JW嬲猪投诉朱敏瀚态度变差 由拍《痞子无间道》讲到旅行劲有火药味丨独家
发布时间：07:00 2025-02-22 HKT
朱敏瀚（朱仔）和JW（王灏儿）2021年首合作《痞子殿下》时，关系好到一度传出绯闻，想不到2年后再拍《痞子无间道》，竟然变成嗌交多过食饭，朱仔更一度搞到JW喊，这次访问他们由拍摄讲到去旅行，一样劲有火药味，搞到要在隔璧访问的陈滢和周嘉洛要帮口做和事佬，幸好真朋友冇隔夜仇，有望再合作下辑《痞子》系列。采访：杜杜 摄影：林宾尼 发型:Hugo Poon@PRIVATE i salon(JW) 化妆:Chloe Yu(朱仔) 服装:LE17SEPTEMBRE@Harvey Nichols(朱仔) 场地:花图
JW为演好大力可爱捕快「高强」，为艺术牺牲 除专登剪短发仲增埋磅，「特登去增肥，𠵱家套剧出街，为连贯所以我特登去增肥，我除咗细个外冇试过剪短头发，真系特登为咗个剧去剪，剪完好肯定块面会变咗个波，角色傻傻哋又系做阿妹，成个人好似肥嘟嘟，笨笨哋。」朱仔笑着认证她好落力，「佢真系好畀心机去增肥㗎，我见佢食好多嘢，戥佢辛苦！」朱仔演媾女王「慕容恭梓」，作为周嘉洛口中「露肉专业户」，继续有晒肌戏，他无奈话：「次次都系冇着衫，我谂观众都会睇到厌。」幸好他已揾到好方法来Keep住身材，「基本每日都去做Gym，嘢食就睇吓使唔使除衫先戒到最清，唔系我就咩都食，食好多嘢特别系肉，要除衫就食鸡胸肉番薯，所以每次除衫都比上次轻松，最辛苦系第1次，因为好惊食多咗。」
讲「案发」情况各执一词
上辑朱仔和JW跟陈滢和周嘉洛初次合作，已擦出好超强火花，这辑更熟络反而拗撬更多，朱仔解释：「大家多咗自己意见，同埋拍摄时间好紧逼，第1辑多啲时间筹备，可以停机慢慢度，今次唔得，一定要跟返rundown，完全唔可以over，有个无形压力，加上第2辑大家都想进步，令大家会紧张啲。」早前记者会朱仔主动自首搞喊了JW，重提「案发」情况，两人各执一词甚有火药味，朱仔说：「有个位我要踎低，导演要拍2 shot，佢就企咗喺度，我话『2 shot你落嚟啦』，个态度唔好嘅。」JW强调：「呢个先系问题，你态度系唔好！」朱仔澄清：「系直接，唔系唔好，系态度直接！」JW有火说：「系态度直接得嚟唔好。」朱仔再澄清：「态度冇以前咁好！」JW𤷪𤺧谓：「算啦！佢讲得唔啱，拍𠮶时佢踎咗喺度夹住咗张凳，我企咗喺隔篱谂紧咩位置拍好啲，佢话『你咪踎落嚟呢度啰』，好明显态度唔系咁好，唔系咁客气啦！」朱仔抢着讲自己版本，「我已经喺固定位置，唔能够上去，梗系郁得𠮶个落嚟啦，呢啲咁简单嘅嘢！」JW火再大，「我绝对认同我要落嚟，啱呀！但你记得我系第2次拍正剧㗎呵？！你都可以好客气咁讲，『你落嚟踎低喺呢度』。」见JW咁大火，朱仔即打圆场，「我承认拍第2辑过程，系冇第1辑咁nice，对所有人都系，因为第1辑我个人物角色系nice啲，第2辑系唔nice，我喺片场就会keep住喺𠮶个状态， 呢个系我平时做法。」JW都认同朱仔可能太投入角色，「佢对人衰或者唔客气，因为喺个角色入面，唔紧要啦！」
急揾陈滢周嘉洛扑火
两人虽然事后已倾返没记仇，但讲到早前朱仔跟陈滢和周嘉洛去日本旅行，JW再扯火，指他们没有心预她同行，「我本身系同朋友去咗日本，但系佢哋3个plan咗去日本冇同我讲，临飞前佢哋先话畀我知佢哋去日本，我话唔该晒，多谢你哋嘅资讯㖞，thank you！」朱仔无奈解释早在通讯群组讲，但JW认为只是出发前几日，非揾她一齐计划，朱仔再解释有谂到解决方案，「知道佢会去日本，我哋有叫佢落嚟嘅，我同嘉洛仲话请埋佢机票𠻹！」JW坚持话听唔到这番话，朱仔即求救隔壁同样访问中的陈滢和周嘉洛，大叫他们帮口，「我哋系咪有讲过，请佢搭飞机落嚟？」幸好陈滢帮拖承认，但JW仍未消气：「太迟啦！好似啲人结婚，临结婚前一个礼拜先问，睇吓你嚟唔嚟啦！」问到平日是否真的「3人行」没预她？JW呷醋谓：「偏多啰，冇办法啦，哈哈！」朱仔完全投晒降，「𠵱家先第1单访问咋，好辛苦！」他们承认由于拍摄时关系变差，想过不再有下次合作，朱仔说：「拍紧时觉得好似差唔多，唔好再开啦！但过咗一排又觉得可以㖞，《痞子》呢个系列可以长做长有，希望今次个反应好！」
