肥妈经历痛恨「小三」 嘲讽五索：人格唔系人人有 传授留住老公绝密心得丨独家
发布时间：07:00 2025-02-12 HKT
去年肥妈、黑妹拍住上，以「妈妹」组合开骚赚大钱过肥年。「妈妹」同声同气，坚持做人要有道德、讲情义，尤其肥妈曾经历前夫偷食外佣事件，更痛恨「最强小三」。对于富商马清铿情妇五索（钟睿心）高调晒命，肥妈反「赞」五索够僵：「人格呢啲嘢唔系人人有㗎嘛！最紧要系个男人肯制。」认识马家全家人的肥妈更强调，过往在马家派对中从不发现有五索，直言：「佢又唔突出，马生周围都有女人啦！呢个又唔系第一个！」讲到咁！明就明！ 采访：方骞平 摄影： 场地：hotel icon the market
肥妈、黑妹同捞同煲，两人齐齐捞龙虾菜丝沙律，好讲意头的肥妈说：「捞起捞起，风生水起大吉大利，有名有利。」两人互相祝贺，肥妈祝黑妹财色兼收；黑妹祝肥妈儿孙满堂，最紧要是健康。对于去年合体赚大钱，黑妹姐形容是够生活；肥妈就坦白更正：「点止够生活呀？旧年真系好OK。」
Rick临终曾「托孤」
「妈妹」相识多年是生死之交，黑妹最感动是3年疫情令她的流动资金变零时由肥妈出手相助：「全世界知我系一个大使嘅人，仲要养伙记，感恩阿妈拉我返嚟，令我出镜率多咗。」肥妈感觉到当年黑妹环境不好：「我主动问佢『仲乜无嗱嗱返上内地生活？你系咪等钱使？你要几多我畀你！』但佢唔肯要，我叫佢返嚟，包佢有嘢做。」其后肥妈老公Rick病重，临终前「托孤」叮嘱黑妹说：「我差唔多㗎喇，我老婆冇咗我好大获。」故黑妹日日陪住失眠的肥妈，肥妈坦言当时状态连自己都惊：「突然喺两个月内唔见咗个20年老伴…」肥妈指老公是排NO 1：「我哋每隔5-6年就结一次婚，因为犯太岁时就要冲喜，好记得第2次喺拉斯维加斯教堂行礼时两公婆喊爆，真系有下嫁嘅感觉，直至提出结第4次时，佢话好病好攰唔应承我…」
唔认同价值观
重视婚姻的肥妈藐视「最强小三」五索：「人格呢啲嘢唔系人人有㗎嘛，有啲人可以卖鬼咗佢㗎嘛，冇错与对！我觉得五索系冇问题，人哋钟意点做都得，打劫银行个个都识啦，问题唔够僵做啫！人哋个胆大个沙煲，有咁嘅条件又有人肯制，咁关我哋乜事啫？」不过，肥妈唯一不认同是价值观：「𠵱家啲人睇嘢唔一样，最紧要有新闻，哪怕系丑闻，同埋系会用钱嚟衡量啲嘢，我哋跟唔上亦唔想跟，可能佢嘅幸福系住山顶豪宅，有几多钱，买几多个包包，佢自己嘅幸福由佢自己去衡量，但，我觉得如果乜都睇钱，做人有意思咩？𠵱家我哋好开心，幸福系睇到一家人齐全，儿孙满堂朋友又多，唔使用钱去买朋友，我个幸福同佢嘅幸福标准唔一样。」
赞大婆好靓女
作为过来人的肥妈坚持做女人是要管住个男人，因为不论有冇钱，大部份男人都身痕，她还有一套教学心得：「第一，先要保住男人个胃，等佢肯返嚟食嘢饮汤；第二，一定要做姣婆，周街都有姣婆，你唔做咪人哋做啰，其实有好多会收埋嚟姣，只不过佢(五索)真系够僵啫。」肥妈还爆识得马家全家人，尤其同马生大哥马清伟好熟：「马清铿老婆系书香世代，大家闺秀系靓㗎。(过往去马家大派对，有冇留意到五索呢个人？)佢又唔系好突出，唔会知佢系边个，马生周围都有女人啦！呢个又唔系第一个，只不过佢好嘢有几条烟，而我哋呢啲咁蠢嘅人只识佢老婆！」另外，「妈妹」直言暂时不敢去泰国，肥妈更自揭恐怖经历：「2016年同黑妹、古淖文、苏珊去菲律宾一间新酒店登台，全程有保镖保护，最好奇酒店点解只得菲律宾菜？原来个老外总厨畀人标咗参，吓到我哋唔敢踏出酒店门口！」
