高海宁想拍相亲节目揾属蛇老公边赚钱 马国明失控带「仔」睇病证做到好老窦丨独家
发布时间：07:00 2025-01-24 HKT
高海宁（高Ling）和马国明在《麻雀女王追男仔》再度合作，更兴奋首度担任贺岁片男女主角，相信蛇年会更旺，揾到盘满钵满。马明就不心急蛇年做老窦，但带爱猫睇病时失控表现，尽显有做好爸爸潜质。高Ling自言属蛇好旺她，但不心急新年揾对象，就算想休息都宁愿边拍综艺揾钱，但接受马明建议可拍相亲节目揾属蛇老公，赚住钱揾幸福。采访：杜杜 摄影：谭志光 服装:@maxandco(高Ling) 场地:K11 Art House
高Ling首次孭飞贺岁片感到兴奋，「第1次做电影女主角，又系贺岁片，更加值得开心，我觉得好旺啦，入场睇我哋贺岁片，会旺上加旺。」马明心情亦一样，「我直情系第1次拍香港电影𠻹，之前只拍过内地电影，仲要系第1次做男主角好开心。（竞逐新人奖？）呢个我真系唔知呀！」戏中高Ling演麻雀女王，牌技高超，但真人竟连计番都未识，「呢2年去啲朋友屋企拜年，会揾我戥脚，学识咗啲基本技巧，虽然我唔叻但有运仔，食过摸返嚟嘅十三么，但我净系识砌靓副牌，食完都唔知几番。」
去到边瞓到边
一向恨塞爆工作表的高Ling，龙年发展好满意，「见得最多系助手同经理人，爹哋妈咪都少机会见到，keep住飞嚟飞去，但好享受，入行咁多年终于feel到可以咁疯狂㗎！虽然好攰，但好充实，希望事业运继续延续落去。」她讲明有钱揾可以不放假，仲因忙练到特殊技术，跟曾志伟睇齐，「我𠵱家train到个技能，就系去到边可以瞓到边，一起身就做嘢。（好似总经理咁？）哈哈！有呢个技能好开心，唔系人人做到，多谢个天畀我做到。」蛇年她想继续努力揾钱，但爱情就随缘，「我相信命运，有啲嘢唔系我控制，呢2年行正事业运，我会顺应命运，如果真系有桃花畀到我唔抗拒，但唔会强求。」
揾阿佘问意见
高Ling又指玄学家讲过蛇会旺她，「蛇系我嘅财富，蛇年财运会几好，都期待。」马明建议她，「你应该揾个属蛇男朋友都几好㖞！」高Ling认同，「师傅讲无论系属蛇或者叫阿佘都旺我，所以有嘢会message阿佘（佘诗曼）问吓做唔做得，佢都好乐意答我。」她又认为将来若有对象，必定带给马明过目，因信物以类聚，「价值观相同嘅人会玩埋一齐，佢系好男人，若同𠮶个男仔沟通到，就系同一类人。」她又相信原生家庭父母恩爱，下一代也会对另一半好，她和马明就是好例子，「佢爸爸对妈妈好好，由细薰陶男人系要咁样对女人，所以要揾个家庭都系好好嘅男仔。我爹哋妈咪都好好，所以我唔缺爱，喺感情上唔急，几有安全感。」
乐做猫奴爸爸
马明称龙年平稳过度，高Ling忍不住窒他：「咁都算平稳，旺𠮶时系点㗎！？我未停过你都未停过㖞！」马明笑言只想蛇年越来越好，不过讲到做老窦，跟太太汤洛雯好随缘，「话有plan亦可以话冇plan，我同太太觉得就算冇小朋友都冇乜所谓，屋企有两只猫猫已经好挂心。」讲到一对「仔女」，猫奴爸爸就冧晒，自爆早前「囝囝」病倒超担心，「好惊，原来真系会发癫㗎！有次只猫过敏，我即刻铲架车带佢去医院，将架车就咁摆喺街唔理抄牌，时只猫已经喺架车度濑尿，我唔理就抱住佢冲入去医院，好失控！」高Ling也见识过他猫奴样，「佢拍嘢唔出声，但会突然话老婆send咗啲猫猫相好得意，又开啲片畀我睇。」高Ling估计若马明有下一代，应该不会出街，马明都同意，「应该一收工就见我唔到，要补shot呀？！我出咗隧道就返到屋企啦！」
老婆陪上综艺
展望蛇年，两人都希望多拍综艺节目，但马明不够胆单拖拍，「有啲担心，虽然老婆成日鼓励我，但我好惊令到成个气氛变得好闷，试过有内地综艺揾我，但我真系唔知讲乜，国语又唔叻。」高Ling提议他跟老婆一齐上讲婚姻的节目，「老婆都提议一齐去，咁我就会放啲，我老婆几幽默，如果一齐去我会大胆啲。」高Ling就想拍旅游综艺，「一班人去旅行或者喺个地方生活，可以认识多啲朋友，成日拍剧好需要生活，喺自然环境下揾返高海宁，放慢个节奏，但又唔想放弃揾钱㖞！最完美方式系赚住钱去综艺节目度享受生活。」马明提议她不如拍相亲节目，「哈哈！你赚住钱揾个属蛇嘅男仔。」高Ling冧笑好满意话：「陈乔恩都系咁样，呢个可以考虑下，哈哈！」
