《小丑：双疯》我们都是小丑女丨头条戏场
发布时间：06:00 2024-10-07 HKT
电影负评多到癫，有人嫌过多歌舞场面，又话法庭戏冗长，19年上映的《Joker小丑》内好癫好丧的小丑去咗边?极速被纳入「我睇咗啲乜」电影类别，观众爆晒粗，好嬲好嬲。其实《小丑：双疯》拍摄前导演Todd Philips一早讲咗会将音乐歌舞贯穿故事，不过知同接唔接受是两回事，片长138分钟，唱住演玩足大半场，的确有几严重的观影疲劳，但形容电影是烂片、垃圾就真心过份咗，斋睇Arthur/小丑(Joaquin Phoenix饰)如何以为得到爱再被离弃，然后觉悟除下面具，教授级演绎一个真实灵魂不被接纳的阴功猪，睇佢就够。(刚上映)撰文:廖思慧
Joaquin Phoenix较上集更瘦，如中童身形，导演对佢心悦诚服，「佢系非常敬业嘅演员，我哋喺早期就讨论过佢要为角色再次减磅，同时亦曾提出：『嗯，有一个版本，Arthur唔使好似上集咁瘦，因为药物影响，而且佢被监禁，冇运动，唔使行楼梯，我可以解释到佢点解冇咁瘦。 』但Joaquin 说：『不，不，绝对不行。 』事实上，佢想比上集更瘦。」另外，戏中大量歌舞场面，Joaquin为演好角色跟排舞师苦练几个月，最后跳得似模似样。
绝望地DARK
的确更瘦更干又烟不离手，Arthur在精神病监狱等候服刑，期间遇到主动亲近的小丑女Lee (Lady Gaga饰)再秒速坠入爱河。自细缺爱的Arthur被初恋冲昏头脑，就算律师笃爆Lee讲大话，为求埋身，明明出身富贵就扮低等人，因为好爱好爱，Arthur选择接受，大量歌舞场面就出现在Arthur恋爱期间。然后当Arthur以为自己终于有人爱，想除下小丑面具做回Arthur，先发现小丑女及一众在法庭外支持的Fans只是爱小丑，你做返正常人，我点解仲要钟意你?电影角度就是Arthur 的内心世界，觉得难睇，好失望的，或者正是导演想要表达的：「No one cares about Arthur。」即是你人设跟我想的不再一样，所以我不要你了。
不用争，大家好，我们都是嗜血又自以为高高在上的小丑女。
