都唔好做，系佢老婆咪佢老婆，生仔咪生仔啰』，但系我做咗咁耐戏，好难去做到无添加。」不过她多得演《爸爸》有秋生和刘青云教路，「我系好多谢佢，我喺现场亦同青云倾好多偈，得到两大影帝加持同埋认可，系鼓舞到不得了。」徒弟获提名秋生当然开心，「佢好安慰，佢话『几好呀，见到尾灯呀，哈哈！』佢唔会好夸奖我，但系好紧张件事，我拍紧会message问我，『今日点呀，导演OK唔OK呀夸奖』。」
