有AI辅助，ESG顾问价值何在？｜林一一

上个月，我个同事将一间大型股上年出咗嘅ESG报告、联交所嘅新气候规定，再加几份同业报告，一次过掟俾AI，叫佢帮手为呢间公司写今年嘅气候章节。

二十分钟之后，初稿出嚟喇。四大支柱齐晒，governance、strategy、risk management、metrics and targets排得整整齐齐，用字仲规范过我见过唔少顾问交嘅版本。当然有错：作咗几条唔存在嘅条文出嚟、一个排放因子用错咗地区、几个唔适用于香港既assumption。但呢啲错，一个有经验嘅同事半日就执得返。

我望住份初稿，我做得到，客户自己个team都做得到。佢哋唔会通知你，亦都冇需要通知你。只系明年续约𠮶阵，以往几十、甚至过百万既报价单，好有可能会静静鸡细咗一截。

𠮶一刻我个同事都开始明白，如果份报告唔系必须佢写，客户俾我地嘅钱，到底买紧啲咩？

最有钱嘅客，最先唔使你

好多同行以为，AI最先冲击嘅系细价股市场：预算细、要求低，客人用免费工具就交到差，现实却啱啱相反。

大型股由2026财政年度开始，要强制按新气候规定披露：scope 3、情景分析、财务影响，样样都要写。要求最严、工作量最大、条颈最痛，所以佢哋最积极将AI摆入流程。佢哋有内部可持续发展团队，有IT预算，有数据，连联交所自己都推出咗AI驱动嘅年报平台。天时地利人和，齐晒。

反而细价股会继续请顾问「代写」，因为佢哋嘅目的系将责任外判，而唔系纯粹代写。于是一个好讽刺嘅画面出现喇：单价最高𠮶班客，最先唔再需要传统嘅顾问服务。而佢哋，偏偏系我哋成盘生意入面最赚钱𠮶part。

我哋一直收错钱

要答返𠮶条问题，先要老老实实拆开过去嘅收费。一份大型股ESG报告嘅顾问费，究竟俾咗落边？老实讲，大部分系劳动力：追附属公司交数据、砌benchmark、起稿、对framework、执格式。一百二十页、几百个数据点、十几间附属公司，所以贵。

AI食咗嘅，正正就系呢一part。所以价钱向下调，唔系市场唔公道，而系客户终于睇清楚，自己一直买紧啲咩。更加唔舒服嘅真相系，报告本来就唔应该系高单价嘅理由。一份ESG报告，只系一间公司一年嚟做过啲咩嘅纪录。纪录写得几靓都好，都只系纪录。如果公司根本冇落实，顾问写得越靓，份报告同现实嘅距离就越远。

AI做嘅，只系将写报告嘅成本压到近乎零，令呢个真相再冇办法遮住。咁顾问应该收钱嘅，系啲咩？我认为得两样：消化，同推进。

读到，唔等于消化到

可持续发展嘅概念，更新得快到离谱。ISSB、香港准则、转型计划、TNFD、内地嘅双重重要性、鉴证框架、scope 3嘅计法、碳市场……每一样都有咨询文件、有指引、有同业做法，年年都变。AI可以帮你读，仲可以帮你摘要。但「读到」同「消化到」，系两回事。

消化，系答三条AI答唔到嘅问题：第一，呢样嘢对呢间公司代表咩？同一份转型计划指引，对一间地产商同一间银行，意义完全唔同。

第二，几时要做？边啲两年内会变强制，边啲只系一阵风，边啲可以企定定先睇下。

第三，先做边一步？资源有限，董事局嘅耐性更加有限。排好先后次序，本身就系价值。

大型股嘅内部团队，大部分时间都俾今年嘅合规食晒，好难同时追住三年后嘅方向。顾问同时服务几间公司、几个行业，见到个趋势喺边度成形；亦见过同一个问题喺第二间公司点样处理，边度行得通、边度已经有人撞过板。呢种跨公司嘅视野，一间公司嘅内部团队加埋AI，都复制唔到。

知道，唔等于做到

消化完，仲有更难嘅一关。史丹福两位教授Jeffrey Pfeffer同Robert Sutton写过一本书，叫《The Knowing-Doing Gap》。佢哋研究咗大量企业，发现一个好尴尬嘅事实：企业唔系唔知道应该点做，而系知道咗都唔做。阻住佢哋嘅，唔系知识不足，而系讲嘢代替咗做嘢、惊错、内部角力。

呢段描述，放喺今日香港嘅大型股身上，准到有啲恐怖。一间大型股要真正回应气候风险，牵涉嘅部门远远唔止可持续发展部：财务部要将气候假设放入减值测试同资本开支；采购部要同供应商交换排放数据；人力资源部要谂下减碳目标应唔应该同管理层花红挂钩；董事局要有定期检视嘅机制。每一步，都系人事、诱因同部门之间嘅角力。

AI可以写一份完美嘅落实计划出嚟。但佢冇办法召集五个部门开会，冇办法喺会上追进度，更加冇办法喺CFO讲「明年先算啦」𠮶阵，攞同业嘅做法出嚟同佢拍枱。

顾问嘅角色，系以一个外人嘅身份，推郁内部嘅改变：设计管治架构、定时间表、每季跟进、喺卡住嘅地方揾出原因。呢份系一年四季嘅工，唔系年尾赶一份报告。最搞笑嘅系：当落实真系做到咗，份报告反而系最易写嘅嘢。到时交俾AI写，完全冇问题。

顾问自己都要升呢

咁讲，唔代表顾问可以舒舒服服咁转型。啱啱相反，要求系高咗，唔系低咗。我哋要读，而且要读得早过客户、深过客户；要识财务、识营运，先有资格同CFO、COO对话；要接受以落实成果，而唔系以报告页数，嚟衡量自己。收费模式都要跟住变：由「一份报告几钱」，转做「一年推进计划几钱」。

呢个转变唔会舒服。习惯咗按页数收钱嘅人，要重新证明自己值呢个价。但如果我哋唔自己先拆，客户同AI都会帮我哋拆。

返到𠮶份初稿

返到𠮶份二十分钟写成嘅初稿。如果份报告唔使我写，客户俾我嘅钱，到底买紧啲咩？我而家嘅答案系：佢哋买嘅，系有人帮佢哋睇清楚而家发生紧嘅变化，判断边啲同佢哋有关，然后陪佢哋喺公司入面，一步一步将件事做出嚟。
讲起嚟，𠮶份初稿其实帮咗我一个大忙。AI将竞争大型客户嘅门槛大幅提高，唔再系有手、识写字就系可持续发展顾问，写咗份报告就当帮公司做咗嘢。

林一一