马志威感激杨茜尧林夏薇任叉颈摸面演出 自揭成「渣男」专业户主因丨独家
发布时间：07:00 2024-11-26 HKT
马志威继内地剧《三十而已》后，在《黑色月光》再演「渣男」角色，不过他完全不介意演反派，因心目中「蒋基俊」是个悲剧人物，他又自揭成「渣男」专业户主因。讲到跟视后杨茜尧和林夏薇首合作，他大呼过瘾，更感激两女对他极信任，就算提出叉颈及摸面演出要求，她们都一口答应，极之配合。采访：杜杜 摄影：朱伟彦 形象:Dom CHEUNG 发型:Alex SO@the attic 化妆:Sakura 服装:@dunst_official @fdmtldenim @lanecrawford
内地已播毕《黑色月光》，马志威感恩反应极好，「多谢观众！多谢大家嘅谩骂！哈哈！」对于被闹他绝不介意，「都系闹『人渣冲落厕所』𠮶啲，我OK、接受到嘅，好多谢佢哋谩骂又好，赞赏又好，多谢佢哋咁投入睇呢个剧，佢哋憎呢个角色咪啱啰，呢个角色系讨人厌嘛！」他又开心观众睇得出「蒋基俊」的变化，「开头啲观众闹得佢几甘，之后有个反转，见到大家同情『蒋基俊』㖞！临尾『蒋基俊』出返嚟唔同咗，有嘢在意、有包袱，唔系以前肆无忌惮嘅人，有包袱就注定失败，见到观众睇得出呢个分别，都好惊讶佢哋睇得咁细心。」
演反派冇框框够过瘾
对于演反派角色，马志威完全不介意，反而认为可以有更好发挥，「做得演员就唔会有框框，反而观众认为嘅反派，对演员嚟讲仲好玩，再易做啲，正派反而有个框，不能太过份，反派系冇框，『蒋基俊』系钟意玩，钟意乱嚟，所以我投入角色系用紧玩同乱嚟嘅心态演，过瘾好多。」继《三十而已》后再演「渣男」，更被封为「渣男」专业户，马志威就笑着自揭制作人爱揾他演的原因，「我个样天生衰啰！哈哈！唔系点啫！一定关事，佢哋话我个样线条好分明，好恶咁，某程度上都系优点。」被指样衰他一样好受落，「呢行大把靓仔，我都唔系靓仔，冇所谓啦！」39岁的他又坦承状态大不如前，「𠵱家年纪开始大，有时觉得左眼冇力，会鸳鸯眼，最近拍戏又多条疤，块面又多咗皱纹，都要接受自己，都39岁，每个人都会老，我好接受自己呢个样。」
赞杨茜尧够man易合作
对于跟两位视后合作，马志威好开心，反而冇压力，「合作得好愉快，多谢阿怡同薇薇信任我，因为我喺现场会抛好多意见，因为『蒋基俊』系会乱嚟，演𠮶阵唔可以咁循规蹈矩去思维。」讲到杨茜尧气场劲，他就答得搞笑，「我个气场都唔弱㗎！唔会蚀畀佢，同埋呢个角色唔可以惊，做咩要惊佢啫，『余满月』系『蒋基俊』边个啫？！佢除咗老窦冇嘢怕㗎㖞！如果我有怕呢个心态，演唔到呢个角色。」他又自爆私底下跟杨茜尧有暱称，「我叫阿怡做怡哥，佢好man，系好爽直嘅人，佢就叫我灰太狼。」他赞跟茜尧合作过程极愉快，「我第1场同佢嘅对手戏，就系喺office叉颈𠮶场，我觉得有需要就问佢咁做得唔得呀？怡哥话『冇问题呀，你系叉就大力啲𠻹呀』，佢𠮶种爽直，系令到我演得好舒服，好多谢佢畀呢个信任度我，令我可以放胆去做。」
惊讶林夏薇入戏好深
讲到剧中「老婆」林夏薇，马志威见到对方投入「卓慧云」程度，都有点吓亲，「喺现场见佢咁低气压，有时我都叫佢返嚟呀，拍戏咋！佢好into个角色，我都好惊讶，同埋佢都真系演得好好，有几场都觉得平时林夏薇唔系咁，真系完全唔同感觉㖞！」跟薇薇对戏过程，他一样有赞无弹，他最深刻要数剧集尾声，「卓慧云」杀「蒋基俊」一场戏，「虽然我喺戏入面成日话好讨厌佢，但系其实系好爱佢，要几爱一个人，先会几憎一个人，佢系曾经进入过『蒋基俊』个心为数不多嘅人，对『蒋基俊』嚟讲佢系好重要嘅人，临尾佢杀我𠮶场，讲我绑咗佢喺侧面望住佢醒，后尾我加咗个动作，我摸佢块面，但系𠮶个摸系充满爱意，有个复杂性喺度，呢个就系薇薇信任我。」
