当写作变到冇成本，ESG披露嘅价值几何？｜林一一

上个月我做咗个实验，做完之后有几日唔想同人讲。

我攞咗一个旧客去年嘅ESG报告，连同佢今年嘅碳排数据、几份会议纪录、一份人力资源统计表，全部喂咗落个AI model，叫佢出今年𠮶份报告。40分钟后，出咗1份70几页、结构完整、对得返港交所Appendix C2、语气得体嘅报告。连「本集团深明气候变化所带来嘅挑战」呢类句子，都写得比我顺。我逐页睇，改咗大概一成。

呢件事嘅可怕之处，唔系「AI抢我饭碗」。呢个讲法太窄，亦太自我中心。可怕嘅系如果我40分钟做得出，全香港2,000几间上市公司都做得出。而当所有人都做得到，呢份报告就好难再成为公司能力的证明。

一级荣誉人人攞到 等于冇人攞到

我哋一向有个假设：一份好嘅ESG报告，反映一间好嘅公司。但份报告写乜，系公司自己讲嘅，佢想点写就点写。所以呢条因果关系，从来都唔系靠内容成立。至于佢靠乜成立，谂返读书𠮶张沙纸会易明好多。张沙纸其实分两层。

第一层：有文凭，定系冇文凭

呢层分嘅系「你挨唔挨得起四年」。有人屋企供唔起、有人半途要出嚟做嘢、有人根本入唔到。所以请人𠮶个见到你有张文凭，起码知道你挨得起。但呢层有个前提：唔系人人都有。假如政府听日立法，全民18岁自动派一张大学文凭，张纸即刻乜都证明唔到——唔系因为佢变差咗，系因为人人都有。

ESG报告嘅第一层，早就系咁。出ESG报告一早已经系上市公司必须做嘅事，有无报告基本上已经不能够分别任何公司表现嘅好坏。而早几年前开始，港交所将气候相关披露提升至不遵守就解释嘅程度，大部分上市公司都开始有气候相关嘅披露，用气候披露去区分上市公司披露质量的有效性开始收窄。

第二层：一级荣誉，定系三级荣誉

真正仲有分别𠮶层，系第二层。同样读四年、同样攞一张文凭，但有人交到一级荣誉嘅功课，有人只交到三级。呢层分嘅唔系你挨唔挨得起，系你四年入面究竟做过乜。ESG报告嘅第二层，就系我哋成行嘅生计：份报告有几实、数字有几齐、覆盖有几阔、讲嘅嘢追唔追得返落实物证据。

但呢层一直有个弱点，行内人都知：呢张成绩表冇考官、冇人监考、冇人出卷，系你自己做功课、自己交、自己话自己攞几级。

以前呢个弱点唔算致命，因为做功课本身好贵。一间本身有数据、有系统、有人跟开嘅公司，做份靓功课悭好多力。一间咩都冇嘅，就要由零开始砌——追数、补做、圆场、拗到最后夹硬写。同1份70页，两间公司嘅痛楚差好远。挨得起做到一级𠮶批，同勉强交到三级𠮶批，自然分咗开。

而家有一部机，任何人交上去嘅功课，都出到一级水准。有效嘅讯号就系咁死嘅。唔系因为冇人做功课，系因为人人都攞到一级荣誉。

唔系样样嘢都平咗

呢度先系我觉得最值得谂𠮶点。一份ESG报告，粗略分两件事：「写」同「度」。「写」系组织架构、风险分析、管理方针、未来计划、董事长个致辞。「度」系部电表行咗几多度、架车烧咗几多油、37个供应商每人排几多吨碳。

AI令「写」𠮶半变到近乎免费。但佢一蚊都冇令「度」𠮶半平过。你间厂部电表仲系要有人去抄，中电张单仲系要有人去攞，你𠮶37个供应商仲系要有人逐个追填问卷——而佢哋仲系唔覆你。

当一样嘢免费、另一样照旧贵，人就自然会多做免费𠮶样。所以报告会越出越厚、越出越靓，但入面每100句，有几多句系你揸得住一张实体证据嘅——一个电表读数、一张单、一份第三方报告——呢个比例会跌。

「睇」𠮶边都塌紧

同一时间，另一边都出紧事。以前报告系写畀人睇——分析员、银行、指数公司、记者。而家越嚟越多系机器睇：评级商用程式抽、银行用程式初筛，冇乜人真系由头揭到尾。于是出现咗一种新嘅粉饰：报告写作方式系为部机写。
呢样同以前嘅greenwashing唔同。以前系写堆肉麻说话呃人，人读得出。而家就好似当年啲网站塞关键词畀Google揾到咁——将字眼、句式、摆位排到机器最容易抽得中。人读落完全正常，甚至有啲闷。你捉唔到痛脚，因为佢冇讲大话，佢只系将关键字摆咗喺机器最容易见到𠮶个位。

更麻烦系第二层：部机分唔到「已经证实」同「只系谂住」。摆两句嘢喺埋一齐你就明：

一、「本集团范围一排放为12,340吨二氧化碳当量」
二、「本集团预期于2030年前达致营运碳中和」

第一句有人追得返落原始数据、写错要负责。第二句系一个打算，冇人孭镬，改咗都唔使公告。但喺机器眼中，两句都系「本集团⋯⋯」开头嘅陈述句。一齐被摘要、一齐被引用，语气一样咁肯定。而下游读到𠮶个人，唔会知有一句系实、一句系虚。

