细细粒真人索到爆 减肥年半体重唔反弹有妙法 超靓检查报告踢走负评 丨独家
发布时间：07:00 2025-02-21 HKT
39岁的陈嘉佳(细细粒)曾因急性糖尿病入院，健康状况亮起红灯，医生警告暴肥下去，只剩得10年寿命。因此，细细粒自创必瘦减肥法，减肥年半，由最高峰286磅减到𠵱家体重154磅，真人版不独唔憔悴超索，体重仲Keep得好好冇反弹，而最新验血报告更显示「3高」、肝肾功能都非常好，她满足说：「变靓系其次，最重要系冇咗『十年之说』。」她自爆想当年，糖尿高到令私密部位痕到要搽药膏止痕，谂起都惊。 采访：方骞平 摄影：罗安强
去年3月，减肥才半年的细细粒，首次公开超靓嘅体检报告时激动爆喊，趁住下月13日大验一周年前夕，细细粒已急不及待做了一个小检查，报告依然有惊喜：「尿酸、脂肪、血糖、胆固醇、三酸甘油脂都正常，肝肾功能非常好，𠵱家健康晒啦，推翻咗之前医生讲嘅『十年之说！』(寿命)」不过，懂得重视健康的她还嫌未够详细，下月会再去做多次更详细体检。
索爆真人仲有肉地
对于网民曾指细细粒生图跟自家图体态不同，《头条日报》记者所见，细细粒搣甩130多磅肥膏后，身穿贴身黑色长袖衫的她，双腿纤瘦，身形比例均匀，虽然肚腩及手臂仲有啲肉地，但精神饱满状态唔错，真人版好索。她表示，现阶段体重游走154-165磅内，腰围经由 54吋减至33.5吋，仲有肚腩及「拜拜肉」。减定咗反而乜都照食，采访当日她食完最想食的马拉糕后转战日本菜，点了顶级寿生定食、天妇罗虾及寿喜烧。她又公开维持体重的最佳方法：「早午晚饮3杯咖啡提高代谢，朝早系斋啡，饭后15ML以上苹果醋加水，维持稳定心脏血糖及血压，仲会食啲抑制食量嘅益生菌补充品。」
否认剪皮食减肥药
提到被网民质疑她打减肥针及食减肥药「助攻」，甚至好奇疑问：「点样可以减肉又减到皮？」细细粒拆解说：「唔好将减肥妖魔鬼怪化，减肥系为健康，食西药减就系唔健康，而且我长期喺杭州边得咁易买到减肥药？」她又解释由20岁开始注重食用骨胶原产品，多年来日子有功，所以面上冇皱纹，加上皮肤每28天会有更新期，会自然修复，但坦言：「以前胀到似萝卜；瘦咗之后一定会有松弛，畀啲时间佢喇，至少唔会系难睇。」被负评攻击，她声称唔会嬲：「打从做艺人开始就有，我心理质素强大，系个快乐宝宝唔会介意人哋点睇。」不过，她从经验之谈悟出减肥大道理，提醒：「如果样样都唔食得，咁样系唔会想减肥，用强迫食嘢方式永远系失败嘅。」她强调现阶段著重健康多于外表：「以前真系好Crazy，会追住食唔知饱，对食物渴求好高，觉得食慢咗会蚀底；呢年半间活出自己嘅一套生活方式，会保持舒服饮食状态，中午起身饮杯斋啡，直至夜晚7点就食啲想食嘅嘢，先食菜再慢慢叹…唔想食就停筷子。」她回顾暴肥阶段好恐怖：「除咗月事失调冇时准外，血糖更高令私密部位痕到系咁抓，要挤药膏止痕，𠵱家生理期误差唔到几日！」𠵱家细细粒开埋「细细粒健康生活网站」开心分享代言瘦身产品及自家减肥法。问到对身形可感满意时？她拉起衫展示肩膊位：「天生骨头系咁粗冇办法，可以减多30磅全身脂肪比例，不过，纯减脂肪就越来越难，唔想勉强虐待自己，所以冇时间表。」
唔介意大肥佬男友
索返晒的细细粒仍保持A0状态，还自揭瘀事：「内地朋友曾做媒，但个男仔不感兴趣，连提出交换微信都冇！我谂有冇拖拍系睇缘份，唔系关乎样貌身形。」讲到拣偶条件，细细粒唯一要求年纪比她大，要成熟型。被问到肥佬又如何？她大笑说：「呢啲冇问题，我会帮佢减肥，因为我知道用乜办法减会成功。」
