何超莲惊赌王千金扮牛杂妹冇人信累票房 首拍电影亲邀曾志伟黄宗泽傍住壮胆丨独家
发布时间：07:00 2024-12-14 HKT
已故赌王何鸿燊千金何超莲最近首度主演电影《多想和你再见一面》，戏中除了跟内地男星此沙首度合作，还亲自邀请曾志伟演爸爸以及黄宗泽客串，望揾熟人傍住可取经兼壮胆。对于角色「Sandy」是名平凡女孩，更要摆档卖牛杂被外界质疑说服力，超莲都好理解赌王千金扮牛杂妹观众难入信，令她对票房有一定压力，「希望大家放低呢样嘢，畀个机会入去睇吓。」采访：杜杜 摄影：谭志光 发型及化妆:Sharon Xu 场地:Yes!Culture
超莲参与过不少内地综艺节目，但始终没演过戏，原来她一直有心理关口，「我唔系演戏出身，又唔专业又唔识，无端端去拍戏，惊演得唔好会拖累大家，演咗出嚟又冇观众想睇，又会拖累票房，唔系好敢孭呢个飞。」今次《多想》她终首肯演出，全因电影有特别背景，「呢套戏出现嘅时间点啱啱好，系庆祝澳门回归25周年，我作为澳门人觉得好荣幸，另外就系大家姐（何超琼）揾我，去演呢套戏。」年届33岁的她又直言机会可一不可再，「我已经去到呢个年纪，我再唔拍就唔会拍，其实我细个到𠵱家一路都有人揾我拍戏，但系我都系一路系咁推，今次觉得呢个契机几好。」
澳门灯塔睇烟花超靓
戏中超莲饰演澳门生活的牛杂妹「Sandy」，她对于这角色特别有感觉，「一攞剧本觉得最特别，就系陪住我成长嘅一个澳门人，佢又系叫Sandy，就系我妈咪助手。」而她觉得「Sandy」跟自己亦有很多共通点，「佢好乐观、好开心、好活泼，比我更加勇敢、果断，我好钟意呢个角色。」故事发生在澳门，她身为澳门人觉得很有亲切感，更难得令她发现以往没去过的秘境，「就系灯塔，我以前系未去过，原来喺𠮶度睇澳门烟花系最靓，我以前系唔知，知道咗有呢个地方，如果下次澳门有烟花，可能会选择去灯塔睇，唔使同人逼。」这秘境是该片导演徐欣羡提供，最搞笑她一度怀疑，「佢本身都系澳门人，就系拍《骨妹》嘅女导演，佢讲灯塔我仲质疑佢，咩嚟㗎？！边有人去𠮶度睇烟花，我都未听过，去到发现真系㖞！哈哈！」
同此沙合作有安全感
首度跟男主角、内地演员此沙合作，超莲就大赞对方很照顾她这个新丁，令她非常安心，「我第1日开工同佢讲我系个小薯仔，请多多指教，同佢讲我要好自然先表现到，佢就会顺住我去做，好多时要跑要郁嘅戏，有可能会跌亲，佢会喺隔篱扶住我，系个好有安全感嘅男对手。」至于饰演其父亲的曾志伟，原来是超莲为自己「着想」而亲自邀请，「我知道佢系劲嘅，咁就一定可以带到我入戏嘛！」不过曾生因太忙并非一口答应演出，「佢拒绝咗我2次，最尾佢顶我唔顺。」不过有这个「爸爸」傍住，确实令她演出技巧有所提升，「佢教咗我好多喺镜头面前嘅表达，同自己就咁演戏系唔同，点样令到镜头见到你，佢教识咗我好多呢啲嘢，同埋佢唔会点跟对白做，好多嘢现场会改。」她举例「爸爸」的改动全为她这个「囡囡」着想，「好似喺花絮见到，有场我坐喺门口，佢出嚟掉垃圾嘅戏，系佢谂出嚟，原本我系入屋企，佢喺度整紧其他嘢，佢觉得畀个阴暗位我去演，等我情绪可以更饱满，令我好快入到角色。」原来客串的黄宗泽亦由她亲自邀请，「佢角色叫『周润发』，就咁听个名都知系个好有喜感嘅角色，好适合佢演，导演叫我问吓佢得唔得？我就胆粗粗问吓佢，佢又OK。佢都可以带我入角色，有啲位系要搞笑，佢就自然令到我笑到癫咗。」
狂练习剪牛杂整伤手
除揾曾志伟和黄宗泽傍住壮胆，超莲为演好角色做了很多准备，单是练习剪牛杂已花很长时间，「我𠵱家真系剪到牛杂，仲有把自己私家剪，哈哈！都整到只手好多伤，因要好俐落咁一下剪断，就好容易夹中自己啲肉，我系要做得够多，对住镜头先剪得自然，令观众相信真系剪惯牛杂，唔系姐手姐脚，经验呢啲感觉系演唔到出嚟。」电影即将上映，早前首映超莲获家人拉队支持，不过她心情依然劲紧张，「我见到网上有啲声音话，赌王千金演个牛杂妹好冇说服力，我都觉得系讲得啱嘅，但系希望大家放低呢样嘢，畀个机会入去睇吓。」她的压力主要来自票房，「好惊冇人睇，惊票房唔知点。」有了这次经验，她都想再继续尝试做演员，「我觉得好好，如果有适合剧本都会想去拍。」不过角色方面可能要小心选择，「下次或者同自己完全相反，或者完全一致嘅角色。」
