Hey Brother计划今年狂出歌再拍埋电影 5子夹埋280岁组男团逐新人奖唔尴尬丨独家
发布时间：07:00 2025-01-23 HKT
李思捷、黄智贤（Ben）、麦长青（麦包）、曹永廉和唐文龙最近以280岁之龄组成男团「Hey Brother」， 并推出首支单曲《我为人人》。5名中佬讲明已筹备了2年多，今次并非玩玩吓，所以除了这首新歌外，今年计划再推出3、4首歌，他们笑言望狂谷攞新人奖，仲打算下半年开拍电影，由思捷亲自出任监制、编剧和导演。采访：杜杜 摄影：谭志光 服装:均DENIM 场地:The AIR (The ONE)
男团「Hey Brother」的诞生早在2年几前，5子在一个饭局开始构思，思捷说：「𠮶时疫情大家好想搞啲嘢，尤其是隔离紧，大家唔单止喺香港，都想喺大湾区揾啲嘢搞吓，就谂到不如一齐搞，系时候要郁，要奋斗嘞！我哋5个唔使1日就say晒yes，嗱嗱声整只新年歌《祝福你》出嚟先，但唔够原装，之后搞咩好呢？！」由于大家各有各忙，到最近才再推出首支单曲《我为人人》， Ben说：「成日话搞啲嘢咁搞咩？！系综艺定网上开个channel，最后共识一个团应该有首自己歌，就开始谂主题系讲啲乜嘢，逐关咁去倾，过程我哋好享受，由零开始去孕育一件事。」讲到《我为人人》主题，Ben续说：「人到中年都睇咗好多人情冷暖，喺人生嘅阶段都不自觉戴咗个面具，面对老板、父母、家人、老婆系1个面孔，究竟真正嘅面孔系啲乜嘢呢？！乜嘢系最初心，我哋就谂住呢个主题，同作曲填词去讲，内容有份参与，会应景啲入肉啲。」
队员互补不足
思捷解释男团命名「Hey Brother」前，曾想了很多个名，但最终觉得此名最适合，「试过谂过好多，有谂过叫叔叔、铁男，后尾又系2年前，我哋拍咗个抖音嘅短片，喺度行catwalk懒型咁，底个音乐系不停『Hey Brother』。」麦包说：「几有国际性，brother系冇年龄限制，好多观众朋友认识我哋都系由细睇住我哋大，睇住我哋成长，就系Hey Brother。」讲到各人分工，阿廉笑言：「组团有个好处，大家可以互补不足，个个都有唔同嘅技能喺度，当然靓仔系我担当啦，其他人系用脑筋、跳舞同型𠮶啲。」思捷笑指：「靓仔，佢霸咗啫！」 Ben说：「呢班兄弟有啲系策划嘢叻啲，好似思捷做咗咁耐监制，佢知道个节目、歌曲系要点搞，过程中我都学咗好多嘢，我系比较冷静理智啲，佢哋冲得太行时，就拉住佢哋。」思捷就自称是阿四，「佢哋有咩意见，我听晒之后尽量阿四咁总结归纳。」文龙说：「思捷同阿包个进取能力好强，策划方面我哋唔够佢哋咁犀利。」麦包亦自认是阿四，「文龙负责骚胸，我负责骚肚腩。」但阿廉却不认同，「阿包识好多人，帮我哋揾到好多工作同赞助。」
成军即有登台
讲到组男团目标，原来除了出歌，5子还打算有很多新搞作，Ben说：「开心都系个几大目标，我哋都唔细啦嘛，过往我都系偏向被动，我哋自发揾啲嘢嚟搞过程系开心，过程就赚咗，了解对方多啲，真系好主动去策划啲自己好想做嘅嘢，未来我哋除咗唱歌，仲可能会拍戏，或者拍啲综艺。」文龙补充：「舞台剧，栋笃笑我哋都会考虑。」他们踏入新1年已有新工作，年廿九已经会到马来西亚云顶登台，3月又会在港出席公开活动，麦包透露还不止于此，「我哋希望今年出到3、4首歌，咁新人要出多少少歌。」Ben说：「新人要勤力啲，我哋要多啲人识。」麦包指着思捷再爆料，「希望下半年我哋套戏开得成，导演监制编剧喺度，大家同工同酬，个监制又肯做埋编剧、导演就最好，我哋梗系畀佢做啦！」思捷笑言：「啲阿四做晒！」他们又坦承出多些歌是搏攞奖，仲话就算平均年龄55岁，就算竞逐新人奖也不尴尬，麦包说：「我哋真系新人嚟，好意思点会唔好意思，够胆畀我哋点解唔够胆上台，只要我哋唔尴尬就冇嘢尴尬。」文龙说：「平台愿意考虑我哋，我哋愿望被考虑。」思捷谓：「无错，得啖笑都好！」
