杨茜尧首爆与「撞肩宿敌」胡定欣秘密关系 乐意拍现实版花旦恶斗剧丨独家
发布时间：07:00 2024-11-22 HKT
TVB台庆剧《黑色月光》剧情越来越入肉，「Moon姐」杨茜尧凶狠、仇恨、鄙视、凌厉、失焦的复仇眼神，自然流露的奸笑令人不寒而栗，连结了婚8年的罗子溢都睇到心寒，怀疑老婆是本性演出！杨茜尧咁好戏，坦言不介意同流传中「撞肩死敌」胡定欣上演现实版《宫心计》斗戏。重提两人14年前的不和传闻，杨茜尧拆开当中谜团，还向《头条日报》揭露一个冇人知的秘密… 采访：方骞平 摄影：朱伟彦 发型：Jan Chiu @ Il Colpo Pacific Place 服装：@marella_official @marellahk 场地：都会海逸酒店
相隔6年重返娘家拍剧，杨茜尧要做台好戏，登顶视后级演技获网民激赞。她却说：「其实今次系我拍戏以来最多内心戏，但冇谂过个剧反应系点，拍时只系谂住角色背景好沉重，唔使用言语去交代身世，相反用表情行为表达多年来忍辱负重嘅嘢，所以每个场口有唔同嘅眼神，特别系KO仇家。」
凶狠演技令老公心寒
她指老公罗子溢见惯大场面没被吓亲，不过就入戏到对老婆有质疑，杨茜尧爆料指：「佢竟然对我话『哗！你好恐怖呀！其实会唔会𠵱家先系你嘅本性演出呢？你同我结咗婚咁多年，你系咪一直做紧戏扮贤妻及好妈妈？』」杨茜尧坦言，现实中每个人都有疯狂谂法：「好似𠮶场带马志威去天台巡查地盘戏，其实戏里戏外都会幻想推佢落去，我同马志威讲『我置身呢个环境状况，会谂如果我将身边人推落去会有咩感觉呢？出边人有乜反应？』佢都吓一吓反问『你坚(咁谂)㗎？』
向「宿敌」下战书唔让奖
对于全城睇好她接佘诗曼捧做视后，她强调个人好简单，不会有好大的奖项争取欲，但信心一定有：「重返娘家都会有期望，剧中有咁好嘅效果已超出咗期望中预算。」不过，她认为每个演员拍剧都会付出好多心机，坚持不让奖：「冇理由唔投畀自己呀？所以千祈唔好留守，将呢票投返畀自己。」被指向对撼的「宿敌」胡定欣下战书，茜尧乘机厘清两人关系：「胡定欣从来都唔系宿敌，其实每个演员都好努力做，都有吸引嘅地方，就算系都系良性竞争。」
澄清同胡定欣无心病
提到最近翻HIT 2010年台庆中，杨茜尧疑似用肩撞兼藐爆身旁的胡定欣，之后传足两人不和14年，茜尧重提都形容是得啖笑：「我哋从来冇不和，只不过啲好经典嘅片段喺网上流传咗好耐，唔讲又唔会记得啰，但一讲就记返起『𠮶条片呀！』仲有啲GIF表情动画，咁我又衰嘅，𠮶时啲表情都要检讨吓呀。哈…但唔会改呀，啲表情系我㗎，因为我系我，就算今时今日都系会咁做，我唔会后悔做过嘅嘢，因为我冇做任何嘢，只不过当时系同子珊讲紧嘢嘅动态，(事后有冇同定欣提返？) 都唔系咩嘢有乜好提呀？其实我哋大家心照，知道唔系𠮶啲嘢，只不过传闻流传出嚟。」茜尧强调不怕会有心病，她更爆出一个秘密铁证两人并非仇家：「其实定欣做畀我嘅结婚人情系好夸张，好厚㗎！事实真系冇不和，冇就可以坦荡荡。」杨茜尧预了今年台庆颁奖礼会一齐坐，她还幽自己一默：「到时我又可以重演一次(撞肩)笑下先！」另外，网民话可以将两人内斗拍成一套TVB现实版《宫心计》，杨茜尧举脚赞成：「真系开拍都有绰头，OK几好玩呀，剧中会有好多女人，有好多肶踭事件出现啰…我会邀请剧入面撞薇薇，好犀利嘅姊姊杨卓娜演胜利一方；反而未谂到自己做乜角色，当然都会拉埋薇薇入局，至于定欣就睇下佢个期先。」
