姜皓文殷宁期望观众爽手畀「人情」 拍《哈哈哈》贺结婚25周年似足搞婚礼丨独家
发布时间：07:00 2025-02-08 HKT
姜皓文（黑哥）和太太殷宁继90年代合作拍剧集后，最近夫妻档再合作拍贺岁片《哈哈哈新年喜戏》，不过黑哥主力幕前演出，殷宁则负责监制和编剧。而该片剧本其实是殷宁送给黑哥庆祝结婚25周年礼物，黑哥决定揾投资者拍成电影圆心愿，两人直言整个制作过程似足搞个婚礼，最期望观众如宾客爽手畀「人情」！采访：杜杜 摄影：林宾尼 发型:Jove Shek 化妆:Manman Fong 服装:DEGAIA HK 场地:Le Monde Resturant
黑哥一直想构思和制作部电影，殷宁爆他由去年开始心郁郁拍贺岁片，「你一路都话想拍贺岁片，拍返啲开心嘅嘢，我有记喺心度。」刚巧去年马来西亚搞院线的朋友着黑哥不如拍部贺岁片，正好他手头上有个故事题材，「我哋结婚25周年纪念，老婆写个剧本畀我做礼物，如果唔拍出嚟，冇乜意思㖞！」殷宁认为将剧本拍成电影，对他们确有特别意义，但不会强求，「开呢套戏时都谂开唔开好呢？！老公话『最终冇拍好似嘥咗你个剧本㖞』，我唔紧要㗎，我写嚟系为开心，最紧要件事系咪好？！系咪得？！系咪做得开心？！」
惨遇投资者甩底
黑哥坦承揾投资者是这次制作遇到最大难题，「有时揾到投资者，都未必真系投资。」殷宁解释：「会畀人甩底，一开始我哋系乐观，一讲就OK，但有啲人唔系我哋预算咁样。」黑哥都好谅解情况，「都明白嘅，𠵱家个气氛同时势又唔系咁好。」殷宁更因坚持等资金到位，令电影延至去年11月才在马来西亚开镜，「有啲人话我系好蠢嘅坚持，但系我对人哋嘅承诺，我冇钱点出粮啫！一定要收齐钱先知我哋落去点做，同埋得咁短时间，又冇可能仲分几期出粮，呢个过程系比较辛苦。」距离贺岁时间迫近，殷宁担心赶不到进度，单是剪接已令她好头痛，「我哋又唔系得一个版本，仲有马来西亚、大陆版本要剪，要喺咁急嘅时间里面做晒咁多版本。」
电影制作名单中，监制名为「姜氏美人」，原来是黑哥专登为太太改，因他最初是亲自包办监制，但太太心痛他才主动请缨，「呢个本嚟系我做，𠵱家我都有份做，只系老婆睇唔过眼我又要演，就同我讲『老公你做好啲戏就得，有咩就交畀我』，最初谂住交啲小事畀佢，点知越嚟越沉重，佢担当个责任就越嚟越大，我都唔知点样帮到佢，我再插手惊会混乱，佢就咁孭晒飞做。」曾是演员，又身兼编剧的殷宁好明白黑哥一人分饰两角难度，「我喺现场见到佢，呢头做呢个角色，转头又要再做𠮶个角色，同一个场景要设计两个角色，呢个过程都真系会好攰啰！顾唔到咪仲弊，不如专心做好演员𠮶瓣。」
忆童年住儿童院
讲到写剧本送老公，殷宁当初出发点好单纯，「我一开始冇谂咁多，净系好玩、挑战，冇谂过后面有咁多嘢要兼顾，谂住行就行啦！行落先知原来咁嘅，死嘞！要硬住个头皮做好件事。」而戏中儿童院背景，原来是黑哥小时候的亲身经历，「系我住儿童院𠮶时嘅阴谋论嚟，𠮶时小朋友好多胡思乱想，畀社会福利署安排住儿童院个心系比较惊慌同无助，好多奇怪嘅嘢会谂出嚟，呢间儿童院会唔会好奇怪？！我做错事会唔会对我点？！社监咁奇怪嘅半夜喺度出出入入，其实我哋宿舍有层系社监嘅房，佢两公婆会住喺度夜晚会放狗啫！𡃁仔又会喺度乱谂，觉得好唔安全，会唔会卖咗啲细路呢？！呢度佢话晒事好似国王咁。」
演员出身的殷宁，最初也打算粉墨登场客串一角，「曾经都有谂过，但系计落其实我唔会有时间，又要听住佢哋讲对白，做呢样𠮶样，我连个编剧都推埋出去拍，我仲边有时间呢？！系唔会有时间去客串到，同埋都揾唔到个位我可以摄得到落去，有谂过有冇个角色轻巧啲，但见我唔到又冇用啦！」两夫妻坦承这次合作可一不可再，除了搞到嗌晒交，整个过程似足搞场大型婚礼艰难，殷宁说：「我哋一齐着晒红衫好似结婚咁，筹备好似揾咗个wedding planner咁，又要揾场地，又要揾摄影师，又去影相、整回礼，又要请大家嚟。」黑哥笑指：「表演嘉宾又系自己啦！」殷宁续说：「做骚时歌都唱埋，但系我哋如果结婚都系请一千几百人啫！但系今次系要请千千万万嘅人，心情好激动同紧张，希望大家一定要嚟捧场，畀人情呀！」
