吴镇宇自爆智破恐怖电话诈骗经历 张智霖受《误判》启发教仔免堕法网丨独家
发布时间：07:00 2024-12-20 HKT
吴镇宇和张智霖在电影《误判》再度合作，剧中前者演检控官后者扮师爷，但角色正邪难辨好有发挥，Chilam为角色主动变「老」，镇宇更有场超抢戏揾甄子丹只揪。讲到现在骗徒手法层出不穷，Chilam受《误判》剧情启发会教囝囝「魔童」小心保护自己免堕法网，镇宇更自爆曾收恐怖电话诈骗，幸好够醒目成功逃过一劫。采访：杜杜 摄影：谭志光 发型:Gary Poon(镇宇)、Herman Law@ii Hair & Nail(Chilam) 化妆:Andrew Wong(镇宇) Hetty Wong(Chilam) 场地:The Mira Hong Kong
Chilam戏中演的师爷「欧柏文」，表面帮穷人发声，实则奸到出汁，对于继网剧《家族荣耀》后再演反派，他认为两个角色相差极远，「上次始终都系个好人，今次始终都唔系好人，所以好唔同，对于我系好玩，作为演员，想试多啲，坏到底系会点呢？！」他更亲自为角色设计白发胡须look造型，「我同平时反差大啲，反派比较少机会可以做到，变咗谂多啲嘢，同埋睇吓对手系边个，原来系子丹，觉得自己会唔会平时太小朋友个态度同个样，所以今次喺个造型上，希望令到自己个重量会多啲，令到自己成熟啲，希望畀到对方一啲压力。」
曾演阿姐同学
饰演检控官「杨铁立」的镇宇，看似偏帮有钱人，他解释是剧本需要，「呢啲人好容易令人觉得系奸，成日黑晒口面，唔知点解乜都执到正，都好出嚟有呢个效果，都系佢哋想要，都开心。」他亦开心相隔多年可以跟阿姐（汪明荃）再合作，「佢哋查返，《万水千山总是情》我做过阿姐同学，哈哈！我以前做过李司棋个男朋友，又做过阿姐同学。」可惜当年没有正式对手戏，「边有机会呀！你估我系郑少秋、刘松仁呀，周润发都未试过同阿姐演戏啦！记得有年返无线见到阿姐，佢话你咁大个嘞！我识你𠮶时有几细个呢？！好得意，我临走仲揽咗阿姐两吓，抽抽水呀！」
子丹提出对打
戏中镇宇跟甄子丹有场对打戏，他还主动叫子丹「我同你只揪」成为热话，他就解释是子丹要求，「大家识咗好耐，佢入嚟无线拍电视电影就系拍我，唔记得有冇周星驰份（1989年《无冕急先锋》），直至拍《误判》见返倾两句，我话『啲观众好恨你畀人打㗎，不嬲你打人，我觉得做律师伸张正义，畀啲古惑仔打到爆晒缸咁先好睇』，佢唔知系咪听错观众好想佢畀人打，以为观众好想我打佢，哈哈！」他又自爆跟子丹商量时，讲明不能「公平对打」，「我点同佢打一场呀？！我话『你冇得隔，如果佢隔我会痛，要揾到个理由，唔可以又系我演，我可以一冲入嚟就系我打你』，𠮶句对白就系咁嚟！梗系会有效果啦！对『宇宙最强』讲只揪㖞！佢要嘅效果，虽然明知会爆笑，但系我哋好认真对代，我冇压力，佢唔可以隔同还手嘛，如果我受伤会爆佢㗎！哈哈！」
险收取违禁品
电影以真人真事改编，讲年轻人误交损友借地址寄包裹，惨被指贩毒搞到一身蚁。镇宇自爆早前收到诈骗电话，自称海关指他有包裹滞留广州，还知道他的名字，「恐怖在佢话『你系吴生，吴镇宇系咪呀，你知唔知有啲肉干寄嚟香港唔寄得㗎，滞留咗喺广州』，我话我啲助手寄牛肉干都唔得？！我话咪住先，几多号寄，有冇地址呢？佢话冇，但系寄鳄鱼肉干。」他指助手曾寄过牛肉干，但早已食完，所以觉得事件相当恐怖，「佢攞到我个电话，知你系吴镇宇嗌你去收㖞！如果系毒品去收咗咪拉你啰！当然我唔会去啦！但如果攞埋你地址长期寄嚟，佢寄毒品嚟都得㗎㖞，无端端都揾到吴镇宇个电话号码，个世界就恐怖在咁啦！」
望儿子识自保
两人儿子正值青春期，镇宇囝囝吴费曼16岁、Chilam囝囝张慕童已18岁，镇宇坦言骗案防不胜防，只望儿子醒目，「希望佢哋自己识得谂啦，1个18、1个16啦，大佬呀！教唔到你咁多啦！人哋话有啲嘢寄嚟你度再拎返畀佢，唔知佢有冇咁笨，希望睇吓《误判》啦！借个地址畀人都几恐怖，我举个例子就更恐怖，如果真系寄到嚟屋企就麻烦。」Chilam亦相当认同，「18岁都系成人嚟，你自己要对自己所做嘅嘢负责，一定要更加谨慎，个脑老笋要生埋啦！网上世界系几复杂，都唔知边个系真边个系假，甚至乎系咪同个人讲紧嘢又唔知，𠮶个人几多数又唔知，好难去判断一切，不如有时可能少啲上网，都系一个方法啩！」
