《撞鬼遇到爱》泰式爆笑人鬼恋丨头条戏场
更新时间：06:00 2024-09-26 HKT
发布时间：06:00 2024-09-26 HKT
发布时间：06:00 2024-09-26 HKT
字体大小
泰国鬼片好出色，恐怖爱情剧种亦好好睇，甚至灵异爱情喜剧亦相当精彩，属后者的《撞鬼遇到爱》就荣登泰国本年度爱情喜剧票房No.1 !泰片套路，男女主角必属后生靓仔靓女， 加上一班负责搞笑的配角，《撞鬼》亦是，演女鬼的阿浓(Bow Maylada Susri饰)有泰国张员瑛之称，又甜又靓又好身材，而男主角阿祖（Sutthirak Subvijitra饰）(暱称Gee)同样有副靓偈兼Model型仔样，爱情加灵异加无聊但好好笑的媾女情节，全片125分钟，笑足大半场，其实几抵睇。(上映中) 撰文:廖思慧
嗱，戏中阿祖更加有型，睇相差少少。
阿浓吓人都走可爱风，导演都话拍到唔想嗌Cut！
男女主角够靓，其实故事真系唔使太复杂，泰国导演Komgrit Triwimol就醒目，一间旧屋加一Pair靓人及一堆笑料，够做啦。阿祖系一位打机直播主，以打机为职业，争人周身债，因为有长辈仙游意外继承一栋位于郊区的残爆旧屋，阿祖谂住变卖还债，但屋又旧又偏僻，甚至住咗三只鬼，就算揾师父作法都赶唔走。
阿祖同阿浓好大胆，人鬼恋恋到落酒吧玩。
阿祖谂咗好多方法同阿浓去拍拖。
鬼屋门口有棵大树，两人密会胜地。
睇背景都甜到爆。
女主角好靓
富贵险中求真系度度都啱用，穷鬼阿祖同三只鬼讲数，希望合作吓人赚钱，鬼屋极速变主题乐园，然后多得KOL玩完力推，鬼屋一夜爆红，入场费赚到笑，笑料开始越嚟越多，期间，阿祖发现爱上索鬼阿浓，由秘密在鬼屋谈情到出街拍拖，尾段开始有啲失控，导演甚至癫到玩埋前世今生，但唔太影响剧情。
电影有鬼但一啲都唔恐怖，有好多笑位又有冧女位，估唔到配乐都几好听，咁人鬼恋系老土㗎，但娱乐性丰富，男女主角互动真系好甜，根本系一套甜爆爱情喜剧。
