失婚8年江美仪被邀加入性爱社群：我冇咁开放 主持综艺节目影响交友进度 丨独家
发布时间：07:00 2024-12-10 HKT
53岁「视后」江美仪主持TVB综艺节目《一个香港10种玩法过节篇》，鼓励港人大时大节留港消费，由于赶到边拍边出街，自爆玩紧交友APP的她都要停低，玩了1个月未有著落，不过，她却自爆最近有SP（有性无爱sex partner）社群邀她加入。2016与吴君如胞弟吴君祥离婚，失婚8年的江美仪坚持：「我未有咁开放，唔会接受炮友关系！」因相信：「人生充满希望，我依然相信爱情。」 采访：方骞平 摄影：谭志光
江美仪率陈浚霆、胡慧冲、周奕玮、罗毓仪、萧正楠、江嘉敏等，于节目中大玩「伪日、泰旅行」、「一日环游世界」、「HK$100 扫街自助餐食到饱」、「游港庙．尝美食」…提供港人过时过节留港消费攻略。对于突然走马上任，她忍不住幽自己一默，笑说：「可能曾志伟知我得闲。」
合约延期一年「跑数」
江美仪自两年前夺「视后」后冇剧拍年半，她形容这个是魔咒：「谭俊彦都话，佢攞完『视帝』后都静咗一轮…但总会过嘅，唔紧要啦，随遇而安。不过，你问我，梗系想拍返剧啦，我一直好钟意拍剧，唔钟意嘅话，点可以喺呢行挨咁耐呀？拍剧又唔系舒服，精神、肉体、工作上都系辛苦，但自己又上咗瘾，想继续拍到好剧集。」她坦言有向公司争取过：「讲真有咁多人，工作量唔可以满足晒所有人，等经济好啲，公司多返制作，相信自然会有返嘢做，我成日谂『好嘢喺后面嚟紧㗎啦。』」她跟TVB签了一年拍20集电视剧合约，因为今年under show，年尾要主持综艺节目跑数：「呢个节目得10集，仲欠10集，所以我份艺员合约要顺延到2015年底，不过，综艺有辣有唔辣，胜在拍摄时间冇咁长，而且呢个节目好有意思，𠵱家出去食饭，好多店铺都叫晒救命，呻租金太贵顶唔住。」
小心甜言蜜语陷阱
现在江美仪趁空档经营自家媒体，做下网台、抖音，之前她于网台节目《娱乐好好玩》中自爆玩交友App，最想揾精壮「炮友」，江美仪更正只是讲笑：「我唔系谂住揾到啲乜，纯粹系好奇想试探下，究竟而家嘅世界发生咩事？点解会有咁多网骗、情骗？如果好彩嘅话，可能识到个朋友呢！」不过，玩还玩，江美仪忠告大家真的要好小心，小心再小心：「佢哋真系好叻嘘寒问暖，迎合你想听到、想见到，或者想发生嘅嘢嚟𠱁你开心，畀咗好多希望及幻想你，个个都甜言蜜语话『我哋天生一对』、『我俩好夹呀』、『系你㗎啦！』讲讲下就会有下一步…」
曾被精壮男body迷倒
江美仪以猎奇角度出发，加上识得人多又见过世面，虽然能够保持清醒状态，但自爆也曾有过迷失一刻：「有交友男知我钟意行山，就投其所好，仲传张行山相嚟，我一望心底即哗一声『副body好fit，好大只㖞，心谂：有冇咁著数咁好呀？』点知倾多两句发现唔多对路，我明明同佢讲咗今日会去跑步，下画佢就讯息问我『做紧乜？』感觉佢同时间跟好多人对答，或者唔系得一个人同我倾偈，所以唔留恋即block，我已block咗好几个。」自称玩得不够投入的美仪又分享搞笑经历：「有个问我『想唔想睇吓佢操成点？』我一口拒绝答『唔使喇！』因为我唔会send返相畀佢嘅，哈…咁大家最好蒙查查或者冇样，佢哋唔会畀你见到个样；我都试过被套经济状况，当知道收入唔多时就音讯全无。同埋唔好只系网络上交往，因为会扰乱你嘅理性分析。」另外，她自爆最近有SP群组打她主意，表示：「绝对可以满足到你嘅要求，资料保密。」对此连美仪也笑了 ：「黐线！我梗系唔会睬佢啦，我唔会接受炮友关系，女人系要有感情基础，才可以慢慢发展性关系，我未有咁开放，而且有冇伴侣都冇所谓。」
