胡定欣拍《巾帼》压力大有阴影：相都唔敢睇返 封黎耀祥做「QC祥」助执靓演出丨独家
发布时间：07:00 2024-11-21 HKT
胡定欣因邓萃雯辞演《巾帼枭雄之悬崖》，要开拍前1个月顶上演「七爷」，准备时间不足，兼且《巾帼》系列属「名牌」，令她压力倍增，曾边拍边后悔，甚至拍完都不敢睇回该剧的相，连早前再着戏服都感受当时压力。幸好能跟黎耀祥第8度合作，她更被祥哥为「QC祥」帮手执靓今次演出。采访：杜杜 摄影：朱伟彦 形象:Queenie Yu 发型:Matt Chiu@XENTER SALON化妆:Davina (Cyrus Lee Makeup Team) 服装:Stella McCartney场地:Studio meta
定欣虽然已第3度演出《巾帼》系列，但依然觉得很难掌握编审张华标的剧本，除了要重复去睇剧本，还要揾跟标哥多次合作的祥哥一同研究，「尤其是睇剧本嘅时候，因祥哥比较熟悉同理解标哥写嘅剧本，佢有演过作为男女主角嘅岗位，有经验去带领住成个剧，虽则我第1、2次都有份演，但当时都系个小角色，未需要承担咁多，所以睇剧本或者去理解时会产生好多疑问。」拍摄时除时间紧逼，跟祥哥的争论戏亦有一定难度，「系其中一part最大挑战，同过往几套演嘅女强人，不论故事情节或者剧种，未必需要表达情感去到咁高level。」
曾怀疑自己后悔接拍
《巾帼》系列已成为「名牌」剧集作品，定欣坦承由接拍到宣传不同阶段都有压力，「啱啱大众知道我去接手拍呢个角色时，有当刻嘅压力，去到拍就面对自己演出嘅压力，去到出街开头系期待多啲，去到真系要播𠮶日，突然间就好紧张，会谂观众嘅评价或者反应系点样，到𠵱家都播咗一大半，放下咗呢份担忧，呢套戏畀我嘅经历同感受实在太多。」她更自爆在拍摄中途，一度后悔接拍，会有怀疑自己的负面情绪，「戏里戏外，我都有好多情绪嘅波动，某啲阶段都有出现过一啲负面嘅，反问自己今次接呢个角色系唔系一个正确决定呢？压力大时就会咁谂，我系咪好傻呢？系咪唔应该咁做？系咪点样做都唔会被认同或者唔会有人钟意睇？」不过她最终都能掉低坏情绪，可惜原因好无奈，「唉！因为听日仲有好多场戏要拍，快啲努力睇好啲剧本，唔好谂咁多无谓嘢，冇咁多空间去谂，谂办法做好就系最好。」
未有想凭「七爷」争视后
入行超过20年，定欣今次拍《巾帼》是压力最大，负面情绪最多，甚至拍完作品后仍有阴影，「拍完嘅大半年时间到播出街，我都唔敢同唔想睇返呢段时间嘅相，因每次睇返都会谂起𠮶个压力。」她就连早前为剧集做宣传，穿回一场「七爷」除衫叫「柴十七」做3日自己的闹交戏服，心情亦受影响，「点解呢段戏我咁钟意，因为戏里戏外都有𠮶份压力，系好有重量，只不过系件白色喱士衫，前几日商场宣传着，都令我谂返起拍摄时𠮶个压力，净系着𠮶件喱士衫咋㖞！」《巾帼》系列过往令不少演员得过奖，但她今次未有想太多，「观众嘅反应大于一切，真心希望观众钟意『七爷』同『柴十七』嘅发展、感情，大家讲声好钟意，已经好开心。」
跟祥哥恐难再有合作
讲到第8度跟祥哥合作，《巾帼》系列亦已第3次拍档，定欣认为是个很难得的缘份，「10几年前喺呢个系列我演『海棠姑娘』，谁想到10几年后有机会担当呢个系列女主角，同祥哥演返呢个系列第4个故事，原来同呢个系列有个好奇妙嘅关系或者缘份，亦都同时间系跟祥哥嘅缘份，可以去到咁样，第8次合作都仲要系拍《巾帼》㖞！」今次能顺利演出，她庆幸有祥哥傍住，「我仲有呢个智囊团、QC喺我侧边，QC祥呢个名都几好，哈哈！佢系好清楚，呢个剧或者标哥嘅剧本要点样去演，先可以达到𠮶个效果，我系要同时间交学费。」不过她坦承跟祥哥未必再有第9次合作机会，「当然我唔可以替佢讲说话，但佢倾偈时讲，拍埋呢套剧都未必再拍剧，佢暂时都想做吓戏剧以外嘅嘢，拍吓饮食节目，做吓直播，开开心心同阿嫂游山玩水最舒服，可能佢已经创造咗咁多经典角色，令到佢暂时有咁样嘅选择。」
