尹光放低40年心结大平反：唔系咸湿歌王 80岁跟轩公同Level获博士丨独家
发布时间：07:00 2024-12-06 HKT
多得AI版尹光，80岁尹光(光B)人气急升多了人留意，尤其是年青人，光B不时在街上被疯狂「集邮」，今年初他更凭《Dear Myself》首次跟张敬轩同Level出战商台《叱咤》，两人又「前后脚」，获法国北欧大学颁发荣誉博士。「升呢」做吕博士(原名吕锡扬)的光B将收埋40年的郁结不吐不快，自爆曾当街被骂是唱咸湿歌的歌王，时至今日仍耿耿于怀的光B说：「我梗系介意啦，好唔舒服嘛！」 采访：方骞平 摄影：谭志光
承接《Dear Myself》声势，尹光推出新歌《命硬八十》唱出心声：「其实我条命都几硬，即使遇上唔如意嘅事跌低咗，会同自己讲『唔好惊，爬返起身继续做过。』除人生会有起跌，唱歌都系一样，好似旧年咁食住『AI尹光』风潮突然好多嘢做，年中工作量回落，咁冇嘢做咪去玩下啰，最近都去咗2、3次旅行。」
带动娱乐成香港icon
光B强调这样的年纪不再讲钱：「揾几多钱都冇用，带唔到落去(棺材)，得闲咪去玩下啰！够饮够食就算，但我唔会退休，因为命硬钟意继续做嘢；我亦唔使要太多荣誉，最重要身体健健康康，保持到把声唱多啲好歌带畀大家欢乐，最想做一个慈善演唱会，我一个仙都唔收回馈社会，不过，原来好难Book到场。」光B形容而家日子安安定定，是人生最开心的：「有老婆、有儿孙经已冇乜遗憾；年初时《Dear Myself》仲打入商台《叱咤》『我最喜爱歌曲』5强，人生一路一路咁起飞，甚至法国大学都畀博士学位我就更加开心，博士唔系咁易攞，尹光边有资格攞呀？但校方觉得尹光系香港嘅icon，会唱粤曲、国语歌、rap歌及讲下gag，带畀老中青好多娱乐。」尹光最觉荣幸是，2017年时法国大学也曾颁过给张敬轩：「佢个『朵』咁大应该攞，我都有份攞咪开心啰，既然攞个博士位就要更加勤力。」
《2023年度叱咤乐坛流行榜颁奖典礼》尹光压轴出场。
被当街指骂劲尴尬
「升呢」做吕博士后令光B内心郁结也解开了，他有话申诉：「以前啲人批评我唱咸湿歌嫌我市井，但𠵱家我连博士位都攞到，你话我粗唔粗俗呀？我根本就唔系粗俗，我啲歌系谐趣及踩界，香港人及全球华人都钟意听谐趣嘢，有时踩少少界系好听啲㗎嘛，成日文绉绉未必系好，正如睇大戏都有个丑生，我咪系𠮶个丑生啰，我钟意唱啲轻松歌畀大家听，但文绉绉一样掂，因为我识做大戏唱粤曲。」虽然光B唔敢讲系吐气扬眉，但坦言个人系upgrade咗好多：「至少多咗好多年青人钟意听我啲歌，甚至带动埋佢哋听返我好多旧歌，包括80年代我创作嘅《荷里活》、《数毛毛》、《雪姑七友》等；就连TVB嘅剧集《荷里活有个大老千》都改咗《荷里活》歌词做主题曲；《Dear Myself》更系内地学校嘅教学歌。」
做得唔好就要改进
因为曾被标签唱咸湿歌，尹光自爆喺初出道时，多次俾人兜口兜面话，好难顶：「试过好多次被大声骂『呢个唱咸湿歌㗎！』惹来途人目光，当时我好尴尬，唯有快啲闪…梗系介意啦，个心好唔舒服嘛…最惨为揾食不能改歌路；而家反应就唔同咗，佢哋见到我会话『尹光《Dear Myself》好嘢呀！』」另外，曾有一间百货公司顾客喺「顾客心声」中表达，不满分店经常播放MIRROR、尹光等歌手的歌，唱了60年多歌，识玩嘅光B说：「唔好理人识唔识货，既然话得我，做得唔好咪自己改进下，『曹操有知心友，关公都有对头人』啦，不论几好都会有人针对，大家要睇开啲，呢行有弹有赞，只要赞多弹就唔好介意。」
