林夏薇太入戏靠烧「卓慧云」个名抽离 首演大反派畀老公狂闹「你好坏」丨独家
发布时间：07:00 2024-11-27 HKT
林夏薇在《黑色月光》首度挑战大反派「卓慧云」，「黑化」过程令观众心寒，但薇薇大赞拍摄过程好玩，但她因入戏太深，拍摄期间变得生人勿近，她拍完要靠烧了「卓慧云」个名正式道别，才能成功抽离。不过看到观众反应好，特别是睇戏好投入，堪称「最佳观众」的老公莫赞生（Jason）狂闹「你好坏」，所有辛苦都值得。采访：杜杜 摄影：朱伟彦 发型:Hair Culture Seiko 化妆:江中平化妆室Faye Chow 饰物:Flourishan 场地:Studio meta
薇薇恨演反派多年，得知在《黑》剧有机会演「卓慧云」时特别兴奋，「第1次尝试去演反派，一路都想演，系许愿成真嘞！真系好想试啲唔同类型角色嘅感觉。」由于「卓慧云」跟她本人零相似度，演绎起来特别困难，「以前嘅角色会揾到少少共通点，『卓慧云』系完全冇，系好特别好新嘅尝试，因为林夏薇绝对唔会咁，睇返啲片都觉得当时点解会有呢个状况，一定系畀『卓慧云』上咗身，我𠮶段时间真系有种上身感觉。」
入戏如上身变了样
畀「卓慧云」上身后的薇薇，现实生活也变得生人勿近，「我私底下系好开朗好正能量嘅人，𠮶段时间系横跨农历新年，本嚟我系好注重新年气氛，𠮶时直情系六亲不认，又唔畀人嚟拜年，又唔去拜年，屋企所有人都好惊我，就算化妆师都觉得我个眼神变咗，由内而嚟嘅眼神同平时嘅林夏薇两个样。」以往她试过为专心演好角色，跟老公分房瞓，今次情况更严重，「今次冇话特别要分开，但系我全个人系分开咗，好似与世隔绝咗，灵魂好似出咗嚟，屋企工人姐姐都好惊，我喺屋企又唔讲嘢又唔笑，感觉好阴沉，𠵱家睇到个剧工人就明，𠮶时发生咩事。」不过 Jason却好习惯，老婆每次为角色会变成另一个人，「佢惯咗我呢种状况，好多谢屋企人嘅包容，演员都系黐黐哋线，要好喺戏剧状态入面，辛苦佢哋，唔使拍剧就陪多啲佢啰！」
要同角色做告别式
薇薇觉得拍摄过程好玩，特别是「黑化」后的情节，「慢慢去到所有人都为敌时，𠮶种战斗力系好强，演呢个角色时候好虐心，但系都好爽。」亦因为太投入角色，她一度好难抽离，「演嘅时候好多场戏印象好深刻，去到大结局有场拍完后行出个景，成个人崩溃喊到停唔到，导演同茜尧走过嚟揽住我话『冇事冇事拍戏咋』，我都知系拍戏，但系𠮶吓我都需要抒发，爆发晒啲情绪出嚟。」她认为演「卓慧云」最困难是情绪要保持低沉状态，拍完要跟角色进行「告别式」，才能成功抽离，「拍完后有好长时间喊唔到出嚟，系好难受好压抑，我未试过一个角色，演完后要正式做个仪式道别，但系『卓慧云』系要，我要揾张纸写佢个名烧咗佢，我哋要暂时bye bye，我太入戏嘞！」
首演床戏最难演绎
薇薇除了跟杨茜尧继《收规华》后相隔9年再合作外，跟郭峰、王浩信和马志威都是初次合作，大家合作都相当有火花。不过她认为最难处理是跟马志威和王浩信的床戏，「呢个系我最惊，我冇拍过呢类戏，要我去做啲情感波动系一种难度，呢种又系另一种难度，好多谢佳导（钟澍佳）佢亲自示范，佢做我个位，同两个男士去试戏，哈哈！」问到剧中性感睡衣事前有冇畀老公过目？她竟然话是跟老公一齐拣，「𠮶套衫系我自己买，咁啱我同老公去美国做嘢，我睇咗剧本有呢场戏，专登揾有冇啲适合嘅衫，所以佢知道有呢件衫。」她又强调拍亲热也不用问老公意见，「我唔需要同佢申请，佢知道有呢啲场口，我系个专业演员，佢都知道老婆系个戏痴。」他又大赞老公是个「最佳观众」，「佢系好代入嘅观众，今次睇佢猛话『你好坏，你点解会咁坏』，𠮶时睇《收规华》，佢睇到好难受会失眠，因为见到佢老婆好惨，又畀人卖去妓寨，哈哈！佢系真个好好嘅观众。」
