李辰安 - 抗疫奇缘｜辰来之笔
发布时间：03:00 2023-01-31 HKT
好快又到元宵佳节，近日返工听埋唔少两地恋爱之真人真事，今日要同大家分享一下。
黄昏酒聚，一切如常，但系大家好似无乜新鲜话题，可能仲未进入状态，我就有好多感动人心故事，我问大师兄︰「三年不见，依家见面，你会有乜反应？」银行伟今天衣着好「士唛」，原来有内地大客过嚟同佢聚旧，发达啦，呢排中港股市都好热闹，我问佢︰「有无饮咗好多茅台？」
其实我咁大个仔都系饮过茅台两三次，次次都系同内地朋友有关，不过，银行伟识埋好多内地富二、三代及留洋深造之士，好少「队」茅台咁「草根」，而系识得叹绝世红酒。「辰哥，三年不见，点会有太大反应？地球人都识用视像会议，话之你去到中国太空站咁远，大家都可以保持联络，你估好似上世纪五十年代时代流行曲《三年》咩？」
「左三年右三年，这一生见面有几天，横三年竖三年，还不如不见面。」张翁熟到识背︰「当年我都系听伯爷播留声机，呢首歌系李香兰首本名曲。」我上网一寻，原来系1958年《一夜风流》之插曲，电影改编自俄国名著。「嗱，我就听过一个『三年』之现代版，某港女生疫前与内地才俊交往，原本约好2020年新春过后，北上见家长……。」大师兄好似唔多耐烦︰「北上武汉见家长呀？有无咁啱呀？」
好啦，话题无端端畀人打断，饮酒，无你咁好气，我问老板有无茅台，其实系新春讲笑，点知佢话有，仲系私人珍藏，我马上转軚︰「都系饮开葡国有气白酒，开住一支饮下先。」港女生准备好之时，武汉出事，原本都想博一博，以为无事啫，好彩无夹硬来，疫情急转直下，如果见家长，可能会一尝封城巨变。
「系啰，大师兄你又点估到真系原来系武汉？」大家都笑，吹水唔抹嘴，有时会撞到正。「辰哥，不如长话短说，呢位故事女主人翁有乜遭遇？唔通又系好似部电影咁，一夜风流之后，变成单亲妈妈？」银行伟好无耐性，故事并非有人意外造人，而系疫情第二年，双方由浓转淡，港女士曾经多次挣扎，话之需要隔离十几廿日都系想去内地揾佢位男朋友，结果，去得一次，去唔到第二、三次，忽然之间，呢位故事女主角觉得，内地与香港原来系那么近又是那么远，想下又想，香港人究竟可唔可以融入内地生活？尤其是由于疫情关系，令两人分隔两地，如此这般，某日遇到读书时之前男友，故事便曲折地发展。
张翁话，下次可以上去佢Office，有两支正宗茅台，欢迎大家品尝。「故事仲未讲完，前男友喺英国返到香港，佢话出面世界好Free，好似英国咁，使乜戴口罩，港女士顿时感到大家有共鸣，于是乎自然而然又再一齐拍拖。「安仔，我估下个剧情发展啦，依家故事女主角已经同前男友定居英国，系咪？」
我唔多好意思窒了大师兄一句︰「估得到咁容易就唔系故事啦。」我懒理大家，食件三文鱼先。「安仔，唔通佢同前男友去咗上海？」原来港女士与内地男分手之后，跟前男友去咗新加坡，因为男方公司安排，无得留低香港，但听讲双方仲未结婚，女生家长好劳气，猛咁催婚。「安仔，𠮶位女主角贵庚？」年龄系女人秘密，不过可以畀少少贴士大家，佢系虎年出世，你慢慢估下，我讲呢个故事，可以名为「抗疫奇缘话香江」。
