钟柔美被吓亲：我会注意下 麦玲玲狠批冇读书运兼俾渣男呃丨独家
发布时间：08:00 2025-02-01 HKT
钟柔美(Yumi)、张驰豪(Aska)为薛家燕、庄子璇、徐文浩等主持的TVB贺年节目《2025风生水起》出任嘉宾，玄学家麦玲玲师傅坦言Yumi冇读书运，仲会俾渣男呃多次！Yumi强调就算如何艰辛都不会放弃学业；至于刚夺台庆「最佳男新人」的Aska事业也会稳步上扬。 采访：方骞平
中学毕业时考获全班第一的Yumi，但到公开试DSE竟然失手，现在只好转读HKU副学士。平日Yumi工作完又要追学业坦言有少少压力，更自爆：「有段时间好崩溃，感觉有啲辛苦，唔知点去平衡学业同工作，最后谂咗一个解决方法，我会尽快完成所有功课，余下时间好好享受，做最爱嘅唱歌及跳舞，咁样会舒适啲。」
有望突围做小天后
麦玲玲师傅直指Yumi没有什么读书运，虽然勤力，但作用不大：「佢读书表现麻麻，考试多劳少得！」不过，玲玲师傅叮嘱她不要灰心气馁：「不好畀太大压力自己，每人天份唔同，呢啲系生成㗎，好似我老公唔使点读书，但由细到大全级考第1，未考过第2，仲冇读过中7直接跳级入读港大，呢个世界冇咁完美，有啲人读书叻啲，有啲人做嘢叻啲，有啲人表演叻啲，Yumi有出嚟做嘢进修运，佢要终身学习，尤其喺表演上的确系几有天份嘅，所以重点落返演艺上最合适，仲会有机会突破做『乐坛小天后』；而Aska就一步步嚟。」
另外，玲玲师傅又指两人爱情运未稳定，更狠批Yumi蛇年冲感倩运：「后生女系咁㗎啦，生得靓又多选择，来来回回会遇到渣男，被呃三五七次好正常，所以专心工作唔使急拍拖，见多啲就会知道自己钟意乜，享受过程先唔好谂个结果住，就会开心啲，唔好咁早认定。反而Aska好啲，但佢系容易有第3者介入，不过，失恋时候都系灵感泉源，好好享受感觉自然会有好作品。」曾被飞3次的Aska 认同玲玲师傅说法；Yumi则被吓一吓后，尴尬地笑说：「我会注意下！」