（利申：我自己而家就系喺度紧同呢个问题有关嘅产品，所以你可以抱著多d质疑嘅态度去理解先。）我认为披露制度下一个真正要解决嘅问题，唔系「有冇披露」，而系每一项数字有冇跟住讲清楚：边度嚟、有冇人查过、覆盖咗几多、系事实定系打算。冇咗呢层，AI只会令错嘅嘢传得更快、听落更肯定。写到呢度，我知有几把声会出现。

「咁咪好啰——成本跌咗，细价股终于做得起」

呢个我完全认同。过去十年，合规成本落喺细价股身上系不成比例咁重。一间市值几亿嘅公司，要出同大蓝筹同一格式嘅报告，但佢请唔起个ESG部门，于是俾钱买个模板，每年行礼如仪，为出而出。AI真系帮到呢批人，唔应该当佢系坏事。

但要睇清楚：合规成本跌同讯号价值跌，系同一件事，唔系两件事。你冇得留住一样、掉走另一样。所以诚实嘅讲法系——AI一手解决咗负担问题，亦都同时毁咗资讯价值问题。净值系咪正数，要睇你原本觉得份报告有几多资讯。

「份报告本来就冇资讯，你喺度悼念一样本来就系假嘅嘢」

呢句说话更狠，而且我认同一半。同一间公司，攞去畀唔同评级机构评分，出嚟嘅结果系对唔上嘅。有研究计过六大评级商之间嘅吻合程度，大概只有一半左右——相比之下，信贷评级之间系高度一致嘅。如果连专业读者都读唔出一致结论，份报告对外嘅讯号本来就好弱。

但我要反驳另外𠮶半：份报告最大嘅功用，可能从来都唔系对外，系对内。

我做过嘅项目入面，唔少客系因为要出报告，先第一次搞清楚自己究竟有几多间厂、几多部冷气、边个部门用紧几多电。份报告系一个借口，逼一间公司走一次自己嘅数。𠮶三个月嘅痛苦，唔系为投资者付出嘅，系令公司自己知道自己做紧乜。

所以我觉得真正嘅损失唔喺投资者𠮶边。唔系人哋少咗资讯，系公司照少咗一次镜。

「咁做鉴证咪得啰」

方向啱，但要小心呢句话真正买到啲乜。市面上绝大部分系「有限度鉴证」，通常只覆盖几个指定指标，结论系「冇留意到有重大不符」——同核数师签年报𠮶种保证，唔系同一回事。而佢究竟覆盖咗几多，本身又系一个冇人读嘅数字。

升级唔系做唔到，系要钱。而呢笔钱最后又落返细价股身上——即系反驳一𠮶批人。个圈兜返转头。

咁仲有咩系人人都做唔到？

如果讯号嘅价值嚟自「唔系人人做得到」，值得问嘅系：AI之后，仲有咩系人人做唔到？我数到三样。

一，考官。你请第三方签个名，你买嘅唔系佢嘅意见，系「如果错咗有人孭得起」。AI帮唔到手，因为你告唔到一部机器。

二，一手量度。表、单、实地审查、供应商真系填咗嘅问卷。呢啲要郁真实世界，所以永远贵。

三，有后果嘅承诺。一个目标如果挞咗都冇事，佢就唔系讯号，只系一句说话。挂钩融资嘅息率、对赌条款、监管处罚——有嘢输得起，先至算数。

所以我哋成行嘅重心会移：由「写」移向「查」。呢个系一个细好多嘅行业，对顾问要求亦会更高，行业养到嘅人可能会减少，但长远发展系迈向专业。

香港嘅本能反应 可能系加速器

Appendix C2改咗做ESG Reporting Code、加咗Part D、对齐IFRS S2；2025年起所有发行人强制披露范围一同二；LargeCap由2026年起全套强制；政府路线图指向2028年全面采纳。方向系啱嘅，但当监管见到披露质素跌，本能反应系加多啲项目、加多啲表。而喺一个写作成本已经归零嘅世界，加项目嘅边际成本近乎零——你只系令噪音多咗，讯号一样咁少。
真正应该行嘅系反方向：披露项目唔一定需要增加，但要查得狠啲。问题系「查得狠啲」嘅成本，喺细价股身上不成比例咁重，而香港大部分发行人都系细价股。呢个死结我暂时未有答案。我只知道，如果十年后我哋嘅结论系「当年应该早啲要求鉴证」，咁而家就系𠮶个「早啲」。

后记：

实验做完之后，我将𠮶份40分钟出嘅报告，同我自己团队三个礼拜整𠮶份，摆埋一齐。我揾咗两个同行睇，冇话畀佢哋听边份系边份，结果两个都拣错。我最唔舒服𠮶下唔系佢哋拣错，系我发现我自己都要打开后台睇档案名，先分得出。

一份报告以前证明嘅，从来唔系入面写咗乜，系一间公司肯为咗讲𠮶句说话，付出过几多。而家𠮶个代价冇咗。剩返嘅，净系𠮶句说话。

林一一