周嘉洛畀陈滢报复式丧掴20巴痛到坚喊 《痞子》17分钟「裸露」戏怕现形狂着打底裤丨独家
发布时间：07:00 2025-02-20 HKT
周嘉洛和陈滢继《痞子殿下》相隔2年多再合作《痞子无间道》，两人变得更熟，对戏时直话直说，拗撬反而有增无减，幸好最终无损友谊，陈滢更有机会20倍奉还上辑嘉洛一掴之仇，被丧掴的嘉洛就痛到坚喊。讲到17分钟「裸露」戏，嘉洛坦承拍时好尴尬，为免重要部位现形，更狂着肉色打底裤遮丑。采访：杜杜 摄影：林宾尼 发型:@singglam_ysl@ilcolpogroup 化妆:@makeupvanessa 服装:@yanyanknits 场地:花图
嘉洛演粗口烂吞无耻又无赖 「费仁」，他对演这类人有一定把握，而「费仁」既贪钱又烂赌，这方面嘉洛就话一点都唔似，「我知道钱嘅重要性，但系钱唔系最重要。」陈滢帮口力赞，「嘉洛系我身边最唔贪嘅人头3名，好事嚟，佢冇贪念。」嘉洛连日前出席TVB赛马日，都冇投注碰运气，「纯粹系个人冇赌运，如果畀我铺铺赢就瞓身买，好多时朋友赢开我跟买就会输，同埋有认识嘅人都系衰赌，呢啲位会警惕自己，脚踏实地好过。」
嘉洛为角色专登增磅
靓女陈滢要演唔冲凉一身臭的「符玲」，她不但唔介意，仲大呼好可爱，「CG做到有啲乌蝇喺我身边飞嚟飞去几可爱，好似啲公主有雀仔狗仔伴住。」嘉洛卖晒口乖，「但佢keep到好靓，啲头发好顺滑，身材又好好，造型又好靓，我成日好辛苦话佢好臭，要勉强做𠮶啲反应，其实佢好香想闻多两啖，呢啲位考演技㗎，好彩我都专业。」不过陈滢觉得「符玲」另有难演之处，「佢系情绪化嘅女仔，好神经质，对我嚟讲好难演，要攞个平衡，如果个角色太过神经质惊会好烦，个平衡好难拿捏。」
嘉洛剧中有17分钟露肉戏，他笑言无论身材和经验都跟朱敏瀚冇得比，「我冇佢咁有经验，亦都冇佢嘅效果，佢系露肉专业户，佢唔着衫拍摄时间系多过好多TVB甚至香港嘅艺人，我就系sell才华！」剧情交代他是全裸，重要部位后期先遮，拍摄时他做足安全措施，「着咗几条肉色打底裤，任何形状都唔想畀人睇到，全部遮晒，系会有啲尴尬，现场都几多人，同事外仲有啲临时演员。」嘉洛被陈滢爆为角色专登增肥，可惜因太辛苦越拍越瘦，搞到唔连戏，「佢系乞人憎角色，我想做到肥嘟嘟咁样可爱啲，拍呢套嘅身形系前所未有咁肥，我刻意再食多啲，夏天消耗好快特别系拍古装，每日流成吨汗瘦得好快，但呢场戏见到我啲身材系唔连戏，有啲系3月拍有啲系5月拍，肥啲瘦啲差5、6磅。」
陈滢曾不想再有合作
《痞子殿下》时，嘉洛因不懂就位，有场戏掴到陈滢喊，陈滢自爆今次终可复仇，「我还咗第1季佢打我𠮶巴，今次10倍奉还，应该系20倍，我唔系拍一吓，系啪啪啪咁打，𠮶场讲佢抛弃我，我唔明佢点解咁做就发咗癫，角色有少少神经质我系放晒出嚟，控制唔到，但最后监制系觉得太夸张，冇用到𠮶个take，再拍我就冷静咗，拍完feel到我有啲过份，真系当佢系个公仔咁打。」嘉洛却大方话，「唔系嘅，我哋喺个戏度，我好OK，𠮶场啲眼泪，系因为你打我打到好痛流落嚟，唔关情绪事，帮到我个戏，几好。」陈滢仍不好意思，「但系演戏唔使咁大力，未试过咁样打人。」但陈滢坦认因对着嘉洛会更放胆打，「如果系朱仔（朱敏瀚），我未必咁够胆打，可能会沟通咗先，但系我系冇沟通就做咗，如果有人咁打我都会反枱，佢对我包容性系高。」听到陈滢这样讲，嘉洛即冧晒，「帮我讲埋，呢个女仔非常好。」
两人早因合演《痞子殿下》成好友，今次沟通方式更直接，反而嗌交更多，嘉洛说：「第1套佢系有倾有讲，呢套佢自己谂法多咗，我都多咗自己谂法，最终都有结论，但唔系咁和谐。」陈滢补充，「呢套剧令我哋成长咗，好似一家人咁冇咁礼让，永远对最亲嘅人就会直接啲，同埋今次急咗好多冇时间讨论，上次系谂好晒先做，今次一定要准时收，呢个系公司新规定。」关系起了变化，陈滢坦言拍完不想再合作，「拍完𠮶阵有个感觉唔想再一齐拍，𠵱家反而想再拍，可能𠮶时太多压力，大家又唔系好和谐，令到我有呢个感觉，因为对厌咗，但过咗2年大家关系keep得好好，大家都成长咗，做演员进步咗同专业咗。」不过她建议改拍时装，大家冇咁辛苦，嘉洛认为冬天拍更佳，「时装嘅夏天，香港都好热，宣传咪冬天着古装衫，温度好舒服，气氛好和谐，𠮶时我好强烈谂几时开第3辑呢？！」
