张启乐自揭靠免费做电台主持2年挨出头 首夺金钟奖感激港人冇忘记兼送鼓励丨独家
发布时间：07:00 2024-12-09 HKT
张启乐（Ben）定居台湾5年，由零开始在当地发展演艺事业，最近终挨出头，凭主持中央广播电台节目《台味超有港》，夺得广播金钟奖生活风格节目奖，成为首位港人得到台湾广播最高荣誉奖项。Ben在台湾亲自拍片跟本报读者分享喜悦，自揭由免费主持电台节目2年，到得到奖一段不可思议经历，「呢个经历好精彩，用钱都买唔到！」采访：杜杜
Ben夺奖后最开心得到好多港人支持和鼓励，而且反应之大令他份外感动，「发现好多香港朋友冇忘记到我，有啲人话你以前做亚视、RoadShow（路讯通），又拍过过《开心大发现》、《情陷夜中环》，甚至有朋友记得我做过《粤讲粤好玩》，仲自创口头禅『不得之了』，做《开心大发现》又创咗『犀飞之利』，以为冇人记得系我创造出嚟，见到有留言咁写，真系好开心，一直以嚟支持我嘅香港朋友，衷心多谢你哋。」
感激前亚视经理人搭路
讲到决定到台湾发展，Ben早在2007年因拍戏认识当地朋友，之后朋友越来越多，加上喜爱台湾文化，2010年开始1个月起码会到台湾1次，「最高峰试过1年去台湾20次，1个月来回香港台湾4次，甚至今日由台湾返听日再飞都试过，10几年来慢慢了解同认识呢个地方，越来越觉得适合自己，好想喺度发展。」不过他当时在港一直有工作，没有扚起心肝实行，直到2019年8月他有感在港工作量大减，到台湾探望本身是台湾人的前亚视经理人林文华，向她诉苦，「佢话既然𠵱家冇嘢做，咪试吓过嚟发展，佢识咁多台湾娱乐圈嘅人，我又识咁多，咪试吓有冇公司愿意同我合作，再申请工作签证。」后来他揾到制作公司合作网上节目，再加上他过往20年演艺圈经历去申请工作签证，「点知畀我申请到3年，因呢个工作签证就攞咗3年居留，从此展开咗喺台湾发展嘅契机。」他很感激文华为他搭路，留台首年已接到电影《金不厌诈》，「系套台湾本土电影，仲要系第2男主角，系文华介绍我畀导演去试镜，先得到呢个角色，如果唔系我唔可以留喺台湾发展。」
靠美仪思浩带入广播界
Ben在台发展日子主要做幕前，先后拍了4部电影及4部电视剧，又不时参与电视台综艺节目，而能够踏入广播界，就要由他2012年被亚视炒鱿说起，「江美仪非常有义气，二话不说就介绍咗我畀梁思浩认识，佢哋当时喺数码电台主持《大家真疯骚》，我就由2013年做到2016年，呢段时间畀我学识点样运作电台节目同做主持。」2020年他突然收到电台旧同事、直播室控制员Melody电话，原来有台湾电台主持金宝透过当地新闻，得知他背景就想揾他拍档一齐主持《包公出差中》，「𠮶时我乜嘢都冇就梗系点头啦！节目逢星期日晨早6点钟做，亦都唔怕同大家讲，我做节目系冇钱，因为𠮶个广播时段系我拍档想做自己节目，所以系冇酬劳。」而2022年该电台有个闽南话节目嘉宾临时甩底，节目负责人透过金宝揾他帮手，他二话不说答应，种下有自己节目的契机，「唔知系咪𠮶次合作好愉快，或者我都表现唔错，1年后2023年6、7月度，呢位揾我做嘉宾嘅主持做咗电台管理层，想搞啲新节目就谂起我，先有机会做到呢个得奖节目《台味超有港》。」
太太家人给了另一个家
Ben回想这5年经历，最初确实艰辛，但亦庆幸有这段日子出现，「最困难一定系头1年，又疫情又由零开始，所有嘢都系要自己闯出嚟，过程当然系辛苦，但呢个经历又好精彩，用钱都买唔到，唔系有呢啲经历，唔会有今日嘅一切，所以就算系辛苦我都开心，都感恩。」讲到在台最大收获，肯定是透过朋友认识到另一半。他跟太太这段缘份，可能因大家背景有点相似，太太疫情前在日本工作，「太太一个人喺异地工作同生活，比较明白我嚟到台湾呢度生活感受，佢当时好照顾我。」2年前结婚，他感激太太令到自己真正感受到台湾是另一个家，「佢啲屋企人对我完全接纳好包容，等我喺呢度都可以有个家，有家人去互相扶持，互相照顾，令我更加安心闯我嘅事业。」而他认为得奖后一切没变，只会比以前做得更加好，「知道节目嘅人多咗，听嘅人多咗，要更加努力做好个节目。」
