周吉佩放唔低对张继聪心结：做咗蠢事 开「第三人生」个唱谈半生撞板事丨独家
发布时间：07:00 2024-11-14 HKT
年半前赢得《中年好声音1》冠军的周吉佩（吉吉）依然爆红，挟住人气月底于麦花臣球场举行「第三人生」处男个唱。吉吉回望两次出道做歌手曾撞过不少板，自爆初出茅庐时对不住张继聪，令他难堪，回想起还耿耿于怀，自责说：「我真系好蠢！」幸而经历及智慧累积教他沉稳地重返「第三人生」舞台，即使最近被街坊抨击「冇人识」，吉吉都能从容面对，坦言多谢阿Bob(林盛斌) 的提点。 采访：方骞平 摄影：朱伟彦
38岁周吉佩早于2007年夺得有线歌唱比赛亚军入行，但歌手梦不够一年就玩完；2015年他再以乐队sp’ACE队长兼主音出道，后来因理念不同而散Band；直至年半前参加《中音》封王后，有机会出单曲及开个唱：「好彩个唱反应好好，门票喺一日间售罄，少咗票房压力。」个唱中吉吉除会唱自己及sp’ACE嘅歌外，仲会选唱一些陪住成长的好歌，甚至入行前做商场驻场乐队常唱的国语歌，包括五月天《第一天》及光良的《童话》等。
年少气盛提出散Band
人到中年的吉吉展开「第三人生」，回望半生，都令他有得著，尤其「第一人生」悲喜交集的学习期：「当年歌星梦好快被打沉，2010年转行做媒体，公余时间做乐队出音乐。」不过，吉吉最深刻的，反而是曾经对张继聪做了件傻事：「转做媒体时只系得22岁，冇乜人生经验唔懂得同人沟通，最记得𠮶次被委派做张继聪专访，我以为自己好有趣，劈头就介绍系『谢安琪老公张继聪』，期间更直接引用网民评语『废柴老公』去追问佢，虽然佢好Nice冇黑面，但事后我就畀上司怪责冇礼貌，呢件事至今依然耿耿于怀。后来听到森美大哥传授做人访嘅心得，最忌系冇礼貌令嘉宾难堪，所以觉得自己真系好蠢！」放唔低心结的吉吉曾经在一个电台节目中提过，及后阿聪反过来安慰他，传讯息话：「件事都过去咗啦，唔记得喇。」至于「第二人生」撞板事件，就系跟乐队成员意见分歧闹到火红火绿，为了啖气即使队Band渐有起色都坚持唔玩：「当年视sp’ACE系人生最后嘅演出机会，突然间冇咗变得好抑郁，花咗好多时间释怀，𠵱家睇返件事觉得系好结果，至少唔系咁样，就唔会有机会展开『第三人生』，而且学会待人处事变得更成熟。」
唔理抨击做好自己
踏进「第三人生」的吉吉，坦言都试过做得唔好：「《中音》后面对网民嘅负评，特别系攻击埋我家人，我为咗保护屋企人就好嬲咁反击，激动到连老婆都反问我『点解咁抵唔住颈？唔好咁冲动！』」对于最近他在将军澳一个商场内举行个唱记招，竟有将军澳嘅街坊喺FB，以「无人识你㖞」为题出po，取笑吉吉知名度唔高「冇人识」，而周吉佩在帖文留言回应：「多谢将军澳主场呢个post，由原本我冇乜人识，𠵱家多人留意咗，Thanks so much！」获赞高EQ的吉吉重提旧事，坦言是受到阿Bob影响：「佢教过我话『有价值先会俾人讲，好似佢咁俾人攻击完会突然多咗3个广告，所以唔使担心，作为艺人系要娱乐大家，就算俾人闹当开心下。』所以呢年嚟我都系做好自己，正评亦越来越多。」另外，问到「第四人生」是否要更上一层楼，进军红馆开个唱？吉吉自爆道：「其实早喺初入行做新人时曾写纸飞机将红馆梦飞出去，仲低能到希望半年后可实现，真系天方夜谭，做歌手好唔容易…所以都系顺其自然，做好眼前嘢。」
